କେରଳରେ ବର୍ଷାର ତାଣ୍ଡବ; ବନ୍ୟାରେ ଚାଲି ଗଲା ୨୪ ଜୀବନ

ଥିରୁଅନନ୍ତପୁରମ୍‌: କେରଳରେ ବର୍ଷାର ତାଣ୍ଡବ। ଲଗାଣ ବର୍ଷା ଯୋଗୁ ବିଭିନ୍ନ ସ୍ଥାନରେ ବନ୍ୟା ଓ ଭୂସ୍ଖଳନରେ ଗତ ୨୪ ଘଣ୍ଟା ମଧ୍ୟରେ ୨୪ଜଣଙ୍କ ମୃତ୍ୟୁ ଘଟିଥିବା ବେଳେ, ୪ଜଣ ନିଖୋଜ ଅଛନ୍ତି। ୱେନାଦ୍‌ରେ ଫସି ରହିଥିବା ଲୋକଙ୍କୁ ଉଦ୍ଧାର ପାଇଁ ନୌସେନାର ୪ଟି ଟିମ୍‌ ଓ ଏକ ସି କିଙ୍ଗ୍‌ ହେଲିକପ୍ଟର ପଠାଯାଇଛି।

ଏନ୍‌ଡିଆର୍‌ଏଫ୍‌ର ୩ଟି ଟିମ୍‌ କୋଝିକୋଡ୍‌, ଇର୍‌ନାକୁଲମ୍‌ ଓ ଆଲ୍‌ପୁଝା ଜିଲ୍ଲାରେ ମୁତୟନ କରାଯାଇଛି। ସେନା, ନୌସେନା, ପୁଲିସ୍‌ ଓ ଦମକଳ ବାହିନୀ ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି। ଅନ୍ୟପକ୍ଷରେ, କେରଳ ସରକାର ଜରୁରୀ ସ୍ଥିତିର ମୁକାବିଲା ପାଇଁ ନୌସେନା, ସ୍ଥଳ ସେନାବାହିନୀ ଓ ବାୟୁ ସେନାର ସହଯୋଗ ଲୋଡ଼ିଛନ୍ତି।

କୋଚି ବିମାନବନ୍ଦରରେ ଗତକାଲି ୨ଘଣ୍ଟା ପର୍ଯ୍ୟନ୍ତ ସମସ୍ତ ଅନ୍ତର୍ଜାତୀୟ ଓ ଘରୋଇ ବିମାନ ଗୁଡ଼ିକର ଅବତରଣ କୁ ବାତିଲ କରାଯାଇଥିଲା। ସେହିପରି ତଳିଆ ଅଞ୍ଚଳର ଲୋକମାନଙ୍କୁ ସୁରକ୍ଷିତ ସ୍ଥାନକୁ ନିଆଯିବା ସହ ବିଭିନ୍ନ ସ୍ଥାନରେ ରେଡ୍‌ ଆଲର୍ଟ ଜାରି କରାଯାଇଛି।

ଇଡ୍ଡୁକି ଜିଲ୍ଲାରେ ପ୍ରବଳ ବର୍ଷା ଯୋଗୁ ୧୧ ଜଣଙ୍କ ମୃତ୍ୟୁ ଘଟିଥିବା ବେଳେ, ମାଲାପୁରମ୍ମରେ ୬, ୱେନାଦ୍‌ରେ ୧, କୋଝିକୋଡ୍‌ରେ ୨ ଜଣ ବ୍ୟକ୍ତିଙ୍କ ମୃତ୍ୟୁ ଘଟିଛି। ସେହିପରି ପାଲାକ୍କଡ଼୍‌, ୱେନାଦ୍‌ ଓ କୋଝିକୋଡ୍‌ରେ ଏକାଧିକ ଲୋକ ନିଖୋଜ ଅଛନ୍ତି। ତେବେ ଆସନ୍ତା ୨୪ଘଣ୍ଟା ମଧ୍ୟରେ କେରଳର ଅନେକ ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି।