Age No Bar for Love: ବୃଦ୍ଧାବସ୍ଥାରେ ପିଲାଙ୍କ ଉପସ୍ଥିତିରେ ଦ୍ୱିତୀୟ ବିବାହ, ଆରମ୍ଭ ହେଲା ପ୍ରେମର ଦ୍ୱିତୀୟ ଇନିଂସ

କୁହାଯାଏ ଯେ ପ୍ରତ୍ୟେକ ପ୍ରେମ ତା’ର ଲକ୍ଷ୍ୟସ୍ଥଳରେ ପହଞ୍ଚିପାରେ ନାହିଁ। କିଛି ପ୍ରେମ ସମୟ ସହିତ ମଳିନ ହୋଇଯାଏ । ପୁଣି ପୁନର୍ଜୀବିତ ହୁଏ ।  ମଣିଷ ପରିସ୍ଥିତିର ଦାସ । ବେଳେବେଳେ ପରିସ୍ଥିତି ସେହି ଅସମାପ୍ତ କାହାଣୀଗୁଡ଼ିକୁ ସମାପ୍ତ କରିବାକୁ ସୁଯୋଗ ଦିଏ। କେରଳର ଜୟପ୍ରକାଶ ଏବଂ ରଶ୍ମିଙ୍କ କାହାଣୀ ଏପରି ଏକ ପ୍ରେମ କାହାଣୀ, ଯାହା ଆଜିକାଲି ସୋସିଆଲ ମିଡିଆରେ ଲୋକଙ୍କ ହୃଦୟକୁ ଛୁଇଁଛି। ବୃଦ୍ଧାବସ୍ଥାରେ ଆରମ୍ଭ ହୋଇଛି ପ୍ରେମର ଦ୍ୱିତୀୟ ଇନିଂସ । 

ମୁଣ୍ଡକ୍କାଲର ବାସିନ୍ଦା ଜୟପ୍ରକାଶ ଏବଂ ରଶ୍ମି କିଶୋର ଅବସ୍ଥାରେ ପରସ୍ପର ପ୍ରତି ଆକର୍ଷିତ ହୋଇଥିଲେ। ସେମାନେ ପରସ୍ପରକୁ ଭଲ ପାଉଥିଲେ, କିନ୍ତୁ ତାକୁ ପ୍ରକାଶ କରିବାର ସାହସ ସେମାନଙ୍କର ନଥିଲା।

ଏହି ସମୟରେ ରଶ୍ମି ବିବାହ କରିଗଲେ । ଜୟପ୍ରକାଶ ଚାକିରି ପାଇଁ ବିଦେଶ ଚାଲିଗଲେ। ସମୟ ସେମାନଙ୍କୁ ଭିନ୍ନ ରାସ୍ତାରେ ନେଇଗଲା। ରଶ୍ମି ତାଙ୍କର ଘରସଂସାର କଲେ । ଜୟପ୍ରକାଶ ବି ତାଙ୍କର ଘରସଂସାର କଲେ । କେହି କାହା ସହ ଯୋଗାଯୋଗରେ ନଥିଲେ ।  

ସଂପର୍କ ଯୋଡି ହୋଇଗଲା

ରଶ୍ମିଙ୍କ ସ୍ୱାମୀଙ୍କର ପ୍ରାୟ ୧୦ ବର୍ଷ ପୂର୍ବେ ଦେହାନ୍ତ ହୋଇଗଲା । ଜୟପ୍ରକାଶଙ୍କ ସ୍ତ୍ରୀ ପାଞ୍ଚ ବର୍ଷ ପୂର୍ବେ ଆରପାରିକୁ ଚାଲିଗଲେ । ସମୟ କାଟିବା ପାଇଁ ରଶ୍ମି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ଅଂଶଗ୍ରହଣ କଲେ । ଏପରିକି କ୍ଷୁଦ୍ର ଚଳଚ୍ଚିତ୍ରରେ ଅଭିନୟ କରିବା ଆରମ୍ଭ କରିଥିଲେ।

ଏଇଠି ଭାଗ୍ୟ ନୂଆ ମୋଡ଼ ନେଲା। ଜୟପ୍ରକାଶ ଏକ କ୍ଷୁଦ୍ର ଚଳଚ୍ଚିତ୍ରରେ ରଶ୍ମିଙ୍କୁ ଦେଖିଲେ ଏବଂ ତାଙ୍କ ପରିବାର ମାଧ୍ୟମରେ ତାଙ୍କ ସହିତ ଯୋଗାଯୋଗ କଲେ। ପୁରୁଣା ସ୍ମୃତିର ରୋମନ୍ଥନ କଲେ ।  ଦୁଇଜଣଙ୍କ ମଧ୍ୟରେ ଚାପି ରହିଥିବା ପ୍ରେମ ଏବଂ ଯନ୍ତ୍ରଣା ଧୀରେ ଧୀରେ ପଦାକୁ ଆସିଲା । ପୁଣି ଦୁଇ ଜଣଙ୍କ ଭିତରେ ପ୍ରେମ ହୋଇଗଲା । 

ବଡ଼ କଥା ହେଲା ଯେ ସେମାନଙ୍କର ପିଲା ଏହି ସମ୍ପର୍କକୁ ହୃଦୟର ସହିତ ଗ୍ରହଣ କରିଥିଲେ। ସମସ୍ତଙ୍କ ସମ୍ମତିରେ ରଶ୍ମିଙ୍କ ଝିଅ ଓ ଜ୍ୱାଇଁ, ଏବଂ ଜୟପ୍ରକାଶଙ୍କ ପିଲାମାନେ କୋଚିରେ ଏକ ନିରାଡମ୍ୱର ଉତ୍ସବରେ ଉଭୟଙ୍କ ବିବାହ କରାଇଛନ୍ତି । 

ଏହି ବିବାହର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯେଉଁଥିରେ ଲେଖାଯାଇଥିଲା, 'କେଉଁ ପିଲାମାନଙ୍କୁ ଏପରି ଭାଗ୍ୟ ମିଳିଥାଏ?' 
ଜୟପ୍ରକାଶ ଏବଂ ରଶ୍ମିଙ୍କ ଏହି ପ୍ରେମ କାହାଣୀ ପ୍ରମାଣ କରେ ଯେ ଯଦି ପ୍ରେମ ସତ୍ୟ ହୁଏ, ତେବେ ସମୟ ତା'ର ବାଟ ବାହାର କରେ।