ରେକର୍ଡ କଲେ ଏଜାଜ୍ ପଟେଲ୍ ! ୧୧୯ ରନ୍ ବିନିମୟରେ ଭାରତର ସମସ୍ତ ୧୦ ୱିକେଟ ନେଲେ

ନୂଆଦିଲ୍ଲୀ : ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଖେଳାଯାଉଥିବା ମୁମ୍ବାଇ ଟେଷ୍ଟ ମ୍ୟାଚରେ ଇତିହାସ ସୃଷ୍ଟି ହୋଇଛି । ନ୍ୟୁଜିଲ୍ୟାଣ୍ଡର ଏଜାଜ୍ ପଟେଲ ଭାରତର ୧୦ ୱିକେଟ୍ ନେଇଛନ୍ତି । ସେ ବିଶ୍ୱର ତୃତୀୟ ବୋଲର ଭାବେ ଟେଷ୍ଟ କ୍ରିକେଟରେ ପରଫେକ୍ଟ ଟେନ୍‌ ଅର୍ଥାତ ଗୋଟିଏ ଇନିଂସ୍‌ରେ ସମସ୍ତ ୧୦ ଜଣ ବ୍ୟାଟସମ୍ୟାନଙ୍କୁ ଆଉଟ କରିଛନ୍ତି । ଏହା ସହିତ ସେ ଭାରତୀୟ ସ୍ପିନର ଅନିଲ କୁମ୍ବଲେଙ୍କ ରେକର୍ଡ ସହ ସମାନ ହୋଇ ପାରିଛନ୍ତି । ମୁମ୍ବାଇ ଟେଷ୍ଟର ପ୍ରଥମ ଇନିଂସରେ ଏଜାଜ ପଟେଲ ଟିମ୍ ଇଣ୍ଡିଆର ସମସ୍ତ ଦଶ ଜଣ ବ୍ୟାଟ୍ସମ୍ୟାନଙ୍କ ୱିକେଟ୍ ନେଇଛନ୍ତି ।

ମୁମ୍ବାଇର ୱାଙ୍ଖଡେ ଷ୍ଟାଡିମରେ ଚାଲିଥିବା ଦ୍ୱିତୀୟ ଟେଷ୍ଟରେ ଟିମ୍ ଇଣ୍ଡିଆା ୩୨୫ରନରେ ଅଲ୍ ଆଉଟ ହୋଇଛି । ଭାରତ ପକ୍ଷରୁ ମୟଙ୍କ ଅଗ୍ରୱାଲ ସର୍ବାଧିକ ୧୫୦ ରନ୍‌ କରିଥିବା ବେଳେ ଅକ୍ଷର ପଟେଲ ୫୨ ରନ୍‌ ଇନିଂସ୍‌ ଖେଳିଛନ୍ତି । ଏହି ମ୍ୟାଚରେ ନ୍ୟୁଜିଲାଣ୍ଡ ବୋଲର ଏଜାଜ୍ ପଟେଲ ୧୦ଟି ଉଇକେଟ ଅକ୍ତିଆର କରି ଏକ ରେକର୍ଡ କରିଛନ୍ତି ।

ଭାରତୀୟ ବଂଶୋଦ୍ଭବ ବୋଲର ଏଜାଜ୍ ପଟେଲ ଆଠବର୍ଷ ବୟସରୁ ନ୍ୟୁଜିଲାଣ୍ଡରେ ରହୁଛନ୍ତି । ୧୯୯୬ରୁ ତାଙ୍କ ବାପା ମା’ ଭାରତ ଛାଡ଼ି ନ୍ୟୁଜିଲ୍ୟାଣ୍ଡ ଚାଲି ଯାଇଥିଲେ। ସେବେଠାରୁ ଏଜାଜ ସେହିଠାରେ ହିଁ କ୍ରିକେଟ ଖେଳୁଛନ୍ତି । ଏଜାଜ୍ ଏକାକୀ ଭାରତର ସମସ୍ତ ବ୍ୟାଟସମ୍ୟାନଙ୍କୁ ଅଡୁଆରେ ପକାଇଥିଲେ । ଏଜାଜ୍ ୧୧୯ରନ ଦେଇ ୧୦ଟି ଉଇକେଟ ଅକ୍ତିଆର କରିଛନ୍ତି ।

ଗତକାଲି ସେ ୪ ଜଣ ବ୍ୟାଟସମ୍ୟାନଙ୍କୁ ଆଉଟ କରିଥିବା ବେଳେ ଆଜି ବାକି ୬ ଜଣଙ୍କ ୱିକେଟ ହାସଲ କରିଛନ୍ତି । ସେ ତୃତୀୟ ବୋଲର ଭାବେ ଗୋଟିଏ ଇନିଂସରେ ୧୦ଟି ଉଇକେଟ ପାଇଛନ୍ତି । ଏହାପୂର୍ବରୁ ଜିମ୍ ଲେକର ଓ ଭାରତର ଅନିଲ କୁମ୍ବଲେ ୧୦ଟି ଲେଖାଏଁ ଉଇକେଟ ନେଇଥିଲେ ।

ଜିମ୍ ଲେକେର ଅଷ୍ଟ୍ରେଲିଆ ବିପକ୍ଷରେ ୧୯୫୬ ମସିହାରେ ୧୦ ୱିକେଟ ହାସଲ କରିଥିଲେ । ଓଲ୍ଡ ଟ୍ରାଫୋର୍ଡରେ ଖେଳା ଯାଇଥିବା ଏହି ମ୍ୟାଚ୍‌ରେ ସେ ମାତ୍ର ୫୩ ରନ୍‌ ବ୍ୟୟର ପରଫେକ୍ଟ ଟେନ୍‌ ହାସଲ କରିଥିଲେ। କୁମ୍ବଲେ ମଧ୍ୟ ମାତ୍ର ୨୬.୩ ଓଭର୍‌ରେ ୭୪ ରନ୍‌ ବ୍ୟୟ କରି ଏହି ସଫଳତା ହାସଲ କରିଥିଲେ।