Bihar: ହସ୍ପିଟାଲରେ ପଶିଲେ, ପାରୋଲ କଏଦୀଙ୍କୁ ଗୁଳି ମାରିଲେ... ଚାଲିଗଲେ

ବିହାରର ରାଜଧାନୀ ପାଟନାର ପାରସ ହସ୍ପିଟାଲରେ ଏକ ଚାଞ୍ଚଲ୍ୟକର ଘଟଣା ଘଟିଛି। ଚିକିତ୍ସା ପାଇଁ ପାରୋଲରେ ମୁକ୍ତ ହୋଇଥିବା ଜଣେ ବନ୍ଦୀଙ୍କୁ ପାଞ୍ଚଜଣ ଦୁର୍ବୃତ୍ତ ହସ୍ପିଟାଲ ଭିତରେ ଗୁଳି କରି ହତ୍ୟା କରିଛନ୍ତି। ଯାହା ବିହାରର ଆଇନ ଓ ଶୃଙ୍ଖଳା ସ୍ଥିତି ଉପରେ ପୁନର୍ବାର ପ୍ରଶ୍ନ ଉଠାଇଛି।

ପୁଲିସ ଅନୁଯାୟୀ, ଏହି ଗୁଳିକାଣ୍ଡ ପାଟନାର ରାଜା ବଜାର ଅଞ୍ଚଳରେ ଥିବା ପାରସ ହସ୍ପିଟାଲରେ ଘଟିଛି। ପାଞ୍ଚଜଣ ଅଜଣା ବନ୍ଧୁକଧାରୀ ହସ୍ପିଟାଲ ଭିତରେ ପଶି ପାରୋଲରେ ଥିବା ଅପରାଧୀ ଚନ୍ଦନ ମିଶ୍ରଙ୍କୁ ଗୁଳି କରି ହତ୍ୟା କରିଛନ୍ତି। ଚନ୍ଦନ ମିଶ୍ର ନାମକ ଜଣେ ବ୍ୟକ୍ତି, ଯିଏ ବକ୍ସର ଜିଲ୍ଲାରେ ଏକ ହତ୍ୟା ମାମଲାରେ ସମ୍ପୃକ୍ତ ଥିଲେ, ଏବଂ ତାଙ୍କ ବିରୁଦ୍ଧରେ ଅନେକ ହତ୍ୟା ମାମଲା ରହିଥିଲା। ତାଙ୍କୁ ଚିକିତ୍ସା ପାଇଁ ବେଉର ଜେଲରୁ ମେଡିକାଲ ପାରୋଲରେ ମୁକ୍ତ କରାଯାଇଥିଲା ଏବଂ ସେ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି ହୋଇଥିଲେ।

ସେ ଚିକିତ୍ସା ପାଇଁ ପାରୋଲରେ ଥିବା ବେଳେ ଶତ୍ରୁ ଗ୍ୟାଙ୍ଗର ସଦସ୍ୟମାନେ ଏହା ଜାଣି ପାରି ତାଙ୍କୁ ଟାର୍ଗେଟ କରି ଏହି ହମଲା କରିଥିବା ଅନୁମାନ କରାଯାଉଛି। ପାଟନା ଏସଏସପି କାର୍ତ୍ତିକେୟ ଶର୍ମାଙ୍କ କହିବା ଅନୁସାରେ, ଦୁର୍ବୃତ୍ତମାନେ ଚନ୍ଦନଙ୍କୁ ଚାରି ରାଉଣ୍ଡ ଗୁଳିମାଡ କରିଥିଲେ। ଏଥିରେ ଘାୟଲ ହୋଇ ଚନ୍ଦନ ଗୁରୁତର ଅବସ୍ଥାରେ ସେହି ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ମୃତ୍ୟୁବରଣ କରିଛନ୍ତି। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ଏବଂ ଅଭିଯୁକ୍ତଙ୍କ ଫଟୋ ସିସିଟିଭିରେ ରେକର୍ଡ ହୋଇଥିବା ଜଣାପଡ଼ିଛି। ପୋଲିସ ବକ୍ସର ପୋଲିସ ସହ ମିଳିତ ଭାବେ ଅଭିଯୁକ୍ତଙ୍କୁ ଚିହ୍ନଟ କରିବା ପାଇଁ ତଦନ୍ତ କରୁଛି। ଏହି ଘଟଣା ବିହାରରେ ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ ଉଠାଇଛି।

ଅଧିକ ପଢନ୍ତୁ: ୫ ବର୍ଷର ଝିଅକୁ ତଣ୍ଟି ଚିପି ମାରିଲା, ମୃତଦେହକୁ ନେଇ ସମୁଦ୍ରରେ ଫିଙ୍ଗିଲା ବାପା