ଗରିବଙ୍କ ଭଗବାନ୍ ସୋନୁ ସୁଦଙ୍କୁ କରୋନା

• ଅଭିନେତା ସୋନୁ ସୁଦଙ୍କ କରୋନା ରିପୋର୍ଟ ପଜିଟିଭ୍
• ଟ୍ୱିଟ୍ କରି ସୂଚନା ଦେଲେ ସୋନୁ
• ହୋମ୍ କ୍ୱାରେଣ୍ଟିନରେ ରହି ଲୋକଙ୍କ କାମ କରିବି
• ଘରେ ବସି ଏବେ ଅଧିକ ସମୟ ଲୋକଙ୍କ ସହାୟତା କରିପାରିବି

ଅଭିନେତା ସୋନୁ ସୁଦଙ୍କୁ କରୋନା । ତାଙ୍କ ଟେଷ୍ଟ ରିପୋର୍ଟ ପଜିଟିଭ୍ ଆସିଥିବା ନେଇ ସେ ଟ୍ୱିଟ୍ କରି ସୂଚନା ଦେଇଛନ୍ତି । ରିପୋର୍ଟ ପଜିଟିଭ ଆସିବା ପରେ ସେ ହୋମ୍ କ୍ୱାରେଣ୍ଟାଇନରେ ରହିଛନ୍ତି । ତାଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି କରୋନା ଟେଷ୍ଟ କରାଇବାକୁ ସେ ନିବେଦନ କରିଛନ୍ତି । ତେବେ କରୋନାରେ ଆକ୍ରାନ୍ତ ହୋଇ ବି ସେ ଏହି ସମୟରେ ଲୋକଙ୍କ ପାଇଁ କାମ କରିବେ। ଏବେ ତାଙ୍କ ପାଖରେ ଅଧିକ ସମୟ ଥିବାରୁ ସେ ଲୋକଙ୍କୁ ଅଧିକରୁ ଅଧିକ ସାହାଯ୍ୟ କରିପାରିବେ ବୋଲି ଟ୍ୱିଟ୍ କରିଛନ୍ତି ।

ତାଲାବନ୍ଦ ବେଳେ ପ୍ରବାସୀ ଶ୍ରମିକ ଓ ବିଭିନ୍ନ ଅଞ୍ଚଳରେ ଫସି ରହିଥିବା ଲୋକଙ୍କୁ ଘରକୁ ପଠାଇ ସାରା ଦେଶରେ ଚର୍ଚ୍ଚାକୁ ଆସିଥିଲେ ସୋନୁ । ଏପରିକି ବିଭିନ୍ନ ଯାଗାରେ ନିଯୁକ୍ତ ଓ ଶ୍ରମିକଙ୍କ ପିଲାଙ୍କୁ ପାଠ ପଢ଼ାଇବା କାମ ସେ ଏବେ ଯାଏଁ ଜାରି ରଖିଛନ୍ତି । ଫଳରେ ସାରା ଦେଶ ତଥା ଦେସବାସୀ ତାଙ୍କର ଆଶୁ ଆରୋଗ୍ୟକାମନା କରିଛନ୍ତି ।

ମହାମାରୀର ପ୍ରଥମ ଲହରରେ ସୋନୁଙ୍କ ଏହି ମହାନତା ସୋସିଆଲ ମିଡିଆଠାରୁ ଆରମ୍ଭ କରି ଗଣମାଧ୍ୟମର ସିରୋନାମା ପାଲଟିଥିଲା । ସୋସିଆଲ ମିଡିଆରେ ସାହାଯ୍ୟ ପାଇଁ ଅନେକ ବାର୍ତ୍ତା ମଧ୍ୟ ଦିଆଯାଉଥିଲା । ଫେସବୁକ, ଟ୍ୱିଟର ଓ ଇନଷ୍ଟା ମାଧ୍ୟମରେ ସାହାଯ୍ୟର ଲମ୍ବା ତାଲିକା ଦେଖିବାକୁ ମିଳିଥିଲା । ତେବେ ସମସ୍ତଙ୍କ ପାଖରେ ପହଂଚିବା ତାଙ୍କ ପାଖରେ ଅନେକ ସମୟରେ କଷ୍ଟ ହେଉଥିଲା । ତେଣୁ ଯେଉଁଠୁ ପହଂଚୁ ନଥିଲେ ସେଠି କ୍ଷମା ପ୍ରାର୍ଥନା ବି କରୁଥିଲେ । ନିଜର ସାହାଯ୍ୟ ମନୋବୃତ୍ତି ପାଇଁ ମିଳିତ ଜାତିସଂଘରୁ ପୁରସ୍କୃତ ମଧ୍ୟ ହୋଇଥିଲେ । ସୋନୁଙ୍କ ଏହି ସାହାଯ୍ୟ ମନୋବୃତ୍ତି ଲାଗି ତାଙ୍କୁ ଶତ ଶତ ସଲାମ ।

ସୋନୁଙ୍କ ସାହାଯ୍ୟ ମନୋବୃତ୍ତିକୁ ସବୁଦିନ ମନେରଖିବେ ଦେଶବାସୀ । ଯେତେବେଳେ ନେତାମନ୍ତ୍ରୀମାନେ ଭୟରେ ଘରୁ ଗୋଡ଼ କାଢ଼ୁନଥିଲେ, ସେତେବେଳ ଲୋକଙ୍କୁ ସାହାଯ୍ୟ କରିବା ଉଦ୍ଦେଶ୍ୟରେ ନିଜର ଘର ବି ବନ୍ଧକ ରଖିଥିଲେ ଗରିବଙ୍କ ମସିହା । ଲକ୍ଷେ ନୁହେଁ କି ୨ ଲକ୍ଷର ନୁହେଁ ବରଂ ନିଜର ୧୦ କୋଟି ଟଙ୍କାର ସମ୍ପତ୍ତିକୁ ବନ୍ଧକ ରଖିଥିଲେ ସୋନୁ । ନିଜ ପାଇଁ ନୁହେଁ ସବୁବେଳେ ଅନ୍ୟ ପାଇଁ ଚିନ୍ତା କରନ୍ତି ସୋନୁ । ଅନ୍ୟକୁ ସାହାଯ୍ୟ କରି ଦେଶରେ ଚହଳ ସୃଷ୍ଟି କରିଛନ୍ତି ।