'ବିଗ୍ ବସ୍' ସିନା କାଟିଦେଲା, 'ଝଲକ ଦିଖ୍‌ଲା ଜା'ର ୱିନର୍ ହେଇଗଲେ ମନୀଷା

'ବିଗ୍ ବସ୍ ଓଟିଟି ୨' ର ଫାଇନାଲ୍‌ରୁ ବାଦ ପଡିଥିବା ସୋସିଆଲ୍ ମିଡିଆ ଇନ୍‌ଫ୍ଲ୍ୟଏନ୍ସର୍-ଅଭିନେତ୍ରୀ ଡ୍ୟାନ୍ସ ରିଅଲିଟି ସୋ 'ଝଲକ ଦିଖ୍‌ଲା ଜା ୧୧' ର ବିଜେତା ହୋଇଛନ୍ତି। ବିହାରର କେମୁର ଜିଲ୍ଲାର ବାସିନ୍ଦା ଏହି ଝିଅର ନାଁ ମନୀଷା ରାନୀ। ମନୀଷା ୱାଇଲ୍ଡକାର୍ଡ ପ୍ରତିଯୋଗୀ ଭାବରେ ଡ୍ୟାନ୍ସ ରିଆଲିଟି ଶୋ’ରେ ପ୍ରବେଶ କରିଥିଲେ।

ଏହି ରିଆଲିଟି ସୋ’ରେ ତାଙ୍କ ପାର୍ଟନର୍ ଥିଲେ କୋରିଓଗ୍ରାଫର ଆଶୁତୋଷ ପାୱାର୍‌। ସେ ମଧ୍ୟ ତାଙ୍କ ସହିତ ବିଜେତା ହୋଇଛନ୍ତି। ବିଜେତା ହେବା ପରେ ମନୀଷା ରାନୀ କ’ଣ ପାଇଲେ ଆସନ୍ତୁ ଜାଣିବା।

'ଝଲକ ଦିଖ୍‌ଲା ଜା ୧୧'ରେ ପାଞ୍ଚ ଜଣ ଫାଇନାଲିଷ୍ଟଙ୍କ ମଧ୍ୟରେ ମନୀଷା ରାନୀ, ଶୋଏବ ଇବ୍ରାହିମ, ଧନଶ୍ରୀ ବର୍ମା, ଆଦ୍ରିଜା ସିହ୍ନା ଏବଂ ଶ୍ରୀରାମ ଚନ୍ଦ୍ର ଥିଲେ। ମାତ୍ର ଶ୍ରେଷ୍ଠ ୩ରେ କେବଳ ମନୀଷା, ଶୋଏବ ଏବଂ ଆଦ୍ରିଜା ରହିଥିଲେ। ମନୀଷା ରାନୀ ସିରିଜ୍ ଜିତିଥିଲେ।

ଶୋଏବ ଇବ୍ରାହିମ, ଆଦ୍ରିଜା ସିହ୍ନା ଏବଂ ମନୀଷା ରାନୀ 'ଝଲକ ଦିଖ୍‌ଲା ଜା ୧୧'ର ଫାଇନାଲରେ ଜବରଦସ୍ତ ପ୍ରଦର୍ଶନ କରିଥିଲେ। ଶାହରୁଖ ଖାନଙ୍କ ଅଭିନୀତ ଚଳଚ୍ଚିତ୍ର 'ଜବାନ'ର ଗୀତ 'ଜିନ୍ଦା ବନ୍ଦା'ରେ ଶୋଏବ ଏକ ଚମତ୍କାର ପ୍ରଦର୍ଶନ କରିଥିଲେ।

ଏଥି ସହିତ ଆଦ୍ରିଜା ସିହ୍ନା 'ଛମକ ଚଲୋ', 'ନଦିୟା କେ ପ୍ୟାର୍‌' ଏବଂ 'ମୁଭ୍ ୟୁର୍ ବଡୀ' ଗୀତରେ ଡ୍ୟାନ୍ସ କରି ସମସ୍ତଙ୍କ ହୃଦୟ ଜିତିଥିଲେ। ଅନ୍ତିମ ପ୍ରଦର୍ଶନରେ ମନୀଷା 'ଠୁମ୍‌କେଶ୍ୱରୀ', 'ଡୁ ୟୁ ଲଭ୍ ମି', 'ପରମ ସୁନ୍ଦରୀ' ଏବଂ 'ସାମି ସାମି' ଗୀତରେ ଧୂଆଁଦାର ପ୍ରଦର୍ଶନ କରିଥିଲେ।

ବିଜେତା ଟ୍ରଫି ବ୍ୟତୀତ ମନୀଷା ରାନୀଙ୍କୁ ୩୦ ଲକ୍ଷ ଟଙ୍କା ଚେକ୍ ମିଳିଥିବାବେଳେ ତାଙ୍କ କୋରିଓଗ୍ରାଫର ଆଶୁତୋଷ ପାୱାରଙ୍କୁ ୧୦ ଲକ୍ଷ ଟଙ୍କା ମିଳିଥିଲା। ଏହା ଛଡା ଉଭୟ ୟସ୍ ଆଇଲ୍ୟାଣ୍ଡ୍, ଆବୁଧାବି ଯାତ୍ରା ପାଇଁ ଟିକଟ୍ ମଧ୍ୟ ଜିତିଛନ୍ତି।

ବିହାରର ମୁଙ୍ଗେରରୁ ଆସିଥିବା ମନୀଷା ତାଙ୍କ ବିଜୟକୁ ଏକ ସ୍ୱପ୍ନ ବୋଲି କହିଛନ୍ତି। ସେ କହିଛନ୍ତି, "ବିଚାରପତି ଏବଂ ଦର୍ଶକଙ୍କ ପ୍ରେମ, ସମର୍ଥନ ଏବଂ ଉତ୍ସାହ ପାଇଁ ମୁଁ କୃତଜ୍ଞ। ମୁଁ ଜାଣିଥିଲି ଏହି ଅଭିଜ୍ଞତା ମୋ ଜୀବନରେ ପରିବର୍ତ୍ତନ ଆଣିବ ଏବଂ ଏହା ପ୍ରକୃତରେ ହୋଇଛି।"

ମନୀଷା ରାନୀ କହିଛନ୍ତି, “ୱାଇଲ୍ଡକାର୍ଡ ପ୍ରତିଯୋଗୀ ଭାବରେ ମୋତେ ନିଜକୁ ପ୍ରମାଣ କରିବାକୁ ଦୁଇଗୁଣ ପରିଶ୍ରମ କରିବାକୁ ପଡିଲା ଏବଂ ପ୍ରତ୍ୟେକ ମୁହୂର୍ତ୍ତ ଉତ୍ସାହରେ ପରିପୂର୍ଣ୍ଣ ଥିଲା ଏବଂ ଜଣେ ଡ୍ୟାନ୍ସ ଭାବରେ ମୋର ବିକାଶ ହୋଇଥିଲା।” ପ୍ରକାଶଥାଉ ଯେ କୋଭିଡ୍‌ ଲକ୍‌ଡାଉନ୍ ବେଳେ ଇନ୍‌ଷ୍ଟାଗ୍ରାମ୍‌ ରିଲ୍ ମାଧ୍ୟମରେ ମନୀଷା ଲୋକପ୍ରିୟତା ହାସଲ କରିଥିଲେ।

ମନୀଷା ରାନୀ ତାଙ୍କ କୋରିଓଗ୍ରାଫର ଆଶୁତୋଷ ପାୱାରଙ୍କ ପ୍ରତି କୃତଜ୍ଞତା ଜଣାଇଛନ୍ତି। ସେ କହିଛନ୍ତି ଯେ ଆଶୁତୋଷ ତାଙ୍କ ଉପରେ ଆତ୍ମବିଶ୍ୱାସ ରଖିଥିଲେ ଏବଂ ତାଙ୍କୁ ସମର୍ଥନ କରିଥିଲେ। ମନୀଷା ସୋସିଆଲ ମିଡିଆରେ ତାଙ୍କ ବିଜୟ ଉତ୍ସବ ପାଳନ କରୁଥିବାର ଫଟୋ ଶେୟାର କରିଛନ୍ତି।