ଅଯୋଧ୍ୟାରେ ରାମ ମନ୍ଦିରକୁ ନେଇ ଦୁଃଖ ପ୍ରକାଶ କଲେ ରାମାୟଣର ସୀତା; କହିଲେ ଏମିତି…

ଅଯୋଧ୍ୟାରେ ଭଗବାନ ରାମଙ୍କ ପ୍ରାଣ ପ୍ରତିଷ୍ଠା ପାଇଁ ମୂର୍ତ୍ତି ଚୟନ ସରିଯାଇଛି। ଦେଶର ସୁପ୍ରସିଦ୍ଧ କାରିଗର ଅରୁଣ ଯୋଗୀରାଜଙ୍କ ଦ୍ୱାରା ନିର୍ମିତ ପ୍ରଭୁ ରାମଙ୍କ ପ୍ରତିମୂର୍ତ୍ତି ଅଯୋଧ୍ୟାରେ ସ୍ଥାପନ କରାଯିବ। ଏହି ପ୍ରତିମୂର୍ତ୍ତିକୁ ସମୁଦାୟ ତିନୋଟି ମୂର୍ତ୍ତି ମଧ୍ୟରୁ ଚୟନ କରାଯାଇଛି, ଯାହାକୁ ନେଇ କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ ସୂଚନା ପ୍ରଦାନ କରିଛନ୍ତି।

ଜାନୁୟାରୀ ୨୨ ରେ, ଅଯୋଧ୍ୟାରେ ଭଗବାନ ରାମଙ୍କ ମୂର୍ତ୍ତିର ପ୍ରାଣ ପ୍ରତିଷ୍ଠା ହେବ, ଯେଉଁଥିରେ ଦେଶର ବହୁ ପ୍ରସିଦ୍ଧ ବ୍ୟକ୍ତିତ୍ୱ ଅଂଶଗ୍ରହଣ କରିବେ। ରାମାନନ୍ଦ ସାଗରଙ୍କ ‘ରାମାୟଣ’ରେ ମାତା ସୀତା ଭୂମିକାରେ ଅଭିନୟ କରିଥିବା ଦୀପିକା ଚିଖ୍‌ଲିଆଙ୍କ ନାମ ମଧ୍ୟ ଏହି ତାଲିକାରେ ସ୍ଥାନ ପାଇଛି। ଦୀପିକା ଚିଖ୍‌ଲିଆ ଏକ ବିଶେଷ ଅତିଥି ଭାବରେ ରାମ ମନ୍ଦିର ଉଦ୍‌ଘାଟନୀ କାର୍ଯ୍ୟକ୍ରମରେ ଭାଗ ନେବାକୁ ଯାଉଥିବା ବେଳେ ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ବିଶେଷ ଅନୁରୋଧ ମଧ୍ୟ କରିଛନ୍ତି।

ଭଗବାନ ରାମଙ୍କ ପ୍ରାଣ ପ୍ରତିଷ୍ଠାକୁ ନେଇ ଏକ ଜାତୀୟ ଗଣମାଧ୍ୟମ ସହ କଥାବାର୍ତ୍ତା ବେଳେ ଦୀପିକା ଚିଖ୍‌ଲିଆ ନିଜର ଉତ୍ସାହ ବ୍ୟକ୍ତ କରି କହିଛନ୍ତି – “ଏହି ଦିନଟି ମୋ ପାଇଁ ଅତ୍ୟନ୍ତ ଐତିହାସିକ। ଏହା ମୋ ପାଇଁ ବହୁତ କିଛି କାରଣ ମଧ୍ୟ ରଖେ। ଦୀର୍ଘ ୫୦୦ବର୍ଷ ପରେ ଭଗବାନ ରାମ ଅଯୋଧ୍ୟାକୁ ଆସୁଛନ୍ତି। ନିଜ ଘରକୁ ଆସୁଛନ୍ତି। ସମସ୍ତେ ମୋ ବିଷୟରେ ଜାଣନ୍ତି ଯେ ମୁଁ କେତେ ରାମମୟୀ। ପ୍ରଭୁ ରାମଙ୍କ ଉପରେ ମୋର ବହୁତ ବିଶ୍ୱାସ ଅଛି। ମୁଁ ମଧ୍ୟ ମାତା ସୀତା ଭୂମିକାରେ ଅଭିନୟ କରିଛି। ତେଣୁ ଏହି ମୁହୂର୍ତ୍ତ ମୋ ପାଇଁ ଆହୁରି ଭାବପ୍ରବଣ ହେବାକୁ ଯାଉଛି। ମୋ ସହିତ ଏହା ମଧ୍ୟ ସମଗ୍ର ଦେଶ ପାଇଁ ଏକ ଗୌରବର ଦିନ ହେବ।”

ନିମନ୍ତ୍ରଣ ପାଇବା ପରେ ଦୀପିକା ଚିଖ୍‌ଲିଆ କହିଛନ୍ତି- “ମୁଁ ଭାବି ନ ଥିଲି ଯେ ମୋତେ ନିମନ୍ତ୍ରଣ ମିଳିବ। ମୁଁ ଏଥିପାଇଁ ଆଦୌ ପ୍ରସ୍ତୁତ ନ ଥିଲି। ଯେତେବେଳେ ମୁଁ ଆର୍‌ଏସ୍‌ଏସ୍‌ କାର୍ଯ୍ୟାଳୟରୁ ଏକ କଲ୍‌ ପାଇଲି, ସେମାନେ ମୋତେ କହିଥିଲେ ଯେ ତୁମେ ଆମ ପାଇଁ, ସମଗ୍ର ଦେଶ ପାଇଁ ସୀତା। ଆପଣ ସେଠାରେ ଉପସ୍ଥିତ ହେବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତେଣୁ ଦୟାକରି ଆମର ନିମନ୍ତ୍ରଣ ଗ୍ରହଣ କରନ୍ତୁ। ଏହା ଶୁଣି ମୁଁ ବହୁତ ଖୁସି ହୋଇଗଲି। ମୁଁ ତାଙ୍କୁ ପଚାରିଲି ଆପଣ ମୋତେ ସୀତା ବୋଲି ଭାବୁଛନ୍ତି କି। ଏହାର ଉତ୍ତରରେ ସେ କହିଲେ - ଏଥିରେ କୌଣସି ସନ୍ଦେହ ନାହିଁ।”

ତେବେ ରାମ ମନ୍ଦିରରେ ଭଗବାନ ରାମଙ୍କ ସହ ମାତା ସୀତାଙ୍କର ପ୍ରତିମା ନ ରହିବାକୁ ନେଇ ଦୀପିକା ଦୁଃଖ ପ୍ରକାଶ କରିଛନ୍ତି। ଏହାକୁ ନେଇ ସେ କହିଛନ୍ତି ଯେ “ମୁଁ ଆରମ୍ଭରୁ ଅନୁଭବ କରୁଥିଲି ଯେ ପ୍ରଭୁ ରାମଙ୍କ ସହ ମାତା ସୀତାଙ୍କ ପ୍ରତିମା ମଧ୍ୟ ସ୍ଥାପନ କରାଯିବ। କିନ୍ତୁ, ଏଠାରେ ତାହା ହୋଇ ନାହିଁ ଏବଂ ଏଥିପାଇଁ ମୁଁ ବହୁତ ଦୁଃଖିତ। ଅଯୋଧ୍ୟାରେ ଭଗବାନ ରାମଙ୍କ ସହ ମାତା ସୀତାଙ୍କ ପ୍ରତିମୂର୍ତ୍ତି ସ୍ଥାପନ କରିବାକୁ ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅନୁରୋଧ କରୁଛି।”

ଦୀପିକା ଆହୁରି ମଧ୍ୟ କହିଛନ୍ତି ଯେ “ମୁଁ ବାସ୍ ଏହା ହିଁ ଚାହେଁ ଯେ ମାତା ସୀତାଙ୍କୁ କୌଣସି ବି ଜାଗାରେ ସ୍ଥାନ ଦିଆଯାଉ। ସେଠାରେ ତ ଏମିତି ବି କିଛି ସ୍ଥାନ ଥିବ ଯେଉଁଠାରେ ମାତା ସୀତା ବିରାଜମାନ କରିପାରିବେ। ମୁଁ ଆପଣଙ୍କୁ ଅନୁରୋଧ କରୁଛି ଯେ ରାମଙ୍କୁ ଏକୁଟିଆ ରଖନ୍ତୁ ନାହିଁ। ମୁଁ ମାନୁଛି ଯେ ଅଯୋଧ୍ୟାରେ ରାମଙ୍କ ବାଳରୂପ ହେଉଛି, ଯାହା ଅତ୍ୟନ୍ତ ପ୍ରଭାବଶାଳୀ। କିନ୍ତୁ, ଯଦି ପ୍ରଭୁ ଶ୍ରୀରାମଙ୍କ ସହିତ ମାତା ସୀତାଙ୍କ ବିରାଜମାନ ହେବ, ତେବେ ସମସ୍ତେ ବହୁତ ଖୁସି ହେବେ।”