Digital Age Pushes: ଶିବଙ୍କ ମଥାରେ ଫୁଲ ଚନ୍ଦନ, ସାଙ୍ଗ ତୁମକୁ ନୂତନ ବର୍ଷର ଅଭିନନ୍ଦନ

ଶିବଙ୍କ ମଥାରେ ଫୁଲ ଚନ୍ଦନ, ସାଙ୍ଗ ତୁମକୁ ନୂତନ ବର୍ଷର ଅଭିନନ୍ଦନ । ପାହାଡ଼ ଉପରେ ଘର କରିଥିଲି ପବନ ଉଡେଇ ନେଲା, ତୁମ ପରି ସାଙ୍ଗ ଖୋଜି ପାଇଥିଲି ଝୁରି ଝୁରି ଦିନ ଗଲା । ଦିନଥିଲା ଏମିତି ଅନେକ ମିଠା ମିଠା ଲେଖା ସହ ସାଙ୍ଗକୁ ସାଙ୍ଗଟିଏ ଗ୍ରିଟିନ୍ସ କାର୍ଡ ଦେଇ ନୂଆବର୍ଷର ଅଭିନନ୍ଦନ ଜଣାଏ । ଆଉ ଦୂରରେ ଥିବା ବନ୍ଧୁ ପାଖକୁ ଏଇ ପୋଷ୍ଟ ଅଫିସ୍ ସାହାଯ୍ୟରେ ଗ୍ରିଟିନ୍ସ ଟିଏ ପଠାଇଦିଏ । ହେଲେ ଏବେର ଡିଜିଟାଲା ଜମାନାରେ ଆଉ ସେ ଗ୍ରିଟିନ୍ସ କାର୍ଡ ଦେଖିବାକୁ ମିଳୁନି । ସୋସିଆଲ ମିଡିଆ ନ୍ୟୁ ୟୁରର ଶୁଭେଚ୍ଛାକୁ ଲୁଚାଇଦେଉଛି । ତେଣୁ ଆମର ସେ ପୁରୁଣା ଦିନ ଗୁଡ଼ାକ ଏବେ ଧୀରେ ଧୀରେ ହଜିଗଲାଣି । 

ଏକଥାକୁ ପଢ଼ି ଆପଣଙ୍କର ବି ନିଶ୍ଚୟ ପିଲାଦିନ କଥା ମନେ ପଡ଼ିଯାଉଥିବ । ଆପଣ ସେ ଦିନକୁ ମନେପକାଇ ମୁରୁକି ହସିଦେଉଥିବେ । କିନ୍ତୁ ଏବେ ସୋସିଆଲ ମିଡିଆ ପାଇଁ ଆଉ ଗ୍ରିଟିନ୍ସ ଦୋକାନରେ ଗ୍ରାହକଙ୍କ ଭିଡ଼ ଜମୁନି । ତେଣୁ ବ୍ୟବସାୟୀମାନେ ବ୍ୟବସାୟ ହରାଇଛନ୍ତି । ପୂର୍ବରୁ ବାଲେଶ୍ଵର ବଜାରରେ ୫୦ରୁ ୬୦ଟି ଗ୍ରିଟିନ୍ସ ଦୋକାନ ପଡ଼ୁଥିବା ବେଳେ ବର୍ତ୍ତମାନ ଗୋଟିଏ କି ଦୁଇଟା ମିଳିବା କଷ୍ଟକର । ଷ୍ଟକ୍ ରହିଥିବା ଏହି କିଛି କାର୍ଡକୁ ଧରି ବ୍ୟବସାୟୀ ବିକ୍ରି କରୁଥିବାବେଳେ କିଏ କେତେବେଳେ କାର୍ଡ ଟିଏ କିଣିବ ତାକୁ ଅନାଇ ବସିଛନ୍ତି ।

ଡିଜିଟାଲର ଛାଟ ଭିତରେ ଇଏ ଆଉ ଗୋଟାଏ ପରମ୍ପରା ଯାହା ଲୋପ ପାଇବାକୁ ବସିଛି । ସମ୍ପର୍କର ନିବିଡତା ଦୁର୍ବଳ ହେଉଛି ଆଉ ଫେସବୁକ୍, ଇନଷ୍ଟାଗ୍ରାମ ସମସ୍ତଙ୍କୁ ଯେମିତି ବାନ୍ଧି ରଖିଛି ।