ଗାଁ ଉପରେ ଖସି ପଡ଼ିଲା ସେନା ବିମାନ; ୧୭ ମୃତ

ଇସଲାମାବାଦ: ପାକିସ୍ତାନର ରାୱଲପିଣ୍ଡିଠାରେ ଆଜି ଭୟଙ୍କର ବିମାନ ଦୁର୍ଘଟଣା ଘଟିଛି। ସେନାର ଏକ ବିମାନ ଏଠାରେ ଥିବା ଜନଗହଳିପୂର୍ଣ୍ଣ ଅଞ୍ଚଳରେ ଖସି ପଡ଼ିବାରୁ ୧୭ ଜଣଙ୍କ ମୃତ୍ୟୁ ଘଟିଛି। ବିମାନରେ ୫ ଜଣ ଯବାନ ଓ ୧୨ ଜଣ ସାଧାରଣ ନାଗରିକ ରହିଥିଲେ। ଦୁର୍ଘଟଣା ପରେ ସମସ୍ତଙ୍କର ମୃତ୍ୟୁ ଘଟିଛି।

ବିମାନଟି ଯେହେତୁ ଜନଗହଳିପୂର୍ଣ୍ଣ ଅଞ୍ଚଳରେ ଖସି ପଡ଼ିଥିଲା, ତେଣୁ ଏଠାରେ ଥିବା ଅନ୍ୟ ୧୨ ଜଣ ଗୁରୁତର ଆହତ ହୋଇଛନ୍ତି। ବିମାନଟି ଆକଶରେ ଉଡ଼ୁଥିବା ବେଳେ ହଠାତ୍‌ ତଳକୁ ଖସି ପଡ଼ିଥିଲା। ଏହାପରେ ଏଥିରେ ନିଆଁ ଲାଗି ଯାଇଥିଲା। ଯେଉଁ ବିଲଡିଂ ଉପରେ ବିମାନଟି ପଡ଼ିଥିଲା, ତା’ହା ସଂପୂର୍ଣ୍ଣ ରୂପେ ପାଉଁଶ ହୋଇଯାଇଛି।

ପାକ୍‌ ସେନା ପକ୍ଷରୁ କୁହାଯାଇଛି ଯେ, ସେନାର ଏକ ଛୋଟ ବିମାନ ସ୍ୱାଭାବିକ ଭାବେ ଉଡ଼ିବା ଆରମ୍ଭ କରିଥିଲା। ହେଲେ କିଛି ସମୟ ପରେ ରାୱଲପିଣ୍ଡି ସହରର ମୋରାକାଲୁ ଗାଁ ଉପରେ ଏହା ଅଚାନକ ଖସି ପଡ଼ିଥିଲା। ବିମାନଟି ଖସିବା ପରେ ତତ୍‌କ୍ଷଣାତ ସମଗ୍ର ଅଞ୍ଚଳରେ ନିଆଁ ବ୍ୟାପି ଯାଇଥିଲା। ଏଥିଯୋଗୁ ବହୁ କ୍ଷୟକ୍ଷତି ହୋଇଛି ।