ବଢିଲା 'ଆଦିପୁରୁଷ'ର ଟିକେଟ୍ ମୂଲ୍ୟ; ଗରିବଙ୍କ ପାଇଁ ୧ ଲକ୍ଷରୁ ଅଧିକ ମାଗଣା ଟିକେଟ୍‌

ପ୍ରଭାସଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର 'ଆଦିପୁରୁଷ' ଜୁନ୍ ୧୬ରେ ପ୍ରେକ୍ଷାଳୟକୁ ଆସିବାକୁ ଯାଉଛି ଏବଂ ଏହି ଚଳଚ୍ଚିତ୍ରରୁ ବହୁତ କିଛି ଆଶା କରାଯାଉଛି। ଫିଲ୍ମକୁ ନେଇ ବର୍ତ୍ତମାନ ସୁଦ୍ଧା ମିଶ୍ରିତ ପ୍ରତିକ୍ରିୟା ମଧ୍ୟ ରହିଛି। କିଛି ଲୋକ ଏହାକୁ ଦେଖିବା ନେଇ ଉତ୍ସାହିତ ଥିବାବେଳେ ଆଉ କିଛି ଏହାକୁ ଦୃଢ ବିରୋଧ କରୁଛନ୍ତି। ପ୍ରଭାସ ଏହି ଚଳଚ୍ଚିତ୍ରରେ ଥିବାରୁ ଅଧିକାଂଶ ଲୋକ ଏହାକୁ ସମର୍ଥନ କରୁଛନ୍ତି ଏବଂ ଉତ୍ସାହର ସହିତ ଏହାର ଟିକେଟ୍ କିଣୁଛନ୍ତି। ଏହି ସମୟରେ ଏହି ଫିଲ୍ମର ଟିକେଟ୍ ମୂଲ୍ୟକୁ ନେଇ ଏକ ନୂଆ ଅପଡେଟ୍ ସାମ୍ନାକୁ ଆସିଛି।

ଆଗ ଧାଡିର ଅନେକ ଅଭିନେତା ମଧ୍ୟ ପ୍ରଭାସଙ୍କ ଫିଲ୍ମକୁ ସମର୍ଥନ କରିବାକୁ ଆଗେଇ ଆସିଛନ୍ତି। ଅନେକ ଗରିବ ଏବଂ ଅଭାବୀ ଲୋକଙ୍କ ପାଇଁ ଚଳଚ୍ଚିତ୍ର ଟିକେଟ୍‌କୁ ପାଣ୍ଠି ଯୋଗାଇବା ପାଇଁ ମଧ୍ୟ ହାତ ବଢାଉଛନ୍ତି। ନିକଟରେ ବାଣିଜ୍ୟ ବିଶ୍ଳେଷକ ମନୋବାଲା ବିଜୟବାଲାନ୍ ଟ୍ୱିଟ୍ କରି ‘ଆଦିପୁରୁଷ’ର ବକ୍ସ ଅଫିସ୍ ରୋଜଗାରର ଅଗ୍ରୀମ ବୁକିଂକୁ ନେଇ ମତ ରଖିଛନ୍ତି।

ଟ୍ୱିଟ୍‌ରେ ସେ ହାରାହାରି ଟିକେଟ୍ ମୂଲ୍ୟ ୨୦୦ ଟଙ୍କା ସହିତ ୧,୫୦,୦୦୦ ମାଗଣା ଟିକେଟ୍‌ର ଏକ ବଡ ଡାଟା ଦେଇଛନ୍ତି। ଏହା ସମୁଦାୟ ବକ୍ସ ଅଫିସ୍ ରୋଜଗାରରେ ୩ କୋଟି ଯୋଗ କରିଥାନ୍ତା। ତେବେ ଦେଖିବାକୁ ଗଲେ ୫୦୦କୋଟି ବଜେଟ୍ ଥିବା ଚଳଚ୍ଚିତ୍ର ପାଇଁ ୩ କୋଟି ବଡ଼ କଥା ନୁହେଁ। ଏହି ରଣନୀତି ମୁଖ୍ୟତଃ ଚଳଚ୍ଚିତ୍ରର ପ୍ରମୋସନ ଏବଂ ଅଭାବୀ ଲୋକଙ୍କୁ ଏହାକୁ ଦେଖିବା ନେଇ ସାହାଯ୍ୟ କରିବ।

କିନ୍ତୁ ବର୍ତ୍ତମାନ ସାଉଥ୍‌ ରାଜ୍ୟଗୁଡିକରେ ଏହାର ଟିକେଟ୍ ମୂଲ୍ୟ ବୃଦ୍ଧି ଉପରେ ଗୁରୁତ୍ୱ ଦିଆଯାଇଛି। ଏଥିରୁ ଅଧିକ ଲାଭ ଉଠେଇବାକୁ ନେଇ ‘ଆଦିପୁରୁଷ’ର ନିର୍ମାତା ଭାମସି କୃଷ୍ଣା ରେଡ୍ଡୀ ଏବଂ ବିବେକ ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀଙ୍କୁ ଭେଟି ଟିକେଟ୍ ମୂଲ୍ୟ ବୃଦ୍ଧି କରିବାକୁ ନିବେଦନ କରିଥିଲେ।

ନିର୍ମାତା ଅର୍ଥର ଲୋଭରେ ନ ପଡି ଅତି ଯତ୍ନର ସହ ଏହାର ମୂଲ୍ୟକୁ ବଦଳାଇବାକୁ ସକ୍ଷମ ହୋଇଥିବା ଜଣାଯାଇଛି। ନିର୍ମାତା ଭାବିଚିନ୍ତି ମଲ୍ଟିପ୍ଲେକ୍ସ ଏବଂ ସିଙ୍ଗଲ୍ ସ୍କ୍ରିନ୍‌ରେ ୫୦ରୁ ଅଧିକ ଟଙ୍କା ବୃଦ୍ଧି କରିବାକୁ ଅନୁରୋଧ କରିଥିଲେ। ପ୍ରେକ୍ଷାଳୟରେ ଟିକେଟ୍ ମୂଲ୍ୟ ବୃଦ୍ଧିକୁ ନେଇ ତେଲେଙ୍ଗାନା ସରକାର ଏକ ନିର୍ଦ୍ଦେଶ ଦେଇଛନ୍ତି।

ସରକାରୀ ଆଦେଶ ସୂଚାଇ ଦେଇଛି ଯେ ତେଲେଙ୍ଗାନାର ସିଙ୍ଗଲ୍‌ ସ୍କ୍ରୀନ୍‌ରେ ଜୁନ୍ ୧୬ରୁ ତିନି ଦିନ ପାଇଁ ଅତିରିକ୍ତ ୫୦ ଟଙ୍କା ଟିକେଟ୍ ବିକ୍ରି କରିବାକୁ ଅନୁମତି ଦିଆଯିବ। ମଲ୍ଟିପ୍ଲେକ୍ସରେ 3D ଚାର୍ଜ ବ୍ୟତୀତ ୨୯୫ ଟଙ୍କାରେ ଟିକେଟ୍ ବିକ୍ରି ହେବ।

ଯଦି ନୂଆ ଅର୍କେଷ୍ଟ୍ରେଟେଡ୍ ମୂଲ୍ୟ ଟ୍ରେଣ୍ଡ୍ ଆସେ ତେବେ 'ଆଦିପୁରୁଷ' ବର୍ଷର ଶ୍ରେଷ୍ଠ ୧୦ଟି ଓପନିଂ ଫିଲ୍ମ ମଧ୍ୟରୁ ଗୋଟିଏ ହେବ ଏବଂ ଚଳିତ ବର୍ଷ ମୁକ୍ତିଲାଭ କରୁଥିବା ଚଳଚ୍ଚିତ୍ରଗୁଡିକ ମଧ୍ୟରେ ବକ୍ସ ଅଫିସ୍‌ରେ ଅନେକ ରେକର୍ଡ ଭାଙ୍ଗିବାର ସମ୍ଭାବନା ଅଛି।

ପ୍ରଭାସ ଏବଂ କ୍ରିତି ସାନନଙ୍କ ଚଳଚ୍ଚିତ୍ର ପ୍ରେକ୍ଷାଳୟକୁ ଆସିବାକୁ ଆଉ ମାତ୍ର ଦୁଇ ଦିନ ବାକି ଅଛି, କିନ୍ତୁ ଟିକେଟ୍‌ ବିକ୍ରିର ଧାରାକୁ ଦେଖି ଏହା ଅନେକ ରେକର୍ଡ ଭାଙ୍ଗିପାରେ ବୋଲି ଅନୁମାନ କରାଯାଉଛି। ରିଲିଜ୍ ପୂର୍ବରୁ ମଧ୍ୟ ଅନେକ ପ୍ରେକ୍ଷାଳୟରେ ପୂରା ଟିକେଟ୍ ବିକ୍ରି ହୋଇସାରିଛି।

ରିପୋର୍ଟ ଅନୁଯାୟୀ, ପ୍ରଥମ ଦିନର ଅନେକ ଶୋ ହାଉସ୍‌ଫୁଲ୍ ରହିଛି। ଏଥି ସହିତ ଦିଲ୍ଲୀ ଏବଂ ମୁମ୍ବାଇ ଭଳି ମେଟ୍ରୋ ସହରରେ ଟିକେଟ୍ ମୂଲ୍ୟ ଆକାଶଛୁଆଁ ହୋଇଛି। ପ୍ରିମିୟମ୍ ପ୍ରେକ୍ଷାଳୟରେ ଟିକେଟ୍ ୨,୦୦୦ ଟଙ୍କା ପର୍ଯ୍ୟନ୍ତ ବିକ୍ରି ହେଉଛି।

ଓମ୍‌ ରାଓତଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ଭାରତୀୟ ମହାକାବ୍ୟ ରାମାୟଣ ଉପରେ ଆଧାରିତ ଏବଂ ଏହା ବିଭିନ୍ନ ବର୍ଗର ଦର୍ଶକଙ୍କୁ ଆକର୍ଷିତ କରିବ ବୋଲି ଆଶା କରାଯାଉଛି। ଚଳଚ୍ଚିତ୍ର ଇଣ୍ଡଷ୍ଟ୍ରିର ଜଣେ ଲୋକପ୍ରିୟ ଟ୍ରାକରଙ୍କ ଅନୁଯାୟୀ, ପ୍ରେକ୍ଷାଳୟରେ ରିଲିଜ୍ ହେବା ପୂର୍ବରୁ ଫିଲ୍ମ ୩ କୋଟି ରୋଜଗାର କରିସାରିଛି। ଏହି ଚଳଚ୍ଚିତ୍ରର ଶୋ’ ତେଲେଙ୍ଗାନାରେ ଜୁନ୍ ୧୬ରୁ ଭୋର୍ ୪ ଟାରୁ ଆରମ୍ଭ ହେବ ଏବଂ ତେଲେଙ୍ଗାନା ସରକାର ବିତରକମାନଙ୍କୁ ସକାଳର ସ୍ୱତନ୍ତ୍ର ଶୋ’ ପାଇଁ ଅନୁମତି ଦେଇଛନ୍ତି।