Salman Khan’s Name on Terror Watchlist: ଆତଙ୍କବାଦୀ ୱାଚ୍ ଲିଷ୍ଟରେ ସଲମାନ ଖାନ, ପାକିସ୍ତାନର ବଢ଼ିଯାଇଛି ରାଗ

ପାକିସ୍ତାନ ହିନ୍ଦୀ ଚଳଚ୍ଚିତ୍ର ସୁପରଷ୍ଟାର ସଲମାନ ଖାନଙ୍କୁ ଆତଙ୍କବାଦୀ ୱାଚଲିଷ୍ଟରେ ରଖିଛି। ସଲମାନ ଖାନଙ୍କ ବେଲୁଚିସ୍ତାନ ଉପରେ ବୟାନକୁ ନେଇ ପାକିସ୍ତାନ କ୍ରୋଧିତ। ରବିବାର ରିୟାଦ ଫୋରମରେ ତାଙ୍କ ଭାଷଣ ସମୟରେ ଖାନ ବେଲୁଚିସ୍ତାନ ବିଷୟରେ କହିଥିଲେ । ଏହା ପରେ ପାକିସ୍ତାନ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ଏବଂ ତାଙ୍କୁ ଆତଙ୍କବାଦୀ ୱାଚଲିଷ୍ଟରେ ରଖାଯାଇଛି।

ରିପୋର୍ଟ ଅନୁଯାୟୀ, ପାକିସ୍ତାନ ସରକାର ସଲମାନ ଖାନଙ୍କୁ ଦେଶର ଆତଙ୍କବାଦ ବିରୋଧୀ ଆଇନ (୧୯୯୭) ଅଧୀନରେ ଚତୁର୍ଥ ସୂଚୀରେ ସାମିଲ କରିଥିବା ଜଣାପଡ଼ିଛି। ଏହି ତାଲିକାରେ ସାଧାରଣତଃ ଉଗ୍ରବାଦୀ ସଂଗଠନ କିମ୍ବା କାର୍ଯ୍ୟକଳାପ ସହିତ ଲିଙ୍କ୍ ଥିବା ସନ୍ଦେହ କରାଯାଉଥିବା ବ୍ୟକ୍ତିମାନଙ୍କୁ ଅନ୍ତର୍ଭୁକ୍ତ କରାଯାଏ। ଏହି ତାଲିକାରେ ଥିବା ବ୍ୟକ୍ତିମାନେ ତୀକ୍ଷ୍ନ ନଜରରେ ରହିବା ସହ ସମ୍ଭାବ୍ୟ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୁଅନ୍ତି।

ସଲମାନ ଖାନଙ୍କ ବିରୋଧରେ ପାକିସ୍ତାନର ବଡ଼ କାର୍ଯ୍ୟାନୁଷ୍ଠାନ 

୨୦୨୫ ମସିହା ଅକ୍ଟୋବର ୧୬ ତାରିଖରେ ବେଲୁଚିସ୍ତାନ ସରକାରଙ୍କ ଗୃହ ବିଭାଗ ଦ୍ୱାରା ଜାରି ହୋଇଥିବା ଏକ ବିଜ୍ଞପ୍ତି ଅନୁଯାୟୀ, ସଲମାନ ଖାନଙ୍କୁ "ଆଜାଦ ବେଲୁଚିସ୍ତାନର ସହଭାଗୀ" ବୋଲି କହିଥିଲା । । ଏହାର ଅର୍ଥ ହେଉଛି ସଲମାନ ଖାନ ବେଲୁଚିସ୍ତାନର ସ୍ୱାଧୀନତାକୁ ସମର୍ଥନ କରନ୍ତି। ରିୟାଦରେ ଏକ କାର୍ଯ୍ୟକ୍ରମରେ ସଲମାନ ଖାନ ବେଲୁଚିସ୍ତାନକୁ ପାକିସ୍ତାନଠାରୁ ପୃଥକ ବୋଲି ବର୍ଣ୍ଣନା କରିଥିଲେ । ଏହା ପରେ ବିବାଦ ଆରମ୍ଭ ହୋଇଥିଲା।

ସଲମାନ ଖାନ ରିୟାଦ ଫୋରମରେ କହିଥିଲେ, "ବର୍ତ୍ତମାନ, ଯଦି ଆପଣ ଏକ ହିନ୍ଦୀ ଫିଲ୍ମ ତିଆରି କରନ୍ତି ଏବଂ ସାଉଦି ଆରବରେ ରିଲିଜ୍ କରନ୍ତି, ତେବେ ଏହା ସୁପରହିଟ୍ ହେବ। ଯଦି ଆପଣ ଏକ ତାମିଲ, ତେଲୁଗୁ କିମ୍ବା ମାଲାୟଲମ ଫିଲ୍ମ ତିଆରି କରନ୍ତି, ତେବେ ଏହା କୋଟି କୋଟି ଟଙ୍କା ରୋଜଗାର କରିବ କାରଣ ଅନ୍ୟ ଦେଶରୁ ଏଠାକୁ ଏତେ ଲୋକ ଆସିଛନ୍ତି।

ବେଲୁଚିସ୍ତାନର ଲୋକ ଅଛନ୍ତି, ଆଫଗାନିସ୍ତାନର ଲୋକ ଅଛନ୍ତି, ପାକିସ୍ତାନର ଲୋକ ଅଛନ୍ତି, ସମସ୍ତେ ଏଠାରେ କାମ କରୁଛନ୍ତି।" ଏହି କାର୍ଯ୍ୟକ୍ରମରେ ଶାହରୁଖ ଖାନ ଏବଂ ଆମିର ଖାନ ମଧ୍ୟ ଉପସ୍ଥିତ ଥିଲେ। ସଲମାନଙ୍କ ଏହି ବୟାନ ସମଗ୍ର ପାକିସ୍ତାନରେ ଅସନ୍ତୋଷ ସୃଷ୍ଟି କରିଥିଲା। ପାକିସ୍ତାନ ଅଧିକାରୀ ଏବଂ ରାଜନୈତିକ ସମୀକ୍ଷକମାନେ ତାଙ୍କୁ "ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ" ବୋଲି ଅଭିଯୋଗ କରିଥିଲେ।