ଦଣ୍ଡଯାତ୍ରା ବେଳେ ଗୋଷ୍ଠୀ ସଂଘର୍ଷ। ପରସ୍ପର ମଧ୍ୟରେ ଆକ୍ରମଣରେ ଜଣଙ୍କର ମୃତ୍ୟୁ ହୋଇ ଥିବାବେଳେ ୧୦ରୁ ଅଧିକ ଆହତ ହୋଇଛନ୍ତି। ନୟାଗଡ଼ରେ ଦଣ୍ଡଯାତ୍ରା ବେଳେ ଏହି ଗୋଷ୍ଠୀ ସଂଘର୍ଷ ଘଟିଛି। ମୃତକ ହେଲେ ଦୁର୍ଗାପ୍ରସାଦ ଗାଁର ନବୀନ ପରିଡ଼ା।
ସୂଚନା ଅନୁସାରେ, ଗତକାଲି ରାତିରେ ଦୁର୍ଗା ପ୍ରସାଦ, ଦେଉଳପଲ୍ଲୀ ଓ ସିନ୍ଦୁରିଆ ଗାଁର ଦଣ୍ଡ ଠାକୁର ନୟାଗଡ଼ ସହର ପରିକ୍ରମା କରି ସିନ୍ଦୁରିଆ ଶିବ ମନ୍ଦିରରେ ପହଞ୍ଚିଥିଲା। ସେଠାରେ ସାମାନ୍ୟ ବଚସାକୁ କେନ୍ଦ୍ରକରି ଦେଉଳପଲ୍ଲୀ ଓ ସିନ୍ଦୁରିଆ ଗାଁ ଲୋକ ମୁହାଁମୁହିଁ ହୋଇଥିଲେ।
ଦେଉଳପଲ୍ଲୀ ଗାଁର କିଛି ଯୁବକ ଦୁର୍ଗା ପ୍ରସାଦ ଗାଁର ନବୀନ ପରିଡ଼ାଙ୍କୁ ଅପହରଣ କରି ନେଇ ଧାରୁଆ ଅସ୍ତ୍ରରେ ହତ୍ୟା କରିଥିବା ଅଭିଯୋଗ ହୋଇଛି। ସ୍ଥିତି ନିୟନ୍ତ୍ରଣ କରିବାକୁ ଯାଇ ଟାଉନ ଥାନା ଆଇଆଇସି ପ୍ରଜ୍ଞା ପରମିତା ଜେନାଙ୍କ ସମେତ ୪ ଜଣ ପୋଲିସ କର୍ମଚାରୀ ଆହତ ହୋଇଛନ୍ତି।
ଦେଉଳ ପଲ୍ଲୀ ଗାଁ ନିକଟ ନେଳିଆ ପୋଖରୀ ରାସ୍ତାକଡ଼ରୁ ନବୀନ ପରିଡ଼ାଙ୍କ ମୃତଦେହ ପୋଲିସ୍ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ହତ୍ୟାକାଣ୍ଡ ପରେ ଦୁର୍ଗା ପ୍ରସାଦ ଓ ଦେଉଳପଲ୍ଲୀ ଗାଁରେ ଉତ୍ତେଜନା ଲାଗି ରହିଥିବାରୁ ୨ ଗାଁରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି।