Cyber Fraud Gang Busted: ୫ କୋଟିରୁ ଉର୍ଦ୍ଧ୍ବ ଟଙ୍କା ଠକେଇର ପର୍ଦ୍ଦାଫାସ, ୧୫ ଜଣ ସାଇବର ଠକ ଗିରଫ

ଝାରସୁଗୁଡ଼ାରେ ୧୫ ଜଣ ସାଇବର ଠକ ଗିରଫ। ୫ କୋଟିରୁ ଅଧିକ ଟଙ୍କାର ଠକେଇର ପର୍ଦାଫାସ କଲା ଝାରସୁଗୁଡ଼ା ପୋଲିସ। ଏହି ସାଇବର ଠକ ଗ୍ୟାଙ୍ଗର ଅଭିଯୁକ୍ତଙ୍କୁ ବିଭିନ୍ନ ଥାନା ଅଞ୍ଚଳରୁ ଗିରଫ କରାଯାଇଛି। ସେମାନଙ୍କ ନିକଟରୁ ମୋବାଇଲ୍ ଫୋନ୍, ସିମ୍ କାର୍ଡ, ବ୍ୟାଙ୍କ ଡକ୍ୟୁମେଣ୍ଟ୍ ଏବଂ ଅନ୍ୟାନ୍ୟ ଅପରାଧମୂଳକ ସାମଗ୍ରୀ ସମେତ ଇଲେକ୍ଟ୍ରୋନିକ୍ ଉପକରଣ ଜବତ କରାଯାଇଛି। 

ଏହି ଠକମାନେ ସାଧାରଣ ଲୋକଙ୍କୁ ଟଙ୍କା ପ୍ରଲୋଭନ ଦେଖାଇ ସେମାନଙ୍କ ନାମରେ ବ୍ୟାଙ୍କ ଆକାଉଣ୍ଟ ଖୋଲିବାକୁ କହିଥାନ୍ତି। ଆକାଉଣ୍ଟ ଖୋଲିବା ପରେ, ସେମାନେ ଉକ୍ତ ଲୋକମାନଙ୍କ ଠାରୁ ପାସବୁକ୍, ଏଟିଏମ୍ କାର୍ଡ ଏବଂ ସେମାନଙ୍କ ନାମରେ ଜାରି ହୋଇଥିବା ସିମ୍ କାର୍ଡ ନିଜ ନିୟନ୍ତ୍ରଣକୁ ନେଇଯାଆନ୍ତି। 

ସାଇବର ଠକେଇ ନେଟୱାର୍କ ଦ୍ୱାରା ସୃଷ୍ଟି ହୋଇଥିବା ଠକେଇ ଟଙ୍କାକୁ ଲୁଚାଇବା ଏବଂ ବଣ୍ଟନ କରିବା ପାଇଁ ଏହି ବ୍ୟାଙ୍କିଙ୍ଗ୍ ଡକ୍ୟୁମେଣ୍ଟ୍ ଏବଂ ସିମ୍ କାର୍ଡଗୁଡ଼ିକୁ ଦେଶର ବିଭିନ୍ନ ପ୍ରାନ୍ତରେ ଥିବା ଅନ୍ୟ ସାଇବର ଠକମାନଙ୍କ ନିକଟକୁ ହସ୍ତାନ୍ତର କରାଯାଏ। 

ତେବେ ସାଇବର ଠକଙ୍କ ବିରୋଧରେ ଓଡ଼ିଶା ପୋଲିସ ଦ୍ୱାରା ଆରମ୍ଭ କରାଯାଇଥିବା ସ୍ୱତନ୍ତ୍ର ଅଭିଯାନ 'ସାଇବର କବଚ' ମାଧ୍ୟମରେ ଏହି ବଡ଼ ସଫଳତା ମିଳିଛି। ଝାରସୁଗୁଡ଼ା ପୋଲିସ ଅନଲାଇନ୍ ଆର୍ଥିକ ଠକେଇରେ ସମ୍ପୃକ୍ତ ଅନେକ ସାଇବର ଠକଙ୍କୁ ସଫଳତାର ସହ ଗିରଫ କରିଛି।