Husband Shoots: ସ୍ତ୍ରୀ ପଠାଇଲା ଡିଭୋର୍ସ ନୋଟିସ୍‌ , ଗୁଳିରେ ଜବାବ ଦେଲା ସ୍ୱାମୀ

କୋଉ ସ୍ୱାମୀ-ସ୍ତ୍ରୀ ଭିତରେ ବା ଝଗଡା ନ ହୁଏ । ହେଲେ ଏ ସାମାନ୍ୟ ଝଗଡା ଯେ କେତେ ଭୟଙ୍କର ରୂପ ନେଇପାରେ, ତାହା ଶୁଣିଲେ ଛାତି ଥରିଯିବ । ବେଙ୍ଗାଲୁରୁରେ ସେମିତି ଏକ ଘଟଣା ଘଟିଛି । ଜଣେ ବ୍ୟକ୍ତି ବିଚ୍‌ ରାସ୍ତାରେ ଗୁଳି କରି ମାରିଦେଇଛି ନିଜ ସ୍ତ୍ରୀକୁ । 

୧୫ ବର୍ଷର ବାହାଘର । ସ୍ୱାମୀ ବାଲାମୁରୁଗନ ଜଣେ ସଫ୍ଟୱେୟାର ଇଞ୍ଜିନିୟର । ସେ ଏକ ପ୍ରାଇଭେଟ ଫାର୍ମରେ କାମ କରୁଥିଲେ । ହେଲେ ୪ ବର୍ଷ ତଳେ ତାଙ୍କ ଚାକିରି ଚାଲି ଯାଇଥିଲା । ମୁରୁଗନଙ୍କ ସ୍ତ୍ରୀ ଭୁବନେଶ୍ୱରୀ ୟୁନିୟନ ବ୍ୟାଙ୍କରେ ଆସିଷ୍ଟାଣ୍ଟ ମ୍ୟାନେଜର ଥିଲେ । ଦୁହିଁଙ୍କ ଘର ତାମିଲନାଡୁର ସଲେମ ଜିଲ୍ଲାରେ । ୨୦୧୧ରେ ବାହାଘର ପରେ ଚାକିରି ଯୋଗୁଁ ୨୦୧୮ରେ ସେମାନେ ବେଙ୍ଗାଲୁରୁ ଚାଲିଆସିଥିଲେ । 

ସ୍ୱାମୀଙ୍କ ଚାକିରି ଯିବା ପରଠୁ ଉଭୟଙ୍କ ମଧ୍ୟରେ ଝଗଡା ଲାଗି ରହୁଥିଲା । ସ୍ତ୍ରୀର ଅନୈତିକ ସମ୍ପର୍କ ଥିବା ସନ୍ଦେହ କରୁଥିଲେ ବାଲାମୁରୁଗନ । ଏହି କାରଣରୁ ବିବାଦ ବଢିବା ପରେ ସ୍ତ୍ରୀ ଦୁଇ ପିଲାଙ୍କୁ ନେଇ ବର୍ଷେ ହେବ ଅଲଗା ରହୁଥିଲେ । ଏଇ ସପ୍ତାହେ ତଳେ ଡିଭୋର୍ସ ନୋଟିସ୍‌ ପଠାଇଥିଲେ ସ୍ତ୍ରୀ । ଯେଉଁଥିରେ ରାଗିଯାଇଥିଲେ ମୁରୁଗନ । ଆଉ ଡିଭୋର୍ସର ଜବାବ ଦେଇଥିଲେ ଗୁଳିରେ । 

ଗତକାଲି ସନ୍ଧ୍ୟାରେ ସ୍ତ୍ରୀ ଭୁବନେଶ୍ୱରୀ ବ୍ୟାଙ୍କରୁ ଫେରୁଥିବା ବେଳେ ଅଧବାଟରେ ଜଗିରହିଥିଲେ । ସୁଯୋଗ ମିଳିବା କ୍ଷଣି ସ୍ତ୍ରୀ ଉପରକୁ ଚାରି ରାଉଣ୍ଡ ଗୁଳି ଫୁଟାଇଥିଲେ । ଯେଉଁଥିରେ ତାଙ୍କର ମୃତ୍ୟୁ ହୋଇଥିଲା । ଏହାପରେ ଅଭିଯୁକ୍ତ ଥାନାକୁ ଯାଇ ସରେଣ୍ଡର କରିଥିଲେ । ଏହି ଘଟଣା ବେଙ୍ଗାଲୁରୁ ସହରରେ ଚାଞ୍ଚଲ୍ୟ ଖେଳାଇଛି ।