କମିଶନରେଟ୍ ପୋଲିସ୍ କବ୍ଜାରେ ଲେଡି ବ୍ଲାକ୍ମେଲର୍। ଜଣେ ମହିଳା ବ୍ଲାକ୍ମେଲର୍ଙ୍କୁ କମିଶନରେଟ୍ ପୋଲିସ୍ ଗିରଫ କରିଥିବା ସୂଚନା ମିଳିଛି। ଗିରଫ ପରେ ତାଙ୍କୁ କୋର୍ଟ ଚାଲାଣ କରାଯାଇଛି। ସମ୍ପୃକ୍ତ ମହିଳା ଜଣକ ନେତା ଓ ସିନେ ପ୍ରଯୋଜକଙ୍କୁ ବ୍ଲାକ୍ମେଲ୍ କରି ଟଙ୍କା ହଡ଼ପ କରୁଥିବା ସୂଚନା ମିଳିଛି। ତାଙ୍କ ଠାରୁ ୨ଟି ପେନ୍ଡ୍ରାଇଭ୍ ଓ ୨ଟି ମୋବାଇଲ୍ ଜବତ ହୋଇଥିବା ଜଣାପଡ଼ିଛି। ଏଥିରେ କିଛି ଭିଡିଓ, ଫଟୋ ଥିବା ଅନୁମାନ କରାଯାଉଛି। ଉକ୍ତ ମହିଳାଙ୍କୁ ଗିରଫ ନେଇ ଖବର ଲେଖାଯିବା ସୁଦ୍ଧା ଏ ସମ୍ପର୍କରେ ପୋଲିସ୍ କୌଣସି ସୂଚନା ଦେଇ ନାହିଁ।
ଗିରଫ ମହିଳା ଜଣକ ବ୍ଲାକ୍ମେଲିଂ କଳା ଟଙ୍କାରେ ଅୟସ କରୁଥିବା କୁହାଯାଉଛି। ଆଲିସାନ୍ ବଙ୍ଗଳାରେ ରହିବା ସହ ଦାମୀ ଗାଡ଼ି ଓ ସୌଖୀନ ଆସବାବପତ୍ର ରଖିଥିଲେ। BMW, ଟୟୋଟା ଫର୍ଚୁନର, ସୁଜୁକି ସ୍ୱିଫ୍ଟ, ହାର୍ଲି ଡେଭିଡସନ ବାଇକ୍, ମହିନ୍ଦ୍ରା ଏସୟୁଭି ଗାଡ଼ି ଚଢୁଥିଲେ ଲେଡି ବ୍ଲାକ୍ମେଲର୍। ଏପରିକି ଭୁବନେଶ୍ୱର ମର୍ଯ୍ୟାଦା ସମ୍ପନ୍ନ ସ୍ଥାନରେ କରିଥିବା ନିଜ ଘରକୁ ସେ ଫିଲ୍ମ ଓ ସିରିଏଲ୍ ସୁଟିଂ ପାଇଁ ବ୍ୟବହାର କରୁଥିଲେ ବୋଲି ଜଣାପଡ଼ିଛି।
ସୂଚନାଥାଉ କି, କିଛି ଦିନ ପୂର୍ବେ ସମ୍ପୃକ୍ତ ମହିଳାଙ୍କ ବିରୋଧରେ ଜଣେ ସିନେ ପ୍ରଯୋଜକ ବ୍ଲାକ୍ମେଲ କରୁଥିବା ଅଭିଯୋଗ ଆଣିଥିଲେ। ପୂର୍ବରୁ କିଛି ନେତା ଓ ପ୍ରଯୋଜକଙ୍କୁ ମହିଳା ଜଣକ ବ୍ଲାକ୍ମେଲ କରୁଥିବା ଅଭିଯୋଗ ହୋଇଥିଲା। ତେବେ ପୋଲିସ୍ ଏହି ଘଟଣାର ତଦନ୍ତ କରୁଥିବାବେଳେ ଖବର ଲେଖାଯିବା ସୁଦ୍ଧା ମହିଳାଙ୍କୁ ଗିରଫ ନେଇ କିଛି ସ୍ପଷ୍ଟ ସୂଚନା ଦିଆଯାଇ ନାହିଁ।