୩ ବିକ୍ଷୋଭକାରୀଙ୍କୁ ଗୁଳି କରିଦେଲା ପୁଲିସ୍‌

ନୂଆଦିଲ୍ଲୀ : ମୋଦି ସରକାର ଅଣ ମୁସଲିମ ଶରଣାର୍ଥୀଙ୍କୁ ଭାରତର ନାଗରିକତା ଦେବା ପାଇଁ ଆଣିଥିବା ବିବାଦୀୟ ନାଗରିକତା ସଂଶୋଧନ ବିଲ(ସିଏବି)କୁ ବିରୋଧ କରି ସମଗ୍ର ଉତ୍ତର ପୂର୍ବ ରାଜ୍ୟଗୁଡ଼ିକରେ ସ୍ଥିତି ସାଂଘାତିକ ହୋଇପଡ଼ିଛି। ବିଶେଷ କରି ଆସାମ ଓ ତ୍ରିପୁରାରେ ବ୍ୟାପକ ହିଂସାକାଣ୍ଡ ଓ ପୋଡ଼ାଜଳା ଜାରି ରହିଛି।

ଆସାମର ଗୌହାଟୀରେ ସିଏବି ବିରୋଧରେ ବିକ୍ଷୋଭ କରୁଥିବା ଲୋକଙ୍କ ଉପରେ ପୁଲିସ୍‌ ଗୁଳିମାଡ଼ କରି ଦମନ କରିବାକୁ ମଧ୍ୟ ପଛାଇ ନାହିଁ। ଏଥିରେ ୩ ଜଣଙ୍କ ମୃତ୍ୟୁ ଘଟିଥିବା ବେଳେ ୧୦ରୁ ଅଧିକ ଲୋକ ଆହତ ହୋଇଛନ୍ତି। କର୍ଫ୍ୟୁ ସତ୍ତ୍ୱେ ଏମାନେ ଆନ୍ଦୋଳନ କରୁଥିବାରୁ ପୁଲିସ୍‌ କାର୍ଯ୍ୟାନୁଷ୍ଠାନ ସ୍ୱରୂପ ବିକ୍ଷୋଭକାରୀଙ୍କ ଉପରକୁ ଗୁଳିମାଡ଼ କରିଥିବା ଜଣାପଡ଼ିଛି।

ସ୍ଥିତିକୁ ଦୃଷ୍ଟିରେ ରଖି ଆସାମର ୧୦ଟି ଜିଲ୍ଲାରେ ଇଣ୍ଟରନେଟ ସେବାକୁ ଆଗାମୀ ୪୮ ଘଣ୍ଟା ପାଇଁ ବନ୍ଦ ରଖାଯାଇଥିବା ବେଳେ ଗୌହାଟୀ, ଦିବ୍ରୁଗଡ଼, ତେଜପୁର ଓ ଡେକିଆଜୁଲି, ତିନିଶୁକିଆ ଓ ଜୋରହାଟ ଭଳି ସ୍ଥାନରେ କର୍ଫ୍ୟୁ ଲାଗୁ କରାଯାଇଛି। ଶିଲଂର ବି ରାତି ୧୦ଟା ପରଠାରୁ ଅନିର୍ଦ୍ଦିଷ୍ଟ କାଳ ଯାଏ କର୍ଫ୍ୟୁ ଲାଗୁ ହେବ ବୋଲି ଘୋଷଣା କରାଯାଇଛି।

ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ ଲୋକଙ୍କୁ ଶାନ୍ତି ସ୍ଥାପନ ପାଇଁ ନିବେଦନ କରିଛନ୍ତି। ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ସିଏବି ଦ୍ୱାରା ଆସାମବାସୀଙ୍କ କିଛି ହେବନାହିଁ ପ୍ରତିଶ୍ରୁତି ଦେଇଛନ୍ତି। ତଥାପି ହଜାର ହଜାର ଲୋକ କର୍ଫ୍ୟୁ ସତ୍ତ୍ୱେ ରାଜରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିଛନ୍ତି। ବିକ୍ଷୋଭ ଯୋଗୁ ବିମାନ ଓ ଟ୍ରେନ ସେବାକୁ ବାତିଲ କରିଦିଆଯାଇଛି।

ସିଏବି ଗତକାଲି ରାଜ୍ୟସଭାରେ ପାସ ହେବା ପୂର୍ବରୁ ହିଁ ଆସାମ ସମେତ ଉତ୍ତରପୂର୍ବ ରାଜ୍ୟଗୁଡ଼ିକରେ ଆନ୍ଦୋଳନ ଆରମ୍ଭ ହୋଇଯାଇଥିଲା। ଗତକାଲି ସନ୍ଧ୍ୟାରେ ଏହି ବିଲ୍ ରାଜ୍ୟସଭାରେ ଅନୁମୋଦନ ଲାଭ କରିଥିଲା।

ଆଜି ସକାଳୁ ଆସାମ, ତ୍ରିପୁରା, ମେଘାଳୟ, ନାଗାଲ୍ୟାଣ୍ଡ, ମଣିପୁର ଭଳି ରାଜ୍ୟଗୁଡ଼ିକରେ ସିଏବିକୁ ନେଇ ଅଶାନ୍ତିର ବହ୍ନି ଦେଖିବାକୁ ମିଳିଥିଲା। ଉତ୍ତ୍ୟକ୍ତ ଲୋକମାନେ ବିଭିନ୍ନ ସ୍ଥାନରେ ବିକ୍ଷୋଭ କରିବା ସହ ପୋଡ଼ାଜଳା ଆରମ୍ଭ କରିଥିଲେ।

ତେବେ ବାଂଲାଦେଶୀ ଅନୁପ୍ରବେଶକାରୀ ସମସ୍ୟା ସହ ଜୁଝୁଥିବା ଆସାମରେ ସ୍ଥିତି ଅଧିକ ଜଟିଳ ହୋଇଥିଲା। ଗୌହାଟୀ, ଦିବ୍ରୁଗଡ଼ ଓ ଜୋରହାଟ ଅଞ୍ଚଳରେ ବ୍ୟାପକ ହିଂସାକାଣ୍ଡ ଘଟିଛି। କର୍ଫ୍ୟୁ ସତ୍ତ୍ୱେ ଆନ୍ଦୋଳନକାରୀମାନେ ଅନେକ ସରକାରୀ ଗାଡ଼ି ପୋଡ଼ି ଦେବା ସହ ଭଙ୍ଗାରୁଜା କରିଛନ୍ତି। ବିଭିନ୍ନ ସ୍ଥାନରେ ସେମାନେ ଟାୟାର ଜାଳି ରାସ୍ତା ରୋକ କରିଥିଲେ। ଏହି କାରଣରୁ ପୁଲିସ୍ ଓ ଆନ୍ଦୋଳନକାରୀଙ୍କ ମଧ୍ୟରେ ସଂଘର୍ଷ ଘଟିଥିଲା। ପୁଲିସ୍ ଲୋକଙ୍କ ଉପରକୁ ଗୁଳିମାଡ଼ କରିବାକୁ ମଧ୍ୟ ପଛାଇ ନଥିଲା।