ମୂଷା ମାରିବା ମହଙ୍ଗା ପଡ଼ିଲା; ମିଳିପାରେ ଜେଲ୍ ଦଣ୍ଡ !

ଉତ୍ତରପ୍ରଦେଶ ପୋଲିସ ବୁଡାଉନ୍ ଜିଲ୍ଲାର ସଦର କୋଟୱାଲୀ ଅଞ୍ଚଳରେ ଏକ ମୂଷାକୁ ଇଟାରେ ବାନ୍ଧି ଡ୍ରେନ୍‌ରେ ବୁଡେଇ ମାରିବା ଅଭିଯୋଗରେ ଜଣେ ୩୦ ବର୍ଷ ବୟସ୍କା ବ୍ୟକ୍ତିଙ୍କ ବିରୋଧରେ କୋର୍ଟରେ ଏକ ଚାର୍ଜସିଟ୍ ଦାଖଲ କରିଛି। ମଙ୍ଗଳବାର ଦିନ ଜଣେ ପୋଲିସ ଅଧିକାରୀ ଏନେଇ ସୂଚନା ଦେଇଛନ୍ତି। ପୋଲିସ ସୂଚନାନୁସାରେ, 'ମୂଷା ହତ୍ୟା' ମାମଲାରେ ଅଭିଯୁକ୍ତଙ୍କ ବିରୋଧରେ ୩୦ ପୃଷ୍ଠାର ଏକ ଚାର୍ଜସିଟ୍ କୋର୍ଟରେ ଦାଖଲ କରାଯାଇଛି।

ସିଟି ସର୍କଲ ଅଫିସର ପୋଲିସ (ସିଓ) ଆଲୋକ ମିଶ୍ର ମଙ୍ଗଳବାର କହିଛନ୍ତି ଯେ "ମୂଷା ହତ୍ୟା ମାମଲାରେ ବୁଡାଉନ୍ ମୁଖ୍ୟ ଜୁଡିସିଆଲ ମାଜିଷ୍ଟ୍ରେଟ୍‌ (ସିଜେଏମ୍‌) ଙ୍କ କୋର୍ଟରେ ଚାର୍ଜସିଟ୍‌ ଦାଖଲ କରାଯାଇଛି।" ପୋଷ୍ଟମର୍ଟମ ରିପୋର୍ଟ, ଗଣମାଧ୍ୟମରେ ପ୍ରକାଶିତ ଭିଡିଓ, ସମ୍ପୃକ୍ତ ବିଭିନ୍ନ ବିଭାଗର ବିଶେଷଜ୍ଞଙ୍କ ମତାମତ ମଧ୍ୟ ଚାର୍ଜସିଟ୍‌ରେ ସାମିଲ୍ କରାଯାଇଛି।”

ପୋଲିସ ସୂତ୍ରରୁ ପ୍ରକାଶ ଯେ ଚାର୍ଜସିଟ୍‌କୁ ମଜବୁତ କରିବା ପାଇଁ ପୋଷ୍ଟମର୍ଟମ ରିପୋର୍ଟକୁ ଆଧାର କରାଯାଇଛି, ଯେଉଁଥିରେ ସ୍ପଷ୍ଟ କରାଯାଇଛି ଯେ ମୂଷାର ଫୁସ୍‌ଫୁସ୍‌ କ୍ଷତିଗ୍ରସ୍ତ ହୋଇଛି, ତାହା ମଧ୍ୟ ଫୁଲିଯାଇଛି, ଲିଭର୍‌ରେ ମଧ୍ୟ ସଂକ୍ରମଣ ହୋଇଛି। ସେହିପରି, ମୂଷାଙ୍କର ମାଇକ୍ରୋସ୍କୋପିକ୍ ପରୀକ୍ଷଣରେ ଏହା ସ୍ପଷ୍ଟ ହୋଇଛି ଯେ ପାଣିରେ ବୁଡ଼ିଯିବା କାରଣରୁ ମୂଷାର ଶ୍ୱାସରୁଦ୍ଧ ହୋଇ ମୃତ୍ୟୁହୋଇଛି।

ସଦର କୋଟୱାଲୀ ଅଞ୍ଚଳରେ ୨୫ ନଭେମ୍ବର ୨୦୨୨ରେ ଜଣେ ଯୁବକ ମୂଷାଟିକୁ ବୁଡେଇ ହତ୍ୟା କରିଥିବା ଅଭିଯୋଗରେ ପୋଲିସ ନିକଟରେ ଅଭିଯୋଗ ହୋଇଥିଲା। ପରେ ପୋଲିସ ଅଭିଯୁକ୍ତ ମନୋଜ କୁମାରଙ୍କ ବିରୋଧରେ ପ୍ରିଭେନ୍‌ସନ୍ ଅଫ୍ କ୍ରୁଏଲିଟି ଟୁ ଆନିମଲ୍ସ ଆକ୍ଟ ଏବଂ ଭାରତୀୟ ଦଣ୍ଡ ସଂହିତା (ଆଇପିସି) ର ଧାରା ୪୨୯ (ଯେକୌଣସି ଜୀବଜନ୍ତୁଙ୍କୁ ହତ୍ୟା) ଅଧୀନରେ ଏକ ଏଫ୍‌ଆଇଆର୍‌ ଜାରି କରି ​​ତାଙ୍କୁ ପୋଲିସ ଷ୍ଟେସନ୍‌ରୁ ହିଁ ଜାମିନ ପ୍ରଦାନ କରିଛି।

କୁମ୍ଭକାର ମନୋଜ କୁମାର ଗତ ବର୍ଷ ନଭେମ୍ବର ୨୫ରେ ଜିଲ୍ଲାର ବିଦ୍ୟୁତ୍ ସବ୍ ଷ୍ଟେସନ୍ ନିକଟରେ ମୂଷା ଲାଞ୍ଜରେ ଏକ ଇଟା ବାନ୍ଧିବା ପରେ ଡ୍ରେନ୍ ଭିତରକୁ ଫିଙ୍ଗିଥିବାର ବୁଡାଉନ୍‌ର ପଶୁପ୍ରେମୀ ବିକେନ୍ଦ୍ର ଶର୍ମା ଦେଖିଥିଲେ। ଏହି ଘଟଣାରେ ବିକେନ୍ଦ୍ର ପଶୁ କ୍ରୁରତା ଅଧିନିୟମ ଅନୁଯାୟୀ ଏକ ରିପୋର୍ଟ ଦାଖଲ କରିଥିଲେ ଯାହା ଆଧାରରେ ଏହି ମାମଲା ରୁଜୁ ହୋଇଥିଲା। ସଦର କୋଟୱାଲୀ ପୋଲିସ ମୃତ ମୂଷାକୁ ସିଲ୍ କରି ଫୋରେନ୍‌ସିକ୍ ଯାଞ୍ଚ୍‌ ପାଇଁ ବରେଲିର ଭାରତୀୟ ପ୍ରାଣୀ ଚିକିତ୍ସା ପ୍ରତିଷ୍ଠାନ (IVRI) କୁ ପଠାଇଥିଲା।

ବରେଲିସ୍ଥିତ IVRIର ଯୁଗ୍ମ ନିର୍ଦ୍ଦେଶକ(ଜେଡି) କେପି ସିଂହ ୧ ଡିସେମ୍ବର ୨୦୨୨ ରେ କହିଥିଲେ, “ଦୁଇ ପ୍ରାଣୀ ଚିକିତ୍ସକଙ୍କ ଏକ ଟିମ୍ ଦ୍ୱାରା ଏହି ମୂଷାର ଫୋରେନସିକ୍ ପରୀକ୍ଷା କରାଯାଇଥିଲା। ଅନୁସନ୍ଧାନରେ, ମୂଷାର ଫୁସଫୁସ ଫୁଲିଯାଥିବା ଦେଖିବାକୁ ମିଳିଥିଲା। ବିଶେଷଜ୍ଞଙ୍କ ମତରେ “ଫୁସ୍‌ଫୁସ୍‌ ସଂକ୍ରମଣ ଏବଂ ନିଶ୍ୱାସ ପ୍ରଶ୍ୱାସରେ ବାଧା ହେତୁ ଏହି ମୂଷାଟିର ମୃତ୍ୟୁ ହୋଇଥିଲା।”

ବରିଷ୍ଠ ଆଡଭୋକେଟ୍ ରାଜୀବ କୁମାର ଶର୍ମା ମଙ୍ଗଳବାର କହିଛନ୍ତି ଯେ ପଶୁ କ୍ରୁରତା ଆଇନ ମାମଲାରେ ୧୦ ରୁ ୨୦୦୦ ଟଙ୍କା ପର୍ଯ୍ୟନ୍ତ ଜରିମାନା ଏବଂ ତିନି ବର୍ଷ ଜେଲଦଣ୍ଡ ଏବଂ ଧାରା ୪୨୯ ଅନୁଯାୟୀ ଉଭୟ ଦଣ୍ଡ ଏବଂ ଜରିମାନା ବ୍ୟବସ୍ଥା ରହିଛି। ଏହି ମାମଲାରେ ଅଭିଯୁକ୍ତ ମନୋଜଙ୍କ ବାପା ମଥୁରା ପ୍ରସାଦ କହିଛନ୍ତି, “ମୂଷା କିମ୍ବା କାଉ ମାରିବା ଭୁଲ ନୁହେଁ। ଏଗୁଡ଼ିକ କ୍ଷତିକାରକ ପ୍ରାଣୀ।”

ପ୍ରସାଦ ଯୁକ୍ତି କରିଛନ୍ତି ଯେ “ତାଙ୍କ ପରିବାର ଦ୍ୱାରା ପ୍ରସ୍ତୁତ ହୋଇଥିବା କଞ୍ଚା ମାଟିପାତ୍ରଗୁଡିକୁ ମୂଷାମାନେ କାଟିକୁଟି କାଦୁଅରେ ପରିଣତ କରି ଆର୍ଥିକ ତଥା ମାନସିକ କ୍ଷତି ଘଟାଉଛନ୍ତି। ଯଦି ଏହି ଘଟଣାରେ ମୋ ପୁଅକୁ ଦଣ୍ଡ ମିଳୁଛି ତେବେ ସେମାନଙ୍କ ଉପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ ଯେଉଁମାନେ କୁକୁଡ଼ା, ଛେଳି ଏବଂ ମାଛମାନଙ୍କୁ କାଟୁଛନ୍ତି। ଯେଉଁମାନେ ମୂଷା ମାରିବା ଔଷଧ ବିକ୍ରି କରୁଛନ୍ତି ସେମାନଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ।”