ରାତିର କିଟି କିଟି ଅନ୍ଧାରରେ ସବୁ ବନ୍ୟାଞ୍ଚଳର ସମାନ ଦୃଶ୍ୟ

ଖୋର୍ଦ୍ଧା, ପୁରୀ, କଟକ ଅବା କେନ୍ଦ୍ରାପଡ଼ା... ଗାଁ ଯେଉଁଠି ବି ଥାଉ, ଯେଉଁ ନଈ କୂଳ ଲଂଘିଥାଉ... ରାତିର କିଟି କିଟି ଅନ୍ଧାରରେ ସବୁ ବନ୍ୟାଞ୍ଚଳର ସମାନ ଦୃଶ୍ୟ ଦେଖିବାକୁ ମିଳିଛି। ସବୁ ବିପନ୍ନଙ୍କ ସମାନ ଦୁର୍ଦ୍ଦଶା। ସଞ୍ଜ ନଇଁଲେ ବଢ଼ି ପାଣିକୁ ଗିଳି ଚଉଦିଗରୁ ମାଡ଼ି ମାଡ଼ି ଆସେ ଘନ ଅନ୍ଧାରର ବନ୍ୟା ଆଉ ଦିନସାରା ସାହାଯ୍ୟ ଟିକେ ପାଇବା ଆଶାରେ ଏଣେ ତେଣେ ଧାଁଦୌଡ଼ କରୁଥିବା ବାସହରା ମଣିଷମାନେ, ପଶିଯାଆନ୍ତି ଏଇ ମିଞ୍ଜି ମିଞ୍ଜି ଡିବି ଜଳୁଥିବା ଜରିପାଲ ଭିତରକୁ। କିଏ ଭାତ ଟିକେ ଫୁଟାଏ, ଆଉ କିଏ ପିଲାଙ୍କ ମୁହଁରେ ଶୁଖିଲା ଚୁଡ଼ାମୁଢ଼ି ଟିକେ ଦେଇ, ନିଜେ ଭୋକକୁ ଗିଳି ଶୋଇଯାଏ।