Goutam Adani Samdhi: ଆଦାନୀଙ୍କ ଠାରୁ ଧନୀ କି ସାନ ସମୁଦି ଜୈମିନ ଶାହ ? କେଉଁ ବ୍ୟବସାୟ କରନ୍ତି, ମୋଟ ସମ୍ପତ୍ତି କେତେ...

ଭାରତୀୟ ଶିଳ୍ପପତି ତଥା ଆଦାନୀ ଗ୍ରୁପର ଚେୟାରମ୍ୟାନ ଗୌତମ ଅଦାନୀଙ୍କ ଘରେ ବାଜିବ ଶାହାନାଇ । ଛୋଟ ପୁଅ ଜିତ ଆଦାନୀଙ୍କ ବିବାହ ପାଇଁ ଖୁବ ଧୁମଧାମରେ ପ୍ରସ୍ତୁତି ଚାଲିଛି । ଜଣେ ବଡ଼ ବ୍ୟବସାୟୀଙ୍କ ଝିଅ ଦିବା ଜୈମିନ ଶାହଙ୍କୁ ବିବାହ କରିବେ ଜିତ ଆଦାନୀ । ଫେବୃୟାରୀ ୭ରେ ଉଭୟ ବିବାହର ପବିତ୍ର ବନ୍ଧନରେ ବାନ୍ଧିହେବେ । ଗୌତମ ଆଦାନୀଙ୍କ ଭାବି ସମୁଦି ତଥା ଦିବାଙ୍କ ବାପାଙ୍କ ନାମ ହେଲା ଜୈମିନ ଶାହ । ମିଡିଆ ରିପୋର୍ଟ ଅନୁସାରେ ଆଦାନୀ ଏବଂ ଶାହଙ୍କ ମଧ୍ୟରେ ବନ୍ଧୁତା ବହୁତ ପୁରୁଣା। ଦିବା ଜୈମିନ ଶାହାଙ୍କ ସହ ଜିତଙ୍କ ନିର୍ବନ୍ଧ ୧୨ ମାର୍ଚ୍ଚ ୨୦୨୩ରେ ଅନୁଷ୍ଠିତ ହୋଇଥିଲା । ବର୍ତ୍ତମାନ ଦିବା ଜୈମିନ, ଗୌତମ ଆଦାନୀଙ୍କ ସାନ ବୋହୂ ଭାବରେ ଆଦାନୀ ପରିବାରରେ ପ୍ରବେଶ କରିବାକୁ ଯାଉଛନ୍ତି ।

ଦିବା ଜୈମିନ କିଏ ?

ଦିବା ଜୈମିନ ଶାହ ସି.ଦିନେଶ ଆଣ୍ଡ କମ୍ପାନୀ ପ୍ରାଇଭେଟ ଲିମିଟେଡର ମାଲିକ ଜୈମିନ ଶାହଙ୍କ ଝିଅ । ଜୈମିନ ଶାହ ସୁରଟର ବଡ଼ ତଥା ନାମକରା ବ୍ୟବସାୟୀଙ୍କ ମଧ୍ୟରୁ ଜଣେ । ଦିବା ଓ ଜିତଙ୍କ ନିର୍ବନ୍ଧକୁ ଖୁବ ନିରାଡମ୍ବର ଭାବରେ ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ଆଦାନୀ ପରିବାରର ବନ୍ଧୁ ଓ ସମ୍ପର୍କୀୟ ଯୋଗ ଦେଇଥିଲେ। ।

ଜିତଙ୍କ ଜୀବନସାଥୀଙ୍କ ପାଖରେ କେତେ ସମ୍ପତ୍ତି ?

ଦିବା ଜୈମିନ ଶାହ ଲାଇମଲାଇଟରୁ ବହୁ ଦୂରରେ ରୁହନ୍ତି । ଏଥିପାଇଁ ତାଙ୍କ ସମ୍ପର୍କରେ ବିଶେଷ କୌଣସି ତଥ୍ୟ ଉପଲବ୍ଧ ନାହିଁ । ତେବେ ମିଡିଆ ରିପୋର୍ଟ ଅନୁସାରେ କୋଟି କୋଟି ସମ୍ପତ୍ତିର ଅଧିକାରୀ ହେଲେ ଦିବା । ବାପାଙ୍କୁ ସେ ବ୍ୟବସାୟରେ ସାହାଯ୍ୟ କରନ୍ତି ।

ଜୈମିନ ଶାହ କେଉଁ ବ୍ୟବସାୟ କରନ୍ତି ?

ଜୈମିନ ଶାହ ସୁରଟର ଜଣେ ବଡ ହୀରା ବ୍ୟବସାୟୀ । ତାଙ୍କ କମ୍ପାନୀର ନାମ ହେଉଛି ସି.ଦିନେଶ ଆଣ୍ଡ କମ୍ପାନୀ ପ୍ରାଇଭେଟ ଲିମିଟେଡ । ୧୯୭୬ ମସିହାରେ ପ୍ରତିଷ୍ଠିତ ହୋଇଥିଲା ଜୈମିନ ଶାହଙ୍କ କମ୍ପାନୀ । କମ୍ପାନୀର ମୁଖ୍ୟାଳୟ ମୁମ୍ବାଇ ଏବଂ ସୁରଟରେ ଅଛି । ତାଙ୍କ କମ୍ପାନୀ ଭାରତ ଏବଂ ବିଦେଶର ଅନେକ କମ୍ପାନୀ ସହ ହୀରା ବ୍ୟବସାୟ କରେ । ଜିଗର ଦୋସି, ଅମିତ ଦୋସି, ଜୈମିନ ଶାହ ମିଶି କମ୍ପାନୀର ପରିଚାଳନା କରନ୍ତି ।

କେତେ ସମ୍ପତ୍ତିର ଅଧିକାରୀ ଆଦାନୀଙ୍କ ସମୁଦି ?

ଜୈମିନ ଶାହଙ୍କ ପାଖରେ କେତେ ସମ୍ପତ୍ତି ଅଛି, ସେସମ୍ପର୍କରେ ପବ୍ଲିକ ଡୋମେନରେ କୌଣସି ତଥ୍ୟ ଉପଲବ୍ଧ ନାହିଁ । ତେବେ ଭିନ୍ନ ଭିନ୍ନ ମିଡିଆ ରିପୋର୍ଟ ଅନୁସାରେ ତାଙ୍କର ସମ୍ପତ୍ତିର ଆକଳନ ଭିନ୍ନ ଭିନ୍ନ କରାଯାଇଛି । ବ୍ଲୁମବର୍ଗ ବିଲିୟନେୟାର ଇଣ୍ଡେକ୍ସରେ ବିଶ୍ୱର ୫୦୦ ଧନୀ ବ୍ୟକ୍ତିଙ୍କ ନାମ ସାମିଲ ରହିଛି । ଏଥିରେ ମୁକେଶ ଅମ୍ବାନୀ ଏବଂ ଗୌତମ ଦାନୀଙ୍କ ସମେତ ବହୁ ଭାରତୀୟ ବ୍ୟବସାୟୀଙ୍କ ନାମ ରହିଛି । କିନ୍ତୁ ଏଥିରେ ତାଲିକାରେ ଜୈମିନ ଶାହଙ୍କ ନାମ ନାହିଁ । ଏହି ତାଲିକାରେ ୭୩.୯ ବିଲିୟନ ଡ଼ଲାରର ସମ୍ପତ୍ତି ସହିତ ବିଶ୍ୱର ୨୧ ତମ ଧନୀ ବ୍ୟକ୍ତି ହେଉଛନ୍ତି ଆଦାନୀ । ଏଭଳି ସ୍ଥିତିରେ ସମ୍ପତ୍ତି ଦୃଷ୍ଟିରୁ ଅଦାନୀ ତାଙ୍କ ସାନ ସମୁଦିଙ୍କ ଠାରୁ ଅନେକ ଆଗରେ ବୋଲି କୁହାଯାଇପାରେ । 

କ’ଣ କରନ୍ତି ଜିତ ଆଦାନୀ?

ଗୌତମ ଆଦାନୀଙ୍କର ଦୁଇଟି ପୁଅ ଅଛନ୍ତି । ବଡ ପୁଅଙ୍କ ନାମ କରଣ ଅଦାନୀ ଏବଂ ସାନପୁଅଙ୍କ ନାଁ ହେଉଛି ଜିତ୍ ଆଦାନୀ । ସାନପୁଅ ଜିତ୍ ଆଦାନୀ ନଭେମ୍ବର ୭, ୧୯୯୭ରେ ଜନ୍ମଗ୍ରହଣ କରିଥିଲେ। ସେ ପେନସିଲଭାନିଆ ବିଶ୍ୱବିଦ୍ୟାଳୟରୁ ସ୍ନାତକ କରିଛନ୍ତି । କରଣ ଓ ଜିତ୍ ଉଭୟ ବିଦେଶରେ ପାଠ ପଢ଼ିବା ସହ ଭାରତ ଫେରି ବାପାଙ୍କ ବ୍ୟବସାୟ ସମ୍ଭାଳୁଛନ୍ତି । ଜିତ୍ ଏବେ ଅଦାନୀ ଗ୍ରୁପରେ ଉପସଭାପତି ଭାବେ କାମ କରୁଛନ୍ତି।

ନିକଟରେ ବିବାଦରେ ଛନ୍ଦି ହୋଇପଡ଼ିଥିଲା ଥିଲା ଆଦାନୀ ଗ୍ରୁପ

ଗତ ବର୍ଷ ନଭେମ୍ବରରେ ଆମେରିକାର ଆଇନ ବିଭାଗ ଗୌତମ ଆଦାନୀ, ତାଙ୍କ ପୁତୁରା ସାଗର ଆଦାନୀ ଓ ଅନ୍ୟ ଅଧିକାରୀମାନଙ୍କ ବିରୋଧରେ ଲାଞ୍ଚ କାରବାର ଅଭିଯୋଗ ଆଣିଥିଲା ଓ କମ୍ପାନି ଆନ୍ତର୍ଜାତିକ ନିବେଶକଙ୍କୁ ଜାଣିଶୁଣି ବିଭ୍ରାନ୍ତ କରୁଥିବା କହିଥିଲା। ଭାରତରେ ସରକାରୀ ଅଧିକାରୀଙ୍କୁ ଲାଞ୍ଚ ଦେବା ଲାଗି କମ୍ପାନି ଏକ ସୁଚିନ୍ତିତ ଯୋଜନା ପ୍ରସ୍ତୁତ କରିଥିବା ଅଭିଯୋଗ ହୋଇଥିଲା । ତେବେ ସେହି ସମସ୍ତ ଅଭିଯୋଗକୁ ଆଦାନୀ ଗ୍ରୁପ୍ ପକ୍ଷରୁ ଆନୁଷ୍ଠାନିକ ଭାବେ ଖଣ୍ଡନ କରାଯାଇଥିଲା । ଆଦାନୀ ଗ୍ରୁପ୍ ସ୍ପଷ୍ଟୀକରଣ ଜାରି କରି କହିଥିଲା, ଆମେରିକା କରିଥିବା ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ।

କିଏ ହେବ ଆଦାନୀଙ୍କ ଉତ୍ତରାଧିକାରୀ ?

ଗୌତମ ଆଦାନୀ ବ୍ଲୁମବର୍ଗକୁ ନିକଟରେ ଏକ ସାକ୍ଷାତକାର ଦେବା ସହ ନିଜର ଅବସର ନେଇ ଚର୍ଚ୍ଚା କରିଥିଲେ । ୭୦ ବର୍ଷ ବୟସରେ ୨୦୩୦ରେ କାର୍ଯ୍ୟରୁ ଅବସର ନେବେ ଗୌତମ ଆଦାନୀ । ଅବସର ପରେ କମ୍ପାନୀର ଦାୟିତ୍ୱ ତାଙ୍କ ଦୁଇ ପୁଅ ଏବଂ ଦୁଇ ପୁତୁରାଙ୍କ ଉପରେ ରହିବ । ଆଦାନୀ ଅବସର ନେବାପରେ ଚାରି ଜଣ ଉତ୍ତରାଧିକାରୀ ଦୁଇ ପୁଅ କରଣ ଆଦାନୀ ଓ ଜିତ ଆଦାନୀ ଏବଂ ପୁତୁରା ପ୍ରଣବ ଆଦାନୀ ଓ ସାଗର ଆଦାନୀ ଟ୍ରଷ୍ଟର ସମାନ ହିତାଧିକାରୀ ହେବେ ।
କିଏ କେଉଁ ଦାୟିତ୍ୱରେ ରହିବେ, ସେ ସମ୍ବନ୍ଧରେ ଗୋପନୀୟ ଚୁକ୍ତିନାମା ହେବ । ଯେଉଁଥିରେ ଆଦାନୀ ଗ୍ରୁପ୍ କମ୍ପାନୀର ସେୟାର ଓ ଉତ୍ତରାଧିକାରୀଙ୍କ ଦାୟିତ୍ୱ ସମ୍ପର୍କରେ ସମ୍ପୂର୍ଣ୍ଣ ସୂଚନା ରହିବ।