ବିଜେବି ଛାତ୍ରଙ୍କୁ ମାଡ଼ ଘଟଣା : ୪ ଅଣଛାତ୍ର ଗିରଫ

କଲେଜ୍‌ ପରିସରରେ ଆତଙ୍କରାଜ ଘଟାଇ ଶେଷରେ ବନ୍ଧାହେଲେ ।

ଗିରଫ ସମସ୍ତ ଅଣଛାତ୍ର ମହିଷାଖାଲ ବସ୍ତି ଅଞ୍ଚଳର ସୂଚନା

ବିଜେବି କଲେଜ କ୍ୟାମ୍ପସରେ ଆତଙ୍କରାଜ ଘଟଣାରେ ୪ ଅଭିଯୁକ୍ତଙ୍କୁ ଗିରଫ କଲା କମିଶନରେଟ ପୋଲିସ । ୪ ଅଭିଯୁକ୍ତ ଅଣଛାତ୍ର ହୋଇଥିବା ବେଳେ ସମସ୍ତେ ମହିଷାଖାଲ ବସ୍ତି ଅଞ୍ଚଳର ବୋଲି ସୂଚନା ମିଳିଛି । ଅଭିଯୁକ୍ତମାନେ ସବୁଦିନ କ୍ୟାମ୍ପସ ଭିତରେ କ୍ରିକେଟ୍ ଖେଳନ୍ତି । ସେମାନଙ୍କ ଠାରୁ ଆକ୍ରମଣରେ ବ୍ୟବହୃତ କ୍ରିକେଟ ଷ୍ଟମ୍ପ,ଛୁରୀ,ଗୋଟିଏ ବାଇକ ଜବତ କରିଛି ପୋଲିସ୍ ।

ପୋଲିସ୍ ସୂଚନା ଅନୁସାରେ ୨ଜଣଙ୍କ ନାଁରେ ଏକାଧିକ ଅପରାଧିକ ମାମଲା ରହିଛି। ଗିରଫ ପରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ପୋଲିସ । ଅନ୍ୟପଟେ ଏ ଘଟଣାରେ ପ୍ରତିକ୍ରିୟା ରଖି କଲେଜ ପ୍ରିନ୍ସିପାଲ କହିଛନ୍ତି, ବିଜେବି କଲେଜ୍ ଖେଳପଡ଼ିଆ ସମସ୍ତଙ୍କ ପାଇଁ ଖୋଲାରୁହେ, ଏଭଳି ଅଘଟଣ ଏଡାଇବା ପାଇଁ ଆଗାମୀ ଦିନରେ ପଦକ୍ଷେପ ନିଆଯିବ।....ଅନ୍ୟପଟେ ଏହି ଘଟଣା ପରେ ଆସନ୍ତାକାଲି   ବସିବ ଉଚ୍ଚସ୍ତରୀୟ ବୈଠକ ।  

ସୂଚନାଯୋଗ୍ୟ ଗତକାଲି ଅଣଛାତ୍ରମାନେ କ‌ଲେଜ କ୍ରିକେଟ ପଡ଼ିଆକୁ ଧସେଇ ପଶି ଖେଳୁଥିବା ଛାତ୍ରମାନଙ୍କୁ ଖଣ୍ଡାରେ ହାଣିବା ସହ ବ୍ୟାଟ୍‌ରେ ବାଡ଼େଇଥିଲେ । ଖଣ୍ଡା ଚୋଟରେ ଜଣେ ଛାତ୍ର ଗୁରୁତର ହୋଇଥିଲେ ଓ ବ୍ୟାଟ୍‌ ମାଡ଼ରେ ୨ ଜଣ ଛାତ୍ର ଗୁରୁତର ହୋଇ ପଡ଼ିଥିଲେ । ତିନି ଆହତ ଛାତ୍ରଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା ।