Wedding Goes Viral: ହାତରେ ନୁହେଁ, UPIରେ ମାଗିଲେ ଆଶୀର୍ବାଦ...ବାହାଘରରେ କନ୍ୟା ପିତାଙ୍କ ଅଜବ କାମ

ସୋସିଆଲ ମିଡିଆରେ ଏବେ ଗୋଟିଏ ବାହାଘରର ଭିଡିଓ ବେଶ୍ ଭାଇରାଲ ହେବାରେ ଲାଗିଛି । ଆଉ ଏହି ଭାଇରାଲର କାରଣ ହେଲେ କନ୍ୟାର ବାପା । ଝିଅ ବାହାଘରରେ ବାପା ଏମିତି ଡ୍ରେସ୍ ପିନ୍ଧିଲେ ଯେ, ତାକୁ ନେଇ ଏବେ ଚାରିଆଡେ ଚର୍ଚ୍ଚା । କାରଣ ସେ ଏମିତି ସେମିତି ଡ୍ରେସ ପିନ୍ଧିନଥିଲେ, ପିନ୍ଧିଥିଲେ କ୍ୟୁଆର କୋଡ୍ ବାଲା ଡ୍ରେସ୍ । ଆଉ ବାହାଘରକୁ ଆସୁଥିବା ଅତିଥିମାନେ ଗିଫ୍ଟ ଦେବା ବଦଳରେ ଏହି କ୍ୟୁଆର କୋଡ୍‌ ସ୍କାନ କରି କରୁଥିଲେ ପେମେଣ୍ଟ ।

ଏହି ଭିଡିଓଟି କେରଳର । ଯାହା ଏବେ ଖୁବ୍ ଭାଇରାଲ ହେବାରେ ଲାଗିଛି । ଏଥିରେ ଦେଖାଯାଉଛି, ରଙ୍ଗବେରଙ୍ଗୀ ଲାଇଟ୍‌ରେ ଝଲସୁଛି ବିବାହ ମଣ୍ଡପ । ଆଉ ହସ ହସ ମୁହଁରେ ଏଣ୍ଟ୍ରି ଗେଟ୍‌ରେ ଛିଡା ହୋଇ ଅତିଥିଙ୍କୁ ସ୍ୱାଗତ କରୁଛନ୍ତି କନ୍ୟାଙ୍କ ବାପା । ତାଙ୍କ ସାର୍ଟରେ ଲାଗିଛି ପେଟିଏମ୍ କ୍ୟୁଆର୍ କୋଡ୍ । ଅତିଥିମାନେ ପାରମ୍ପରିକ ଲିଫାପା ବଦଳରେ ନିଜ ମୋବାଇଲ ବାହାର କରି କୋଡ୍ ସ୍କାନ କରି ଫଠାଉଛନ୍ତି ଟଙ୍କା ।

ବାହାଘରରେ ବରକନ୍ୟାକୁ ଉପହାର କିମ୍ବା ରଙ୍ଗୀନ୍ ଲିଫାପାରେ ପଇସା ରଖି ଆଶୀର୍ବାଦ ଦେବାର ପରମ୍ପରା ରହିଛି ଆମ ଦେଶରେ । ହେଲେ ଆଜିର ଡିଜିଟାଲ ଜମାନାରେ ବଦଳିବାରେ ଲାଗିଛି ଏ  ପରମ୍ପରା । କେରଳର ଏହି ବିବାହ ଭିଡିଓ ସୋସିଆଲ ମିଡିଆରେ ପକାଇଛି ଚହଳ । ନାନା ମଜାଳିଆ କମେଣ୍ଟ ବର୍ଷା କରିଛନ୍ତି ୟୁଜର୍ସ ।

କିଏ କହିଲେ, ଡିଜିଟାଲ ଇଣ୍ଡିଆର ବାହାଘର ଏଡିସନ୍ ଆସିଗଲା ତ ଆଉ କିଏ ଲେଖିଲେ, ଏବେ କ୍ୟାସ୍ ନୁହେଁ, ଖାଲି ସ୍କାନ । ଆଉ କେହି ଏହି ପଦକ୍ଷେପକୁ ଜିରୋ ପେପର୍ ୱେଷ୍ଟର ଉଦାହରଣ କହି ତାରିଫ୍ କରୁଥିବା ବେଳେ ଆଉ କିଛି ସମାଲୋଚନା ବି କରିଛନ୍ତି ।