ଭାରତ ପରେ ସିଙ୍ଗାପୁରରେ ଡରାଇଲାଣି କରୋନାର ନୂଆ ଷ୍ଟ୍ରେନ୍, କମ୍ ବୟସ୍କଙ୍କ ପ୍ରତି ରହିଛି ବିପଦ

ନୂଆଦିଲ୍ଲୀ: ଭାରତ ପରେ ସିଙ୍ଗାପୁରକୁ ଡରାଇଲା କରୋନାର ନୂଆ ଷ୍ଟ୍ରେନ୍ B.1.617 । ଭାରତରେ ଦ୍ୱିତୀୟ ଲହର ପଛରେ ଏହି ଭାରିଆଣ୍ଟର ପ୍ରମୁଖ ଭୂମିକା ଥିବା ଆଶଙ୍କା କରାଯାଉଥିବା ବେଳେ, ସିଙ୍ଗାପୁରରେ ବି ହଠାତ୍ ସଂକ୍ରମଣ ହାରକୁ ବଢ଼ାଇଛି ଏହି ନିର୍ଦ୍ଦିଷ୍ଟ ଷ୍ଟ୍ରେନ୍ । ସିଙ୍ଗାପୁରରେ ପ୍ରାୟ ବର୍ଷେ ପରେ, ଗତ ରବିବାର ୩୮ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ଭିନ୍ନ ଭିନ୍ନ ସ୍ଥାନର ୬ଜଣ B.1.617 ଭାରିଆଣ୍ଟ୍ ଦ୍ୱାରା ସଂକ୍ରମିତ ଥିବା ସରକାରୀ ସୂତ୍ରରୁ କୁହାଯାଇଛି ।

ସେମାନଙ୍କ ବୟସ ୨୯ରୁ ୫୭ ବର୍ଷ ଭିତରେ ହେବ । ତେଣୁ ଏହି ଷ୍ଟ୍ରେନ୍ କମ୍ ବୟସ୍କଙ୍କୁ ଅଧିକ ସଂକ୍ରମିତ କରିବ ବୋଲି ଆଶଙ୍କା କରୁଛି ସିଙ୍ଗାପୁର । ସେଥିପାଇଁ ବୁଧବାରଠାରୁ ଦେଶର ସମସ୍ତ ପ୍ରାଇମେରି ଓ ସେକେଣ୍ଡାରୀ ସ୍କୁଲ ସହିତ ଜୁନିଅର କଲେଜକୁ ବି ବନ୍ଦ ଘୋଷଣା କରାଯାଇଛି । ତେବେ ଭାରତରେ ଏହି ଷ୍ଟ୍ରେନ୍ ପିଲାଙ୍କ କ୍ଷେତ୍ରରେ ସେଭଳି ମାରାତ୍ମକ ହୋଇନି ଏବଂ ଏହା ଉପରେ ଅଧିକ ଗବେଷଣା ଜାରି ରହିଥିବା କହିଛନ୍ତି ନୀତି ଆୟୋଗ ସ୍ୱାସ୍ଥ୍ୟ ସଦସ୍ୟ ଭି.କେ. ପଲ ।

ତେବେ ଭାରତରେ ଧିରେ ଧିରେ ସଂକ୍ରମଣ ସଂଖ୍ୟା କମୁଥିବା କହିଛନ୍ତି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଯୁଗ୍ମ ସଚିବ ଲବ୍ ଅଗ୍ରୱାଲ । ଆଜି ଦେଶରେ ରକର୍ଡ ସଂଖ୍ୟକ ରୋଗୀ ସୁସ୍ଥ ହୋଇଥିବା ବେଳେ ୩ ଲକ୍ଷରୁ କମ୍ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ସାରା ଦେଶରେ ପଜିଟିଭିଟି ହାର ୧୬.୯% ରହିଛି । ଭାରତରେ ଏଯାବତ ମାତ୍ର ୧.୮ ପ୍ରତିଶତ ଲୋକ ସଂକ୍ରମିତ ହୋଇଛନ୍ତି ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଯୁଗ୍ମ ସଚିବ ଲବ ଅଗ୍ରୱାଲ ସୂଚନା ଦେଇଛନ୍ତି । ଆମେରିକାରେ ସର୍ବାଧିକ ୧୦.୧% ସଂକ୍ରମିତ, ବ୍ରାଜିଲରେ ୭.୩% ।

ମହାରାଷ୍ଟ୍ର, ଦିଲ୍ଲୀ, ଉତ୍ତର ପ୍ରଦେଶରେ ସଂକ୍ରମଣ କମୁଛି । ବିହାର, ମଧ୍ୟପ୍ରଦେଶ, ଛତିଶଗଡ଼ ଆଦି ୮ଟି ରାଜ୍ୟରେ କମୁଛି ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଯୁଗ୍ମ ସଚିବ ଲବ ଅଗ୍ରୱାଲ ସୂଚନା ଦେଇଛନ୍ତି ।

ସେହିଭଳି ଓଡ଼ିଶାରେ ସଂକ୍ରମଣ କମିନଥିଲେ ବି ପଜିଟିଭିଟି ହ୍ରାସ ପାଉଛି । ଓଡ଼ିଶାରେ ପଜିଟିଭିଟି ହାର ଏବେ ୨୩%କୁ ଖସିଛି । ଲାକ୍ଷାଦ୍ୱୀପରେ ସର୍ବାଧିକ ୬୪.୭% ପଜିଟିଭିଟି ରହିଛି । ଗୋଆ ୩୭, ପଶ୍ଚିମବଙ୍ଗ ଓ କର୍ଣ୍ଣାଟକରେ ପଜିଟିଭିଟି ହାର ୩୧% ରହିଛି ।