World’s Safest Car: କାର ନୁହଁ ତ ଗୋଟିଏ ବଙ୍କର , ୪ଟି ଚକରେ ଚାଲୁଥିବା ଅଭେଦ୍ୟ ଦୁର୍ଗ

ଦୁଇଦିନିଆ ଭାରତ ଗସ୍ତରେ ଆସିଛନ୍ତି ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ। କଡ଼ା ସୁରକ୍ଷା ବଳୟରେ ଭାରତରେ ବୁଲିବେ ପୁଟିନ। ତାଙ୍କ ପାଇଁ ୫ ସ୍ତରୀୟ ସୁରକ୍ଷା ବ୍ୟବସ୍ତାର କରାଯାଇଛି ଆୟୋଜନ। ତେବେ ଏହି ସୁରକ୍ଷା ବ୍ୟବସ୍ଥା ମଧ୍ୟରେ ପୁଟିନଙ୍କ ସରକାରୀ କାର ଅରସ୍ ସେନାଟ୍ ମଧ୍ୟ ତାଙ୍କ ସହ ଆସିଛି। ୧୩ କୋଟିରୁ ଅଧିକ ମୂଲ୍ୟର ଏହି ଗାଡ଼ିଟିକୁ ଋଷିଆରୁ ସ୍ବତନ୍ତ୍ର ବିମାନ ଯୋଗେ ଭାରତ ଅଣାଯାଇଛି। ଏହି କାରରେ ଭାରତରେ ଯାତ୍ରା କରିବେ ପୁଟିନ। ଚଳିତ ବର୍ଷ ଚୀନରେ ସାଂଘାଇ କୋପରେସନ୍ ସମ୍ମିଳନୀରେ ମଧ୍ୟ ପିଏମ୍ ମୋଦିଙ୍କ ସହିତ ଏହି କାରରେ  ଯାତ୍ରା କରିଥିଲେ ପୁଟିନ୍। ତେବେ ଆପଣ ଜାଣିଛନ୍ତି କି ଅରସ୍ ସେନାଟ୍ କୁ ବିଶ୍ୱର ସବୁଠାରୁ ସୁରକ୍ଷିତ କାର ମଧ୍ୟରୁ ଗୋଟିଏ ବୋଲି କାହିଁକି କୁହାଯାଏ ?

ପ୍ରକୃତରେ, ପ୍ରତ୍ୟେକ ରାଷ୍ଟ୍ରମୁଖ୍ୟଙ୍କର ଏକ ସ୍ୱତନ୍ତ୍ର କାର ଅଛି, ଯାହା ଆରାମ ଏବଂ ସୁରକ୍ଷା ସହିତ, ଅନେକ ଦିଗରୁ ସାଧାରଣ ଯାନବାହନଠାରୁ ସମ୍ପୂର୍ଣ୍ଣ ଭିନ୍ନ। ପୁଟିନଙ୍କ ସରକାରୀ କାର, "ଅରୁସ୍ ସେନାଟ୍", ଏକ ବୁଲେଟ୍‌ପ୍ରୁଫ୍ ଏବଂ ବୋମା ପ୍ରତିରୋଧୀ ଲିମୋଜିନ୍, ଯାହାକୁ ଏକ ଭ୍ରାମ୍ୟମାଣ ଦୁର୍ଗ ଭାବରେ କୁହାଯାଏ। ଆଧୁନିକ ଅସ୍ତ୍ରଶସ୍ତ୍ରରେ ସୁସଜ୍ଜିତ ଏହା ଏକ ଅତ୍ୟାଧୁନିକ କାର୍। 

ଏହା VR10 ସୁରକ୍ଷା ମାନଦଣ୍ଡ ପୂରଣ କରେ। ଏହାର ଶରୀର ବହୁ-ସ୍ତର କବଚ ଓ ୬ ଏମଏମର କାଚରେ ଆଚ୍ଛାଦିତ ଯାହା ଉଚ୍ଚ-କ୍ୟାଲିବର ରାଇଫଲ୍ ଗୁଳିକୁ ସହ୍ୟ କରିପାରିବ। ଏହାର ତଳବଡି ଏବଂ ଇନ୍ଧନ ଟାଙ୍କି ସ୍ୱତନ୍ତ୍ର ପ୍ଲେଟ୍ ରହିଛି ଯାହା ଗ୍ରେନେଡ୍ ଏବଂ IED ଭଳି ବିସ୍ଫୋରକ ବିରୁଦ୍ଧରେ ସୁରକ୍ଷା ପ୍ରଦାନ କରେ। ଏହା ବ୍ୟତୀତ, ଏଥିରେ ପଙ୍କଚର ହେଲା ପରେ ମଧ୍ୟ ଚାଲିପାରୁଥିବା ଟାୟାର, ରାସାୟନିକ ଆକ୍ରମଣ ବିରୁଦ୍ଧରେ ସୁରକ୍ଷା ପାଇଁ ଏକ ଏୟାର ଫିଲ୍ଟ୍ରେସନ୍ ସିଷ୍ଟମ୍ ଏବଂ ଏକ ଜରୁରୀକାଳୀନ ଅମ୍ଳଜାନ ଯୋଗାଣ ବ୍ୟବସ୍ଥା ମଧ୍ୟ ରହିଛି।

ପୁଟିନଙ୍କ ଏହି କାରରେ ଏକ ହାଇବ୍ରିଡ୍ V8 ଇଞ୍ଜିନ୍ ଲାଗିଛି। ଯାହା 598 ହର୍ସପାୱାର ଏବଂ 889 ନ୍ୟୁଟନ୍ ମିଟର ଟର୍କ ସୃଷ୍ଟି କରେ। ଆଉ ୧୦୦ କିମି ବେଗକୁ ମାତ୍ର ୬ ସେକେଣ୍ଡରେ ଛୁଇଁପାରେ। ଏହା ସର୍ବାଧିକ ୨୫୦ କିଲୋମିଟର ବେଗରେ ରାସ୍ତାରେ ଦୌଡ଼ି ପାରିବ। ଏବେ, ଦୁଇ ଦିନ ପାଇଁ, ଦିଲ୍ଲୀର ରାସ୍ତାରେ ଅରସ୍ ସେନାଟ୍ ର ଗର୍ଜନ ଦେଖିବାକୁ ମିଳିବ। ତେବେ ସବୁଠାରୁ ଆଶ୍ଚର୍ଯ୍ୟର କଥା, ଭାରତରେ ପହଞ୍ଚି ବିମାନରୁ ଓହ୍ଲାଇବା ପରେ ସେନାଟରେ ବସିନଥିଲେ ପୁଟିନ। ବରଂ ପ୍ରଧାନମନ୍ତ୍ରୀ ମୋଦିଙ୍କ ସହ ତାଙ୍କ ଗାଡ଼ିରେ ବସି ଏକାଠି ଯାତ୍ରା କରିଥିଲେ।