Speeding Car Rams Truck: କାର୍‌କୁ ୪ କିମି ଯାଏଁ ଘୋଷାଡ଼ି ନେଲା ଟ୍ରକ୍, ୪ ମୃତ

କଥାରେ ଅଛି ଦ୍ରୁତ ଗତି ମହାବିପତ୍ତି। ଏହା ଏବେ ସତ ହୋଇଛି। ଦ୍ରୁତ ଗତିରେ ଆସି ଏକ କାର୍ ଟ୍ରକକୁ ପଛପଟୁ ଧକ୍କା ଦେଇଛି। ଫଳରେ ଘଟଣାସ୍ଥଳରେ ହିଁ ଆଖି ବୁଜିଛନ୍ତି ୪ ଜଣ। ଆଉ ଜଣଙ୍କ ଅବସ୍ଥା ଗୁରୁତର ଅଛି। ଦିଲ୍ଲୀ ମୁମ୍ବାଇ ଏକ୍ସପ୍ରେସୱେରେ ଘଟିଛି ଏଭଳି କିଛି ମର୍ମନ୍ତୁଦ ସଡ଼କ ଦୁର୍ଘଟଣା।   

ପୋଲିସ ସୂଚନା ମୁତାବକ, ହରିୟାଣା ପଞ୍ଜିକରଣ ନମ୍ବର ଥିବା ଏକ କାରରେ ପାଞ୍ଚ ଜଣ ଥିଲେ । ସେମାନେ ଉଜ୍ଜୈନର ମହାକାଳ ମନ୍ଦିର ଦର୍ଶନ କରି ନୋଏଡା ଫେରୁଥିଲେ । ଏହି ସମୟରେ ଦ୍ରୁତ ଗତିରେ ଆସୁଥିବା କାରଟି ଏକ ଟ୍ରକ୍ ସହ ପଛପଟୁ ଧକ୍କା ହୋଇଥିଲା । ଏହା ଏତେ ଭୟଙ୍କର ଥିଲା ଯେ କାର୍ ଟି ଚୁରମାର୍ ହୋଇଯାଇଥିଲା। ଏଥିରେ ଘଟଣାସ୍ଥଳରେ ହିଁ ୪ ଜଣଙ୍କ ମୃତ୍ୟୁ ହୋଇଛି। ଆଉ ଜଣେ ବ୍ୟକ୍ତିଙ୍କ ଅବସ୍ଥା ଗୁରୁତର ଅଛି। 

ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ, ପାପଡା ଏବଂ ନାଙ୍ଗଲ ରାଜାୱତନ ପୋଲିସ ଷ୍ଟେସନର ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଥିଲେ। ପ୍ରଥମେ ଟ୍ରକ ଏବଂ କାର୍‌କୁ ଅଲଗା କରିବାକୁ ଚେଷ୍ଟା କରାଯାଇଥିଲା। ବ୍ୟାପକ କ୍ଷୟକ୍ଷତି ଯୋଗୁଁ, କାର୍‌କୁ କାଟିବା ପାଇଁ ସ୍ୱତନ୍ତ୍ର ଉପକରଣ ବ୍ୟବହାର କରିବାକୁ ପଡିଥିଲା। ବହୁତ ପରିଶ୍ରମ ପରେ, ମୃତଦେହଗୁଡ଼ିକୁ ବାହାର କରାଯାଇ ଦୌସା ଜିଲ୍ଲା ହସ୍ପିଟାଲର ଶବଗୃହରେ ରଖାଯାଇଛି। ଆହତ ବ୍ୟକ୍ତିଙ୍କୁ ମଧ୍ୟ ଦୌସା ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଛି। ଯେଉଁଠାରେ ତାଙ୍କ ଅବସ୍ଥା ସଙ୍କଟାପନ୍ନ ରହିଛି। 

ଗୁରୁତର ବ୍ୟକ୍ତି ପୋଲିସକୁ ଦେଇଥିବା ବୟାନ ମୁତାବକ, ଦୁର୍ଘଟଣା ପରେ, ଟ୍ରକ୍ ଡ୍ରାଇଭର କାରକୁ ୪ କିଲୋମିଟର ଯାଏ ଘୋଷାଡ଼ି ନେଇଥିଲା । ଯାହା ପରିସ୍ଥିତିକୁ ଆହୁରି ଖରାପ କରିଥିଲା ।

ସେପଟେ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଟ୍ରକ୍ ଡ୍ରାଇଭର ଦୁର୍ଘଟଣା ବିଷୟରେ ତୁରନ୍ତ ଜାଣିପାରିଲେ ନାହିଁ, ଫଳରେ କାରଟି ଟ୍ରକ୍ ସହିତ କିଛି ଦୂର ପର୍ଯ୍ୟନ୍ତ ଟାଣି ହୋଇ ଯାଇଥିଲା। ପୁଲିସ ଅନୁଯାୟୀ, ଦୁର୍ଘଟଣାଟି ଦ୍ରୁତଗତି ଯୋଗୁଁ ହୋଇଥିବା ଅନୁମାନ କରାଯାଉଛି। କିନ୍ତୁ ଦୁର୍ଘଟଣାର ପ୍ରକୃତ କାରଣ ତଦନ୍ତ ପରେ ଜଣାପଡିବ। ଏହି ଦୁର୍ଘଟଣା ଯୋଗୁଁ ଦିଲ୍ଲୀ-ମୁମ୍ବାଇ ଏକ୍ସପ୍ରେସୱେରେ କିଛି ସମୟ ପାଇଁ ଯାତାୟାତ ବାଧାପ୍ରାପ୍ତ ହୋଇଥିଲା।