ଏହି ସ୍କୁଲ୍‌ରେ ଅଜବ ନିୟମ; ପିଲା ଅନୁପସ୍ଥିତ ରହିଲେ ବାପାମାଆଙ୍କୁ ଜେଲ୍ !

ଥରେ ନିଜ ସ୍କୁଲ ଦିନ କଥା ଭାବିଲେ! ଯେଉଁ ଦିନ ସ୍କୁଲକୁ ଯାଇ ନଥିବ, ପରଦିନ ଗଲେ ଶିକ୍ଷକମାନଙ୍କ ମାଡ-ଗାଳି ସହିବା ନିଶ୍ଚିତ। ଆପଣଙ୍କୁ ଛୁଟି ଦରଖାସ୍ତ ଲେଖିବାକୁ କୁହାଯିବ। ପିଲାମାନେ ଯଦି ଦୀର୍ଘ ଦିନ ଧରି ସ୍କୁଲକୁ ନ ଆସିଲେ ଅଭିଭାବକଙ୍କୁ ଡକାଯାଏ। କିନ୍ତୁ ଆମେ ଏମିତି ଏକ ସ୍କୁଲର କଥା କହିବୁ ଯେଉଠି ସ୍କୁଲକୁ ନ ଆସିବାର ଦଣ୍ଡ ସାଙ୍ଘାତିକ ହୋଇଥାଏ।

ଏକ ରିପୋର୍ଟ ଅନୁଯାୟୀ ଏହି ସ୍କୁଲ ରହିଛି ସାଉଦି ଆରବରେ। ଏଠାରେ ୨୦ ଦିନ ସ୍କୁଲ୍‌ରେ ଅନୁପସ୍ଥିତ ରହିଲେ ବାବାମାଆଙ୍କୁ କୋର୍ଟରେ ହାଜର ହେବାକୁ ପଡେ। ଛୁଟି ପାଇଁ ଯଦି କୌଣସି ବୈଧ କାରଣ ନ ମିଳେ, ତେବେ ବାପାମାଆଙ୍କୁ ଜେଲ୍ ମଧ୍ୟ ହୋଇପାରେ। ଏହା ଶୁଣି ଯଦି ଆଶ୍ଚର୍ଯ୍ୟ ଲାଗୁଛି ତେବେ ନିମ୍ନରେ ଦିଆଯାଇଥିବା ତଥ୍ୟ ଉପରେ ନଜର ପକାନ୍ତୁ।

ଅଭିଭାବକଙ୍କୁ ମିଳେ ୩ ଚେତାବନୀ:

ସାଉଦି ଆରବର ଏହି ବିଚିତ୍ର ନିୟମ ଅନୁଯାୟୀ, ଯଦି ଜଣେ ଛାତ୍ର ୩ ଦିନ ଛୁଟି ନିଏ ତେବେ ପ୍ରାରମ୍ଭିକ ଚେତାବନୀ ଦିଆଯାଏ। ଯଦି ଛାତ୍ର ତଥାପି ସ୍କୁଲ୍‌କୁ ନ ଆସେ ଏବଂ ଲଗାତାର ୫ ଦିନ ଅନୁପସ୍ଥିତ ରହେ, ତେବେ ଦ୍ୱିତୀୟ ଚେତାବନୀ ଦିଆଯାଏ। ଅଭିଭାବକମାନଙ୍କୁ ମଧ୍ୟ ଏ ବିଷୟରେ ଅବଗତ କରାଯାଏ। ଏଥି ସହିତ, ୧୦ ଦିନ ଅନୁପସ୍ଥିତ ରହିବା ପରେ, ତୃତୀୟ ଚେତାବନୀ ଦିଆଯାଏ ଏବଂ ଅଭିଭାବକଙ୍କୁ ବିଦ୍ୟାଳୟକୁ ଡକାଯାଏ।

୨୦ ଦିନ ଅନୁପସ୍ଥିତ ରହିଲେ:

୧୫ ଦିନ ଧରି ସ୍କୁଲ୍‌ରୁ ନିରନ୍ତର ଅନୁପସ୍ଥିତ ରହିଲେ ଛାତ୍ରଙ୍କୁ ଶିକ୍ଷା ବିଭାଗ ମାଧ୍ୟମରେ ଅନ୍ୟ ସ୍କୁଲ୍‌କୁ ସ୍ଥାନାନ୍ତର କରିଦିଆଯାଏ। କିନ୍ତୁ ଏହା ପରେ ମଧ୍ୟ ଯଦି ଛାତ୍ର କୌଣସି ସ୍ପଷ୍ଟ କାରଣ ବିନା ୨୦ ଦିନ ସ୍କୁଲ୍‌କୁ ନ ଆସନ୍ତି, ତେବେ ଶିକ୍ଷା ବିଭାଗ ଏହା ଉପରେ ଶିଶୁ ସୁରକ୍ଷା ଆଇନ ବ୍ୟବସ୍ଥା ଲାଗୁ କରେ। ଏଭଳି ପରିସ୍ଥିତିରେ ସ୍କୁଲରେ ଅନୁପସ୍ଥିତ ଥିବା ଛାତ୍ରର ବାପାମାଆଙ୍କୁ ଜେଲକୁ ମଧ୍ୟ ପଠାଯାଇପାରେ।