EPF ବାଲାନ୍ସ ଯାଞ୍ଚ କରୁଥିଲେ ଧ୍ୟାନ ଦିଅନ୍ତୁ; ନହେଲେ ଠକାମିର ଶିକାର ହୋଇପାରନ୍ତି

ଦେଶରେ କୋଟି କୋଟି ଚାକିରିଆଙ୍କର କର୍ମଚାରୀ ପ୍ରୋଭିଡେଣ୍ଟ ପାଣ୍ଠି ସଂଗଠନ(EPFO)PF ଅଛି। ପ୍ରତ୍ୟେକ ମାସରେ କର୍ମଚାରୀଙ୍କ ବେତନର କିଛି ଅଂଶ କଟାଯାଇ ସେମାନଙ୍କ PF ଆକାଉଣ୍ଟରେ ଜମା କରାଯାଏ। ପ୍ରୋଭିଡେଣ୍ଟ ପାଣ୍ଠିରେ ଜମା ହୋଇଥିବା ଅର୍ଥ କର୍ମଚାରୀଙ୍କ ଭବିଷ୍ୟତକୁ ସୁରକ୍ଷିତ ରଖିବାରେ ସାହାଯ୍ୟ କରେ। ଅନେକ ସମୟରେ କର୍ମଚାରୀମାନେ ସେମାନଙ୍କର ପ୍ରୋଭିଡେଣ୍ଟ ଫଣ୍ଡ୍‌ ଆକାଉଣ୍ଟରେ ଜମା ହୋଇଥିବା ଟଙ୍କାକୁ ଯାଞ୍ଚ କରନ୍ତି।

ଅଧିକ ପଢ଼ନ୍ତୁ: PPF, EPF, GPF ମଧ୍ୟରେ କ’ଣ ପାର୍ଥକ୍ୟ, କ’ଣ ଫାଇଦା

ସୂଚନାଯୋଗ୍ୟ ଯେ କର୍ମଚାରୀମାନେ ସେମାନଙ୍କର PF ଜମା ଯାଞ୍ଚ କରିବା ପାଇଁ ବିଭିନ୍ନ ପଦ୍ଧତି ଗ୍ରହଣ କରନ୍ତି। ବେଳେବେଳେ ସେମାନେ ‘ଉମଙ୍ଗ୍‌’ ଆପ୍ ମାଧ୍ୟମରେ ଏବଂ ବେଳେବେଳେ ମିସ୍ କଲ୍ କିମ୍ବା SMS ସେବା ମାଧ୍ୟମରେ PF ଆକାଉଣ୍ଟ୍ ବାଲାନ୍ସ ଯାଞ୍ଚ କରନ୍ତି। ତେବେ PF ବାଲାନ୍ସ ଯାଞ୍ଚ କରିବା ସମୟରେ କେତେକ ଦିଗ ପ୍ରତି ସତର୍କ ରହିବା ଆବଶ୍ୟକ। ନଚେତ ଏକ ଛୋଟ ଅସାବଧାନତା ଏକ ବଡ କ୍ଷତିର କାରଣ ହୋଇପାରେ।

ମନେରଖନ୍ତୁ ଯେ ଆପଣ ଯେଉଁ ନମ୍ବରରେ କଲ୍ କିମ୍ବା ମେସେଜିଂ କରି PF ବାଲାନ୍ସ ଚେକ୍ କରୁଛନ୍ତି ତାହାକୁ ଭଲ ଭାବେ ଯାଞ୍ଚ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଆସନ୍ତୁ ଏ ବିଷୟରେ ଜାଣିବା -

ଯଦି ଆପଣ ଗୁଗୁଲରେ EPFO ​​ହେଲ୍ପଲାଇନ ନମ୍ବର ଖୋଜୁଛନ୍ତି ତେବେ ସେହି ନମ୍ବରକୁ ଯାଞ୍ଚ କରିବା ଜରୁରୀ। ସମ୍ପ୍ରତି ଏଭଳି ଏକ ମାମଲା ସାମ୍ନାକୁ ଆସିଛି ଯେଉଁଥିରେ ଜଣେ ବ୍ୟକ୍ତି ଗୁଗୁଲରେ EPFO ​​ର ହେଲ୍ପଲାଇନ ନମ୍ବର ଖୋଜି ପାଇଥିଲେ।

ବ୍ୟକ୍ତି ଜଣକ ସେହି ନମ୍ବରକୁ କଲକରିଥିଲେ। ଏହା ପରେ ତାଙ୍କୁ ଏକ ରିମୋଟ୍ ଏକ୍ସେସ୍ କରିବାକୁ କୁହାଯାଇଥିଲା। ସାଇବର ଠକଙ୍କ କହିବାନୁସାରେ ସେ ଏହି କାମ କରିଥିଲେ। ଏହା ପରେ, ଠକ ତାଙ୍କ ଆକାଉଣ୍ଟରୁ ୧୪ ଟି ବିଭିନ୍ନ ଟ୍ରାଞ୍ଜାକ୍‌ସନ ମାଧ୍ୟମରେ ମୋଟ ୧ ଲକ୍ଷ ୨୩ ହଜାର ଟଙ୍କା ଠକିନେଇଥିଲେ।

EPFO ଟ୍ୱିଟ୍:

କର୍ମଚାରୀଙ୍କ ପ୍ରୋଭିଡେଣ୍ଟ୍‌ ଫଣ୍ଡ୍‌ ସଂଗଠନ ଏହାର ଅଫିସିଆଲ ଟ୍ୱିଟର ଆକାଉଣ୍ଟରୁ ଟ୍ୱିଟ୍‌ କରି ଏହାର ଲକ୍ଷ ଲକ୍ଷ ଆକାଉଣ୍ଟଧାରୀଙ୍କୁ ସତର୍କ କରାଇଦେଇଛି ଯେ EPFO ଆଧାର କାର୍ଡ, ପ୍ୟାନ୍‌ କାର୍ଡ, ୟୁଏଏନ୍‌ ନମ୍ବର ଏବଂ ବ୍ୟାଙ୍କ ଆକାଉଣ୍ଟ ନମ୍ବରର୍ ସୂଚନା ମାଗିଥାଏ କିନ୍ତୁ OTP କେବେବି ମାଗେ ନାହିଁ। ଏପରି ପରିସ୍ଥିତିରେ କୌଣସି ଅଜଣା କଲ୍ କିମ୍ବା ବାର୍ତ୍ତାକୁ କୌଣସି ବ୍ୟକ୍ତିଗତ ସୂଚନା ଦିଅନ୍ତୁ ନାହିଁ।

ପୋଲିସକୁ ସୂଚନା:

ବାରମ୍ବାର ଦେଖାଯାଇଛି ଯେ ଚାକିରି ବଦଳାଇବା ସମୟରେ ଲୋକମାନେ ଏଭଳି ସ୍କାମ ପରିସ୍ଥିତିର ଶିକାର ହୁଅନ୍ତି। ଏହି ପରିପ୍ରେକ୍ଷୀରେ, ବ୍ୟକ୍ତିମାନେ ଆଧାର, ପାନ୍, ବ୍ୟାଙ୍କ ଆକାଉଣ୍ଟ ଏବଂ ଅନ୍ୟାନ୍ୟ ବ୍ୟକ୍ତିଗତ ସୂଚନାକୁ EPFO ​​ ଅପଡେଟ୍ କରିବା ବାହାନାରେ ଚୋରି କରନ୍ତି। ଏହା ପରେ ସେମାନେ ଏହି ବିବରଣୀଗୁଡିକର ଅପବ୍ୟବହାର କରି ଆକାଉଣ୍ଟଧାରୀଙ୍କ ଆକାଉଣ୍ଟକୁ ଅପବ୍ୟବହାର କରନ୍ତି।

ଏନେଇ କୌଣସି ପରିସ୍ଥିତିରେ ବି କାହାକୁ ଆପଣଙ୍କର ବ୍ୟକ୍ତିଗତ ସୂଚନା ଦିଅନ୍ତୁ ନାହିଁ। ଏହା ସହିତ, ଯଦି ଆପଣ ଠକାମୀର ଶିକାର ହୁଅନ୍ତି ତେବେ ତୁରନ୍ତ ପୋଲିସକୁ ଜଣାଇବା ଉଚିତ।