ଲୁଟ୍‌ କରି ମଉଜ କରୁଥିଲେ, ବଡ଼ ହୋଟେଲ୍‌ରେ ରହୁଥିଲେ; ମାଡ଼ିବସିଲା ପୋଲିସ

କମିସନରେଟ ପୋଲିସ ହାତରେ ହାଇୱେ ଲୁଟେରା ଗ୍ୟାଙ୍ଗ। ଲୁଟ କରି ବିନ୍ଦାସ ଲାଇଫ ବଞ୍ଚୁଥିଲେ ଲୁଟେରା । ପଞ୍ଚତାରକା ହୋଟେଲରେ ବିତାଉଥିଲେ ରାତି । ଦେହରେ ପ୍ୟାଣ୍ଟ ସାର୍ଟ ଜୋତା ସବୁ କିଛି ବ୍ରାଣ୍ଡେଡ । ଆୟୁଷ୍ମାନ ଗ୍ୟାଙ୍ଗ ବିରୋଧରେ କମିଶନରେଟ ପୋଲିସରେ ରହିଛି ୨୪ଟି ମାମଲା। ଏଭଳି ଏକ ଗ୍ୟାଙ୍ଗକୁ ଧରିଛି କମିଶନରେଟ ପୋଲିସ । ସେମାନଙ୍କ ନିକଟରୁ ୪୦ଟି ଚେନ, ୨ ଲକ୍ଷ ଟଙ୍କା, ୪ଟି ଦାମୀ ବାଇକ ଓ ୫ଟି ମୋବାଇଲ ଜବତ କରାଯାଇଛି ।

ବିଗତ ୬ ମାସ ହେଲା ରାଜଧାନୀବାସୀଙ୍କ ନିଦ ହଜାଇ ଦେଇଥିଲେ ଅୟଜ ମହମ୍ମଦ, ଆୟୁସ୍ମାନ ତ୍ରିପାଠୀ, ଦେବାଶିଷ ବାରିକ, ଶିବପ୍ରସାଦ ବାରିକ ଓ ରଜତ ନନ୍ଦ। ଭୁବନେଶ୍ୱରରୁ ପୁରୀ, ଅନୁଗୁଳ, ଗଂଜାମ ପର୍ଯ୍ୟନ୍ତ ଦାମୀ ବାଇକରେ ଯାଇ ଲୋକଙ୍କ ଚେନ ଝାମ୍ପୁଥିଲେ। ଲୁଟ ପୂର୍ବରୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଥିଲେ । ସିସିଟିଭିକୁ ଚକମା ଦେବାକୁ ଫୁଲ ପ୍ୟାଣ୍ଟ ସାର୍ଟ ଓ ହେଲମେଟ ପିନ୍ଧୁଥିଲେ। ଶହେ ସ୍ପିଡ଼ରେ ଗାଡି ଚଳାଇ ଆଖି ପିଛୁଳାକେ ଲୁଟି ଫେରାର ହୋଇଯାଉଥିଲେ ।

ପୂର୍ବରୁ ଏହି ଲୁଟେରାଙ୍କ ମଧ୍ୟରୁ ଦୁଇ ଜଣ ଗିରଫ ମଧ୍ୟ ହୋଇଥିଲେ । ହେଲେ ଜେଲରୁ ମୁକୁଳି ପୁଣି ଆରମ୍ଭ କରୁଥିଲେ ଲୁଟ୍। ଗାର୍ଲ ଫ୍ରେଣ୍ଡଙ୍କ ସହ ମଉଜ କରୁଥିଲେ ଲୁଟେରା ଆୟୁଷ୍ମାନ । ରିଲ୍ସ କରି ସୋସିଆଲ ମିଡିଆରେ ଅପଲୋଡ କରୁଥିଲେ । ଚୋରି ସୁନାକୁ ବନ୍ଧକ କରି ଟଙ୍କା ଆଣୁଥିଲେ । କମିଶନରେଟ ପୋଲିସ ପକ୍ଷରୁ ଭଦ୍ରକ, ଅନୁଗୁଳ, ପୁରୀ , ଗଞ୍ଜାମ ପୋଲିସ ସହ ଯୋଗାଯୋଗ କରାଯାଇଛି । ଆବଶ୍ୟକ ସ୍ଥଳେ ଅଭିଯୁକ୍ତଙ୍କୁ ରିମାଣ୍ଡରେ ଅଣାଯିବ ବୋଲି କମିଶନର କହିଛନ୍ତି ।