କିଏ ଏହି ପାକିସ୍ତାନୀ ସୁନ୍ଦରୀ… ଯାହାଙ୍କ ସହ ରୋମାନ୍ସ କରିବେ ସାଉଥ୍‌ ସୁପର୍‌ଷ୍ଟାର୍‌ ପ୍ରଭାସ

ସାଉଥ୍‌ ସୁପର୍‌ଷ୍ଟାର୍‌ ପ୍ରଭାସ ଆଜିକାଲି ତାଙ୍କ ଫିଲ୍ମ 'କଳ୍‌କୀ ୨୮୯୮ ଏଡି' ର ସଫଳତାକୁ ଖୁବ ଉପଭୋଗ କରୁଛନ୍ତି। ନାଗ୍‌ ଅଶ୍ୱିନଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମଟି ବକ୍ସ ଅଫିସରେ ଭଲ ପ୍ରଦର୍ଶନ କରୁଛି। ଏଥି ସହିତ, ପ୍ରଭାସ ମଧ୍ୟ ତାଙ୍କ ପରବର୍ତ୍ତୀ ଫିଲ୍ମ ପାଇଁ ପ୍ରସ୍ତୁତି ଆରମ୍ଭ କରିଦେଲେଣି।

ପ୍ରଭାସ ଏବେ ମାରୁତିଙ୍କ ନିର୍ଦ୍ଦେଶିତ ହରର୍‌ କମେଡି ଫିଲ୍ମ 'ଦି ରାଜା ସାବ୍‌'ରେ ଅଭିନୟ କରିବେ। ଏହା ସହିତ ପ୍ରଭାସ ଆଉ ଏକ ନୂଆ ଫିଲ୍ମ ପାଇଁ ହନୁ ରାଘବପୁଡିଙ୍କ ସହିତ ହାତ ମିଳାଇଛନ୍ତି, ଯେଉଁଥିରେ ନୂଆ ତଥ୍ୟ ସାମ୍ନାକୁ ଆସିଛି।

ଖବର ଅନୁଯାୟୀ, ହନୁ ରାଘବପୁଡିଙ୍କ ସହ ପ୍ରଭାସଙ୍କ ନୂଆ ଫିଲ୍ମ ଏକ ରୋମାଣ୍ଟିକ୍ ଆକ୍ସନ୍ ଡ୍ରାମା ହେବ। ଏବେ ଫିଲ୍ମରେ ମୁଖ୍ୟ ନାୟିକା ଭୂମିକାରେ ଅଭିନୟ କରୁଥିବା ଅଭିନେତ୍ରୀଙ୍କ ନାମକୁ ନେଇ ସୋସିଆଲ ମିଡିଆରେ ଆଲୋଚନା ତୀବ୍ର ହୋଇଛି। କୁହାଯାଉଛି ଯେ ନିର୍ମାତା ଏମିତି ଜଣେ ଅଭିନେତ୍ରୀଙ୍କୁ ବାଛିଛନ୍ତି ଯିଏ ପ୍ରଭାସଙ୍କ ସହ ରୋମାନ୍ସର ତଡ୍‌କା ଲଗେଇବେ।

ଖବର ଅନୁଯାୟୀ ପାକିସ୍ତାନୀ ଅଭିନେତ୍ରୀ ସଜଲ ଅଲିଙ୍କୁ ପ୍ରଭାସଙ୍କ ବିପକ୍ଷରେ କାଷ୍ଟ କରାଯିବ। ସଜଲ ଅଲି ସ୍ୱର୍ଗତ ଅଭିନେତ୍ରୀ ଶ୍ରୀଦେବୀଙ୍କ ଫିଲ୍ମ ‘ମମ୍’ରେ ତାଙ୍କ ଭୂମିକା ପାଇଁ ବେଶ୍ ଜଣାଶୁଣା। ଯଦିଓ କାଷ୍ଟିଂ ନ୍ୟୁଜ୍ ନିଶ୍ଚିତ ହୋଇନାହିଁ, ତଥାପି ଏହାକୁ ନେଇ ଆଲୋଚନା ଜୋର୍ ଧରିଛି। ଯଦି ଏହି ଆଲୋଚନା ସତ ହୁଏ ତେବେ ସଜଲଙ୍କୁ ପରଦାରେ ପ୍ରଭାସଙ୍କ ସହ ରୋମାନ୍ସ କରିବା ଦେଖି ପ୍ରଶଂସକମାଏ ନିଶ୍ଚିତ ଉତ୍ସାହିତ ହେବେ।

ମୀତ୍ରୀ ମୁଭି ମେକର୍ସ ଏହି ପ୍ରୋଜେକ୍ଟରେ ବହୁ ପରିମାଣର ଅର୍ଥ ବିନିଯୋଗ କରୁଛନ୍ତି। ଏହି ଫିଲ୍ମ ଖୁବ୍ ଶୀଘ୍ର ଲଞ୍ଚ୍‌ ହେବାକୁ ଯାଉଛି। 'ସୀତା ରାମମ୍'ରେ ସଫଳ ସହଯୋଗ ପରେ ସଂଗୀତକାର ବିଶାଲ ଚନ୍ଦ୍ରଶେଖର ପୁଣି ଥରେ ଏହି ଫିଲ୍ମ ପାଇଁ ହନୁ ରାଘବପୁଡିଙ୍କ ସହ ମିଳିତ ହେବେ। କୁହାଯାଉଛି ଯେ ଏହି ଫିଲ୍ମ ସ୍ୱାଧୀନତା ପୂର୍ବର ରଜାକର ଆନ୍ଦୋଳନ ଉପରେ ଆଧାରିତ ହେବ। ଚଳିତ ବର୍ଷ ଫିଲ୍ମର ସୁଟିଂ ଆରମ୍ଭ ହେବ ବୋଲି ଆଶା କରାଯାଉଛି।

ଏହାପୂର୍ବରୁ ହନୁ ରାଘବପୁଡି ମଧ୍ୟ ଏହି ଫିଲ୍ମକୁ ନେଇ କିଛି ସୂଚନା ଶେୟାର କରିଥିଲେ। ୱାରଙ୍ଗଲରେ ଏନ୍‌ଆଇଟି ଛାତ୍ରଛାତ୍ରୀଙ୍କ ଏକ ସ୍ୱତନ୍ତ୍ର ଅଧିବେଶନ ପାଇଁ ହନୁ ରାଘବପୁଡିଙ୍କୁ ଅତିଥି ଭାବେ ନିମନ୍ତ୍ରଣ କରାଯାଇଥିଲା। ଏହି ସମୟରେ ସେ ପ୍ରଭାସଙ୍କ ପରବର୍ତ୍ତୀ ଫିଲ୍ମର ନିର୍ଦ୍ଦେଶନା ଦେଉଛନ୍ତି ବୋଲି କହିଛନ୍ତି। ସେ କହିଛନ୍ତି ଯେ ସେ ପ୍ରଭାସଙ୍କ ସହ ଏକ ପିରିୟଡ ଆକ୍ସନ୍ ଫିଲ୍ମ କରିବାକୁ ଯାଉଛନ୍ତି। ଫିଲ୍ମକୁ ନେଇ ରାଘବପୁଡି ଆହୁରି ମଧ୍ୟ କହିଛନ୍ତି ଯେ ବିଶାଲ ଚନ୍ଦ୍ରଶେଖର ମଧ୍ୟ ପ୍ରଭାସଙ୍କ ସହ ତାଙ୍କ ଫିଲ୍ମ ପାଇଁ ତିନୋଟି ଗୀତ ରଚନା କରିଛନ୍ତି।