ବିଶ୍ୱ ସିନେମା ଜଗତର ସବୁଠୁ ବଡ଼ ସମ୍ମାନ ଓସ୍କାର ପ୍ରଦାନ କରାଯାଇଛି । ଆମେରିକା ଲସ୍ଏଞ୍ଜେଲସରେ ଡଲବି ଥିଏଟରରେ ଆୟୋଜିତ ହୋଇଛି ୯୪ତମ ଏକାଡେମୀ ଆୱାର୍ଡସ୍ ଉତ୍ସବ । ସାଇ-ଫାଇ ଫିଲ୍ମ ଡ୍ୟୁନ୍ ସର୍ବାଧିକ ୬ଟି ପୁରସ୍କାର ଜିତିଛି । ୱିଲ୍ ସ୍ମିଥ୍ ଶ୍ରେଷ୍ଠ ଅଭିନେତା ଓ ଜେସିକା ଚେଷ୍ଟେନ୍ ଶ୍ରେଷ୍ଠ ଅଭିନେତ୍ରୀ ହୋଇଥିବା ବେଳେ କୋଡାକୁ ମିଳିଛି ଶ୍ରେଷ୍ଠ ଫିଲ୍ମର ପୁରସ୍କାର ।
ହଲିଉଡର ବିଗେଷ୍ଟ ନାଇଟ୍ । ୯୪ ତମ ଏକାଡେମୀ ଆୱାର୍ଡସ୍ ଉତ୍ସବ । ଏଥର ଓସ୍କାରରେ ବାଜି ମାରିଛି ସାଇ-ଫାଇ ଫିଲ୍ମ ଡ୍ୟୁନ୍ । ଛଅ ଛଅଟି ବିଭାଗରେ ଆଓ୍ୱାର୍ଡ ହାତେଇଛି ଏହି ଫିଲ୍ମ । ବେଷ୍ଟ୍ ସାଉଣ୍ଡ୍, ଫିଲ୍ମ ଏଡିଟିଂ, ପ୍ରଡକ୍ସନ ଡିଜାଇନ୍, ଭିଜୁଆଲ ଇଫେସ, ସିନେମାଟୋଗ୍ରାଫି ଏବଂ ବେଷ୍ଟ ମ୍ୟୁଜିକ୍ ଇନ୍ ଓରିଜିନାଲ ସ୍କୋର ବଗର୍ଗରେ ଫିଲ୍ମକୁ ସଫଳତା ମିଳିଛି । ଶ୍ରେଷ୍ଠ ଫିଲ୍ମର ଓସ୍କାର ଯାଇଛି ଫିଲ୍ମ କୋଡାକୁ । ବେଷ୍ଟ୍ ଫିଲ୍ମ କ୍ୟାଟେଗୋରୀରେ ଅନ୍ୟ ୯ଟି ବଡ ଫିଲ୍ମକୁ ପଛରେ ପକାଇ ବାଜି ମାରିଛି କୋଡା ।
ଆମେରିକାର ଏକ ମୁକ ପରିବାରର ସଙ୍ଗୀତ ଯାତ୍ରାକୁ ନେଇ ଗତିଳୀଳ ହୋଇଛି ଫିଲ୍ମର କାହାଣୀ । ଯାହାକୁ ବେଶ୍ ପସନ୍ଦ କରିଛନ୍ତି ଦର୍ଶକ ଓ କ୍ରିଟିକ୍ସ । ଆମେରିକୀୟ ଅଭିନେତା ଓ୍ବିଲ୍ ସ୍ମିଥଙ୍କୁ ମିଳିଛି ଚଳିତ ବର୍ଷର ବେଷ୍ଟ ଆର୍ ଆୱାର୍ଡ । ଚର୍ଚ୍ଚିତ ଫିଲ୍ମ କିଙ୍ଗ ରିଚାର୍ଡରେ ଦମଦାର ଅଭିନୟ ପାଇଁ ତାଙ୍କୁ ପୁରସ୍କୃତ କରାଯାଇଛି । ସେହିପରି ହଲିଉଡ୍ ଫିଲ୍ମ ଦ ଆଇଜ୍ ଅଫ୍ ଟ୍ୟାମି ଫାୟ୍ରେ ନିଖୁଣ ଅଭିନୟ ପାଇଁ ଶ୍ରେଷ୍ଠ ଅଭିନେତ୍ରୀ ଭାବେ ଜେସିକା ଚେଷ୍ଟେନ୍ ପାଇଛନ୍ତି ନିଜର ପ୍ରଥମ ଓସ୍କାର ଆୱାର୍ଡ ।
ଫିଲ୍ମ ଦା ପାୱର ଅଫ୍ ଦ ଡଗ୍ ପାଇଁ ଶ୍ରେଷ୍ଠ ନିର୍ଦ୍ଦେଶକ ପୁରସ୍କାର ଜିତିଛନ୍ତି ଜେନ୍ କାମ୍ପିୟନ୍ । ପୂର୍ବରୁ ୧୯୯୪ରେ ବେଷ୍ଟ ସ୍କ୍ରିନପ୍ଲେର ଓସ୍କାର ଜିତିଥିବା କାମ୍ପିୟନ, ଶ୍ରେଷ୍ଠ ନିର୍ଦ୍ଦେଶକ ଭାବେ ପ୍ରଥମ ଓସ୍କାର ପାଇଛନ୍ତି । ସେହିପରି ଫିଲ୍ମ କୋଡା ପାଇଁ ଟ୍ରୟ କୋତସୁର ଶ୍ରେଷ୍ଠ ସହ ଅଭିନେତା, ୱେଷ୍ଟ ସାଇଡ୍ ଷ୍ଟୋରୀ ପାଇଁ ଏରିୟାନା ଡି ବୋସ୍ ଶ୍ରେଷ୍ଠ ସହ ଅଭିନେତ୍ରୀ ପୁରସ୍କାର ପାଇଛନ୍ତି । ଜାପାନୀ ଫିଲ୍ମ ଡ୍ରାଇଭ୍ ମାଇଁ କାର୍କୁ ମିଳିଛି ଶ୍ରେଷ୍ଠ ଅନ୍ତର୍ଜାତୀୟ ଫିଚର ଫିଲ୍ମର ପୁରସ୍କାର । ଆଉ ବେଷ୍ଟ ଆନିମେଟେଡ୍ ଫିଲ୍ମ ଭାବେ ଏନ୍କାଣ୍ଟୋ ହାତେଇଛି ଓସ୍କାର ଆୱାର୍ଡ ।.
ସେହିପରି ଏଥର ଏକାଡେମୀ ଆୱାର୍ଡସ ଉତ୍ସବରେ କିନ୍ତୁ ଏଭଳି ଏକ ଘଟଣା ଘଟିଛି, ଯାହାକୁ ସ୍ୱପ୍ନରେ ବି କେହି ଭାବିନଥିଲେ । ଓସ୍କାର ମଂଚରେ ସମସ୍ତଙ୍କ ସାମ୍ନାରେ ଫାଇଟ୍ । ଶ୍ରେଷ୍ଠ ଅଭିନେତା ପୁରସ୍କାର ଜିତିଥିବା ୱିଲ୍ ସ୍ମିଥ୍ ଷ୍ଟେଜରେ ଦେଖାଇଛନ୍ତି ସତ ସତିକା ଆକ୍ସନ ।
ଲସ୍ ଏଞ୍ଜେଲସର ଡଲବି ଥିଏଟରରେ ରଙ୍ଗାରଙ୍ଗ ସମାରୋହ, ସେଲିବ୍ରିଟିଙ୍କ ଖଚାଖଚ ଭିଡ । ଦିଆ ଚାଲିଥାଏ ଗୋଟିକ ପରେ ଗୋଟିଏ ଓସ୍କାର୍ ଆୱାର୍ଡ । ସାରା ବିଶ୍ୱର ନଜର ଥାଏ ଏହି ମେଗା ଇଭେଂଟ୍ ଉପରେ । ଓସ୍କାର ମଂଚରୁ ସୋକୁ ହୋଷ୍ଟ କରୁଥାନ୍ତି କମେଡିଆନ୍ କ୍ରିସ୍ ରକ୍ । ହସ ଓ ଥଟ୍ଟାମଜା ଭିତରେ ଚାଲିଥାଏ ଆୱାର୍ଡ ସୋ । ହେଲେ ଏହି ସମୟରେ ଏଭଳି କିଛି ଘଟିଗଲା ଯାହାକୁ କିଏ କେବେ ଆଶା କରିନଥିଲେ । ଓ୍ୱିଲ୍ ସ୍ମିଥଙ୍କୁ ଶ୍ରେଷ୍ଠ ଅଭିନେତାର ପୁରସ୍କାର ଦିଆଯିବା ପୂର୍ବରୁ, ତାଙ୍କ ପତ୍ନୀ ତଥା ଅଭିନେତ୍ରୀ ଜାଡା ପିଙ୍କେଟଙ୍କୁ ନେଇ ପରିହାସ କରିଥିଲେ ସୋର ହୋଷ୍ଟ୍ କ୍ରିସ ରକ୍ । ଜାଡାଙ୍କ ମୁଣ୍ଡର କେଶକୁ ନେଇ ଦେଇଥିଲେ ଅରୁଚିକର ମନ୍ତବ୍ୟ । ବାସ୍, ଦେଖୁ ଦେଖୁ ଷ୍ଟେଜ୍ ଉପରକୁ ଚଢ଼ି ଆସିଥିଲେ ଉତ୍ତେଜିତ ଓ୍ୱିଲ୍ ସ୍ମିଥ୍ ଏବଂ କେହି କିଛି ଭାବିବା ପୂର୍ବରୁ କ୍ରିସଙ୍କୁ ମାରିଥିଲେ ଜୋରଦାର ଚାପୁଡ଼ା । ଅଶ୍ଳିଳ ଶବ୍ଦ ପ୍ରୟୋଗ ସହ କ୍ରିସ୍ ରକ୍ ଯେପରି ଆଉ ଥରୁଟିଏ ବି ଜାଡ଼ାଙ୍କ ନାଁ ମୁହଁରେ ନଧରନ୍ତି ସେଥିପାଇଁ ତାଗିଦ କରିଥିଲେ ।
ସବୁବେଳେ କୁଲ୍ ରହୁଥିବା ଓ୍ୱିଲ୍ ସ୍ମିଥଙ୍କ ଏଭଳି ଆଚରଣକୁ ଦେଖି ସମସ୍ତେ ହତବାକ୍ ହୋଇଯାଇଥିଲେ । ଅବଶ୍ୟ କ୍ରିସ୍ ଘଟଣାକୁ ପୂରା ହାଲକା ଢଙ୍ଗରେ ନେଇ ସୋକୁ ଆଗକୁ ବଢ଼ାଇଥିଲେ । ପରେ ପରେ ଶ୍ରେଷ୍ଠ ଅଭିନେତାର ପୁରସ୍କାର ନେବାକୁ ଘୋଷଣା ହୋଇଥିଲା ସ୍ମିଥଙ୍କ ନାଁ ।
ଏହି ଘଟଣାକୁ ନେଇ ମିଶ୍ର ପ୍ରତିକ୍ରିୟା ପ୍ରକାଶ କରିଛନ୍ତି ଘଟଣାକୁ ଦେଖିଥିବା ଦର୍ଶକ ଓ ସୋସିଆଲ୍ ମିଡିଆ ୟୁଜର୍ । ପ୍ରକୃତରେ ଓ୍ୱିଲ୍ ସ୍ମିଥଙ୍କ ପତ୍ନୀ ଜାଡ଼ା ଏକ ବିରଳ ରୋଗ ଆଲପିସିଆରେ ପୀଡ଼ିତ । ଏଥିରେ ମୁଣ୍ଡର ଚୁଟି ଝଡ଼ିଯାଏ । ଏହି ସମସ୍ୟା ସଂପର୍କରେ ନିଜେ ଜାଡ଼ା ୨୦୧୮ରେ ଘୋଷଣା କରିଥିଲେ । ତେଣୁ ଏକ ସ୍ୱାସ୍ଥ୍ୟ ସମସ୍ୟା ଜନିତ ସ୍ଥିତିକୁ ନେଇ ଓସ୍କାର ମଞ୍ଚରେ ବ୍ୟଙ୍ଗ କରିବା ଠିକ୍ ହୋଇନାହିଁ ବୋଲି ଅନେକେ କହୁଥିବା ବେଳେ, ଓ୍ୱିଲ୍ ସ୍ମିଥ୍ ମଧ୍ୟ ଏଭଳି ଢଙ୍ଗରେ ଆକ୍ରମଣ କରିବା ଅନୁଚିତ ଥିଲା ବୋଲି ମତ ପ୍ରକାଶ ପାଇଛି ।
ସେପଟେ ଘଟଣା ପାଇଁ ପରେ ଦୁଃଖ ପ୍ରକାଶ କରିଥିଲେ ସ୍ମିଥ୍ । ଏକାଡେମୀ ଏବଂ ସାଥୀ ନୋମିନୀଙ୍କୁ କ୍ଷମା ବି ମାଗିଥିଲେ । ଏପରିକି ଶ୍ରେଷ୍ଠ ଅଭିନେତା ସମ୍ମାନକୁ ଫେରାଇ ଦେବା ପାଇଁ ଇଚ୍ଛା ପ୍ରକାଶ କରିଥିଲେ ସ୍ମିଥ୍ । ଅନ୍ୟ ପକ୍ଷରେ ଓସ୍କାର ପକ୍ଷରୁ ମଧ୍ୟ ଟୁଇଟ୍ କରାଯାଇଛି ଯେ, ଏକାଡେମି କୌଣସି ପ୍ରକାର ହିଂସାକୁ ସମର୍ଥନ କରେନାହିଁ ।
ଏଥର ଏକାଡେମୀ ଆୱାର୍ଡସ ଉତ୍ସବକୁ ନେଇ ସମସ୍ତଙ୍କ ମଧ୍ୟରେ ଉତ୍ସୁକତା ଥିବା ବେଳେ ଓସ୍କାର ମଂଚରେ ଘଟିଯାଇଛି ଇତିହାସରେ କେବେ ଘଟିନଥିବା ଘଟଣା ।