Air Travel Scare: ବିମାନ ସେବାରେ ବଡ଼ ସଙ୍କଟ, ୬ ହଜାରରୁ ଅଧିକ ବିମାନରେ ଯାନ୍ତ୍ରିକ ତ୍ରୁଟି

ଏୟାରବସ୍ A320 ବିମାନରେ ଯାନ୍ତ୍ରିକ ତ୍ରୁଟି ଅଭିଯୋଗ । ବିଭିନ୍ନ ବିମାନସେବା କମ୍ପାନୀର ଶହ ଶହ ବିମାନ ବାତିଲ ହୋଇଥିବା ଚର୍ଚ୍ଚା ହେଉଛି । ବିମାନ ବାତିଲ ଯୋଗୁ ହଇରାଣ ହେଉଛନ୍ତି ଯାତ୍ରୀ । ସେପଟେ ବାତିଲ ଖବରକୁ ଖଣ୍ଡନ କରିଛନ୍ତି ଏୟାର ଇଣ୍ଡିଆ ଓ ଇଣ୍ଡିଗୋ । କେବଳ ସଫ୍ଟୱେର୍ ଅପେଡେଟ୍ ପାଇଁ କିଛି ବିମାନରେ ବିଳମ୍ବ ହୋଇଥିବା କୁହାଯାଇଛି।...

 ବିମାନ ସୁରକ୍ଷା ସହିତ ସିଧାସଳଖ ଜଡିତ ଏଭଳି ଏକ ଗମ୍ଭୀର ବୈଷୟିକ ତ୍ରୁଟି ଯୋଗୁଁ ସାରା ବିଶ୍ୱରେ ଏୟାରବସ୍ A320 ର ବିମାନ ଉଡାଣରେ ପ୍ରଭାବିତ ହୋଇଛି। A320 ର ବିମାନଗୁଡିକର ବ୍ୟାପକ ସଫ୍ଟୱେର୍ ଏବଂ ହାର୍ଡୱେର୍ ଅପଗ୍ରେଡ୍ ପାଇଁ ଗ୍ରାଉଣ୍ଡ କରାଯାଉଛି। ଏହା ସମଗ୍ର ବିମାନ ଚଳାଚଳ କ୍ଷେତ୍ରକୁ ଚିନ୍ତାରେ ପକାଇଛି। ଏଥିପାଇଁ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ ଯାତ୍ରା କରିବାକୁ ଥିବା ଯାତ୍ରୀମାନେ ହଇରାଣ ହୋଇଥିବା ଦେଖିବାକୁ ମିଳିଛି। କିଛି ଯାତ୍ରୀ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କାମରେ ଯିବାକୁ ଥିବାବେଳେ ବିମାନ ଚଳାଚଳରେ ବିଳମ୍ବ ପାଇଁ ସମସ୍ୟା ଭୋଗୁଛନ୍ତି। ଏନେଇ ତାଙ୍କୁ ସୂଚନା ଦିଆଯାଇ ନଥିବା କିଛି ବିମାନ ଯାତ୍ରୀ କହିଛନ୍ତି।

ସୂର୍ଯ୍ୟକିରଣ ପଡିଲେ ଡାଟା କରପ୍ଟ !

କୁହାଯାଉଛି ଯେ ଏୟାରବସ୍ A320 ସିରିଜର ବିମାନଗୁଡ଼ିକ ସୂର୍ଯ୍ୟକିରଣର ସଂସ୍ପର୍ଶରେ ଆସିବାରୁ ଏହା ଡାଟା କରପ୍ଟ ହୋଇଯାଉଛି। ଯାହା ଫଳରେ ବିମାନର ଟେକ୍-ଅଫ୍, ଲ୍ୟାଣ୍ଡିଂ ସହିତ ମଝି ଆକାଶରେ ରାସ୍ତା ହଜିଯିବା କିମ୍ବା ଦୁର୍ଘଟଣାର ଆଶଙ୍କା ବୃଦ୍ଧି ପାଉଛି। ଯାହାର ପ୍ରଭାବ ବର୍ତ୍ତମାନ ସାରା ବିଶ୍ୱରେ ବିମାନ ସେବା ଉପରେ ଦେଖିବାକୁ ମିଳୁଛି।

ତେବେ ବିମାନର ଡାଟା କରପ୍ଟର ପ୍ରଥମ ରିପୋର୍ଟ ମେକ୍ସିକୋରୁ ଆମେରିକା ଯାଉଥିବା JetBlue ବିମାନରେ ଦେଖିବାକୁ ମିଳିଥିଲା। ଅକ୍ଟୋବର ୩୦ ତାରିଖରେ, ମେକ୍ସିକୋରୁ ଆମେରିକା ଯାଉଥିବା ଏକ JetBlue ବିମାନ ହଠାତ୍ ଏହାର ଉଚ୍ଚତା ହରାଇବାକୁ ଲାଗିଲା। ଏହା ପାଇଲଟ୍, କ୍ରୁ ଏବଂ ଯାତ୍ରୀମାନଙ୍କ ମଧ୍ୟରେ ଆତଙ୍କ ସୃଷ୍ଟି କରିଥିଲା, ଯାହା ଫଳରେ ବିମାନଟି ଜରୁରୀକାଳୀନ ଲ୍ୟାଣ୍ଡିଂ କରିବାକୁ ବାଧ୍ୟ ହୋଇଥିଲା।

ଏୟାରବସ୍ A320 ବିମାନରେ ହୋଇଥିବା ଏହି ଡାଟା କରପ୍ଟ ଭାରତୀୟ ବିମାନ କମ୍ପାନୀଗୁଡ଼ିକୁ ମଧ୍ୟ ପ୍ରଭାବିତ କରିବ ବୋଲି ଆଶା କରାଯାଉଛି। ଇଣ୍ଡିଗୋ, ଏୟାର ଇଣ୍ଡିଆ ଏବଂ ଏୟାର ଇଣ୍ଡିଆ ଏକ୍ସପ୍ରେସ ସେମାନଙ୍କ ଯାତ୍ରୀମାନଙ୍କୁ ଘରୁ ବାହାରିବା ପୂର୍ବରୁ ବିମାନର ସ୍ଥିତି ଯାଞ୍ଚ କରିବାକୁ ଅନୁରୋଧ କରିଛନ୍ତି। ରିପୋର୍ଟ କରାଯାଉଛି ଯେ A320 ର ଯାନ୍ତ୍ରିକ ତ୍ରୁଟି ଭାରତରେ ୩୦୦ ବିମାନର ଉଡ଼ାଣକୁ ପ୍ରଭାବିତ କରିପାରେ, କେବଳ ଇଣ୍ଡିଗୋର ୨୦୦ରୁ ଅଧିକ ଉଡ଼ାଣ ପ୍ରଭାବିତ ହେବାର ଆଶଙ୍କା ରହିଛି।