Murder: ଶ୍ୱଶୁର ଘରେ ଜ୍ୱାଇଁଙ୍କୁ ପିଟି ପିଟି ହତ୍ୟା...

ଚାଞ୍ଚଲ୍ୟ ! ଶ୍ୱଶୁର ଘରେ ଜ୍ୱାଇଁଙ୍କୁ ହତ୍ୟା । ଅମାନୁଷିକ ଭାବେ ପିଟି ପିଟି ମାରିଦେଲେ ଜ୍ୱାଇଁଙ୍କୁ । ଶ୍ୱଶୁରଙ୍କ ମୃତ୍ୟୁ ଖବର ଶୁଣି ଧାଇଁ ଆସିଥିବା ବେଳେ ଜ୍ୱାଇଁଙ୍କୁ ହତ୍ୟା କରିଛନ୍ତି ଶ୍ୱଶୁର ଘରର ପରିବାର ଲୋକ । ବାଲେଶ୍ୱର ଜିଲ୍ଲା ସୋର ଥାନା ଗୋପୀନାଥପୁର ଗାଁରେ ଘଟିଛି ଏଭଳି ଚାଞ୍ଚଲ୍ୟକର ହତ୍ୟାକାଣ୍ଡ । ମୃତ ଜ୍ୱାଇଁ ଭଦ୍ରକ ସାବରଙ୍ଗ ଥାନା ଚକପୁର ଗାଁର ଭାଗବତ ମଳିକ । 

ଯାହା ସୂଚନା ମିଳିଛି, ୩ ଦିନ ତଳେ ଭାଗବତଙ୍କ ଶ୍ୱଶୁର ଶ୍ୟାମସୁନ୍ଦରଙ୍କ ମୃତ୍ୟୁ ହୋଇଥିଲା । ଏହି ଖବର ଶୁଣି ସେ ଶ୍ୱଶୁର ଘରକୁ ଆସିଥିଲେ । ସେଠି କୌଣସି କଥାକୁ ନେଇ ଶ୍ୟାମସୁନ୍ଦରଙ୍କ ପୁତୁରା ରାଜା ସହ ଭାଗବତଙ୍କର ଝଗଡା ହୋଇଥିଲା l ପରେ ରାଜା ଓ ତାଙ୍କର ତିନି ଜଣ ସହଯୋଗୀ ମିଶି ଭାଗବତଙ୍କୁ ନିସ୍ତୁକ ମାଡ ମାରିବା ସହ ମାରଣାସ୍ତ୍ରରେ ଆକ୍ରମଣ କରିଥିଲେ l 

ଅଧିକ ପଢ଼ନ୍ତୁ: ରିଲ୍ସ ହେଲା କାଳ, ଲାଇକ୍ ମିଳିବା ଆଗରୁ ଚାଲିଗଲା ଜୀବନ

ଗୁରୁତର ଅବସ୍ଥାରେ ଭାଗବତ ଶ୍ୱଶୁର ଘରୁ ଲୁଚିକି ଆସି ଏକ ମନ୍ଦିରରେ ରହିଥିଲେ । ରାତିସାରା ମନ୍ଦିର ବାରଣ୍ଡାରେ ପଡିରହିବା ପରେ ଗାଁର କିଛି ଲୋକେ ତାଙ୍କୁ ଉଦ୍ଧାର କରି ମେଡିକାଲ ନେଇଥିଲେ। ହେଲେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଯାଇଥିଲା । ଖବର ପାଇ ସୋର ପୋଲିସ ଡାକ୍ତରଖାନାରେ ପହଞ୍ଚିବା ସହ ଘଟଣାର ତଦନ୍ତ ଆରମ୍ଭ କରିଛି ।