OCA ନିର୍ବାଚନ: ପ୍ରଣବ ସଭାପତି, ସଞ୍ଜୟ ସମ୍ପାଦକ

ଓଡ଼ିଶା କ୍ରିକେଟ ଆସୋସିଏସନ କର୍ମକର୍ତ୍ତା ନିର୍ବାଚନରେ ସଭାପତି ଭାବେ ପ୍ରଣବ ପ୍ରକାଶ ଦାସ ନିର୍ବାଚିତ । ସେହିପରି ଭାବେ ସାଧାରଣ ସଂପାଦକ ହେଲେ ସଂଜୟ ବେହେରା, ଉପସଭାପତି ପଙ୍କଜ ଲୋଚନ ମହାନ୍ତି, କୋଷାଧ୍ୟକ୍ଷ ଭାବେ ବିକାଶ ପ୍ରଧାନ ନିର୍ବାଚିତ ହୋଇଛନ୍ତି । ଜଣେ ଲେଖାଏଁ ପ୍ରାର୍ଥୀ ଥିବାରୁ ସମସ୍ତେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଛନ୍ତି ।

ଓସିଏ ନିର୍ବାଚନ ପାଇଁ ସଞ୍ଜୟ ବେହେରାଙ୍କ ପ୍ୟାନେଲର ୬ଜଣ ସଦସ୍ୟ ନାମାଙ୍କନ ଦାଖଲ କରିଥିଲେ । ସଭାପତି ପାଇଁ ଯାଜପୁର ବିଧାୟକ ତଥା ବିଜେଡି ସାଙ୍ଗଠନିକ ସାଧାରଣ ସମ୍ପାଦକ ପ୍ରଣବ ପ୍ରକାଶ ଦାସ, ଉପସଭାପତି ପାଇଁ ପଙ୍କଜ ଲୋଚନ ମହାନ୍ତି, ସମ୍ପାଦକ ପାଇଁ ସଂଜୟ ବେହେରା ଓ କୋଷାଧ୍ୟକ୍ଷ ପାଇଁ ବିକାଶ ପ୍ରଧାନ ନାମାଙ୍କନ ଦାଖଲ କରିଥିଲେ ।

ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ଓସିଏ ସଭାପତି ଭାବେ ନାମାଙ୍କନ ଦାଖଲ କରିବା ପ୍ରସଙ୍ଗକୁ ନେଇ ଆରମ୍ଭ ହୋଇଛି ରାଜନୀତି । ବିଜେପି କହିଛି, ଖେଳରେ ମଧ୍ୟ ରାଜ୍ୟ ସରକାର ମୁଣ୍ଡ ପୂରେଇବା ଆରମ୍ଭ କରିଛନ୍ତି । ଖେଳ ଜଗତକୁ ଧ୍ୱଂସ କରିବାକୁ ଯୋଜନା କରୁଛନ୍ତି । ଜବାବରେ ବିଜେଡି କହିଛି, ଓସିଏ ପୂର୍ବରୁ ମଧ୍ୟ ରାଜନୈତିକ ଲୋକଙ୍କ ହାତକୁ ଯାଇଛି । ତେଣୁ ରାଜନୈତିକ ବ୍ୟକ୍ତିଙ୍କ ହାତକୁ ଯିବା ଅର୍ଥ ରାଜନୀତି କରିବା ନୁହେଁ ବୋଲି କହିଛନ୍ତି ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି ।