Witchcraft Murder: ଗୁଣିଗାରେଡି ସନ୍ଦେହରେ ପରିବାରର ୫ ଜଣଙ୍କୁ ଜୀଅନ୍ତା ଜାଳିଦେଲେ

ଅନ୍ଧବିଶ୍ୱାସ ଯୋଗୁ ଗୋଟିଏ ପରିବାରର ୫ଜଣଙ୍କ ଜୀବନ ଗଲା । ଏଭଳି ଅଭାବନୀୟ ଘଟଣା ଘଟିଛି ବିହାରର ପୂର୍ଣ୍ଣିଆ ଜିଲ୍ଲାରେ । ପରିବାରର ୫ ସଦସ୍ୟଙ୍କୁ ଜୀବନ୍ତ ଜାଳି ଦିଆଯାଇଥିବା ଅଭିଯୋଗ ହୋଇଛି । ଗତ ରବିବାର( ୬ ଜୁଲାଇ) ଦିନ ମୁଫସିଲ ଥାନା ଅଞ୍ଚଳର ଟେଟଗାମା ଗାଁରେ ଏଭଳି ସ୍ପର୍ଶକାତର ଘଟଣା ଘଟିଛି । ଏହି ମାମଲାରେ ସମ୍ପୃକ୍ତ ଥିବା ୩ ଅଭିଯୁକ୍ତଙ୍କୁ ପୋଲିସ ଗିରଫ କରିଛି। 

ପୂର୍ଣ୍ଣିଆ ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ, ରାମଦେବ ମହତୋ ନାମକ ଜଣେ ବ୍ୟକ୍ତିଙ୍କ ସନ୍ତାନ ଅସୁସ୍ଥ ଥିଲା । ତେଣୁ ସେ ଚିକିତ୍ସା ପାଇଁ ୫୦ ବର୍ଷୀୟ ବାବୁଲାଲ ଓରାଁଓଙ୍କ ନିକଟକୁ ଯାଇଥିଲେ । ହେଲେ ପିଲାଟିର ମୃତ୍ୟୁ ହୋଇଗଲା । ଯେଉଁ କାରଣରୁ ମୃତକଙ୍କ ପରିବାରଲୋକେ ବାବୁଲାଲ ଓରାଁଓଙ୍କ ପରିବାରଲୋକଙ୍କୁ ମାଡ଼ ମାରିଥିଲେ । 

ମୃତକମାନେ ହେଲେ ବାବୁଲାଲ ଓରାଁଓ(୫୦), ବାବୁଲାଲର ମାଆ କାନ୍ତୋ ଦେବୀ(୭୦), ସ୍ତ୍ରୀ ସୀତା ଦେବୀ(୪୫), ପୁଅ ମଞ୍ଜିତ କୁମାର(୨୫) ଏବଂ ବୋହୂ ରାଣୀ ଦେବୀ(୨୨) । ସେପଟେ ବାବୁଲାଲଙ୍କ ସାନ ପୁଅ(୧୬)  ଘଟଣାସ୍ଥଳରୁ ଖସି ଆସିବାରେ ସକ୍ଷମ ହୋଇଥିଲା । ସେ ପୋଲିସ ନିକଟରେ ବୟାନ ଦେଇଛି ଯେ, ଗାଁରେ ଏକ ବୈଠକ ବସିଥିଲା । ବୈଠକରେ ପ୍ରାୟ ୨୦୦ ଲୋକ ଥିଲେ । ସେହି ବୈଠକକୁ ମୋ ବାପା ଓ ମାଆଙ୍କୁ ଡକାଯାଇଥିଲା । ଆଉ ଗାଁଲୋକେ ତାଙ୍କୁ ଜୀବନରୁ ମାରିବାକୁ ଫଇସଲା ହେଲା । ପ୍ରଥମେ ଲାଠିରେ ମାରିଥିଲେ । ପରେ ଜୀଅନ୍ତା ଜାଳିଦେଇଥିଲେ । ଏହାପରେ ମୃତଦେହ ଏକ ଟ୍ରାକ୍ଟର ଉପରେ ଲଦି ଏକ ଶୂନଶାନ ସ୍ଥାନକୁ ନେଇ ଫିଙ୍ଗିଦେଇଥିଲେ । 

ସେପଟେ ଖବର ପାଇ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା । ଟ୍ରାକ୍ଟର ମାଲିକ ନକୁଳ ଓରାଁଓକୁ ଗିରଫ କରି ପୋଲିସ ପଚରାଉଚରା କରୁଛି । ଏହାସହ ୫ ମୃତଦେହ ଜବତ କରିଛି । 

ଅଧିକ ପଢନ୍ତୁ: ଅନ୍ଧବିଶ୍ୱାସ କବଳରେ ଫସି ଚାଲିଗଲା ଜୀବନ, ପାଇଖାନା ପାଣି ପିଆଇ ତଣ୍ଟି ଚିପି ଦେଲା ତାନ୍ତ୍ରିକ