ଦଶମ ଶ୍ରେଣୀର ଭୂଗୋଳ ବହିରେ ତ୍ରୁଟି । ଏମିତି ଭୁଲ୍ ଯାହା ଓଡ଼ିଶା ଆନ୍ଧ୍ର ବିବାଦକୁ ଆଉ ଟିକେ ଖୋରାକ ଯୋଗାଇଛି । ଏହି ଭୁଲ୍ ଖୋଦ ମାଧ୍ୟମିକ ଶିକ୍ଷା ପରିଷଦ ଦ୍ୱାରା ପ୍ରକାଶିତ ଦଶମ ଶ୍ରେଣୀର ଭୂଗୋଳ ବହିରେ ହୋଇଥିବାର ଦେଖିବାକୁ ମିଳିଛି ।
ମାଛକୁଣ୍ଡ ଜଳପ୍ରପାତ ଓଡ଼ିଶାରେ ନୁହେଁ ବରଂ ଆନ୍ଧ୍ର ପ୍ରଦେଶର ବୋଲି ପୁସ୍ତକରେ ପ୍ରକାଶ ପାଇଛି । ୨୦୧୮ରେ ପ୍ରକାଶିତ ପୁସ୍ତକରେ ଏହି ତ୍ରୁଟି ହୋଇଥିଲେ ମଧ୍ୟ ଚଳିତ ବର୍ଷ ବି ଏଥିରେ ସଂଶୋଧନ ହୋଇନାହିଁ । ଫଳରେ ଏହାକୁ ନେଇ ଛାତ୍ରଛାତ୍ରୀ, ଅଭିଭାବକ ଓ ଶିକ୍ଷକ ମହଲରେ ଅସନ୍ତୋଷ ବୃଦ୍ଧି ପାଇଛି ।
Also Read
ପରିତାପର ବିଷୟ ଯେ, ଦୀର୍ଘ ୪ ବର୍ଷ ହେଲା ପିଲା ଓଡ଼ିଶାର ଭୌଗାଳିକ ସ୍ଥିତି ସମ୍ପର୍କରେ ଭୁଲ୍ ତଥ୍ୟ ପଢ଼ି ଆସୁଛନ୍ତି । ଏହି ଭୁଲ୍ କିନ୍ତୁ ଧରିଛନ୍ତି ଖୋଦ କୋରାପୁଟ ବ୍ଲକର ମହାଦେଇପୁଟ ଉଚ୍ଚ ବିଦ୍ୟାଳୟର ଭୂଗୋଳ ଶିକ୍ଷକ । ସେ ସଂଶୋଧିତ କରି ପିଲାଙ୍କୁ ପାଠ ପଢ଼ାଉଥିବା ବେଳେ ଏ ସଂକ୍ରାନ୍ତରେ ପ୍ରଧାନ ଶିକ୍ଷକ ଏବଂ ବିଭାଗୀୟ କତ୍ତୃପକ୍ଷଙ୍କୁ ଅବଗତ କରାଇଛନ୍ତି ।
ଭୂଗୋଳ ବହିର ପୃଷ୍ଠା ନମ୍ବର ୬୯ର ସାରଣୀ ୧୬ରେ ମାଛକୁଣ୍ଡ ଆନ୍ଧ୍ରପ୍ରଦେଶର ବୋଲି ଉଲ୍ଲେଖ କରାଯାଇଛି । କୋରାପୁଟ ଜିଲାର ଲମତପୁଟ ବ୍ଲକ ଆନ୍ଧ୍ର ସୀମାନ୍ତରେ ରହିଛି । ମାଛକୁଣ୍ଡ ଜଳବିଦ୍ୟୁତ ପ୍ରକଳ୍ପ ୧୯୫୫ ମସିହାରେ ଦେଶର ପ୍ରଥମ ରାଷ୍ଟ୍ରପତି ରାଜେନ୍ଦ୍ର ପ୍ରସାଦ ପ୍ରକଳ୍ପର ଉଦଘାଟନ କରିଥିଲେ । ଏବେବି ରକ୍ଷଣାବେକ୍ଷଣ ଦାୟିତ୍ୱ ଓଡିଶା ସରକାରଙ୍କର, କିନ୍ତୁ ଜଳ ବିଦ୍ୟୁତ ଶକ୍ତିକୁ ଆନ୍ଧ୍ର ଓ ଓଡିଶା ମଧ୍ୟରେ ୫୦/ ୫୦ ପ୍ରତିଶତ ଭାଗ ବଣ୍ଟା ଯାଉଛି । ପରିଚାଳନା ଆନ୍ଧ୍ରପ୍ରଦେଶ କରୁଛି ଯାହା ଫଳରେ ଓଡିଶା ଏବଂ ଓଡିଆ ମାନଙ୍କର ସ୍ୱାର୍ଥ ରକ୍ଷା ଠିକ୍ ଭାବରେ ହୋଇପାରୁନି ବୋଲି ଚର୍ଚ୍ଚା ଜୋର ଧରିଛି ।
ରିପୋର୍ଟର- ସୂର୍ଯ୍ୟନାରାୟଣ ପଣ୍ତା,କୋରାପୁଟ