'ଅହଂ ଜୁବେର୍ ଖାନ୍', 'ଅହଂ ୟୁନୁସ୍ ଖାନ୍'; ସଂସ୍କୃତରେ ଶପଥ ନେଲେ ମୁସଲିମ ବିଧାୟକ

ଚଳିତବର୍ଷ ରାଜସ୍ଥାନ ନିର୍ବାଚନରେ ଅଲୱର ରାମଗଡର ନବ ନିର୍ବାଚିତ କଂଗ୍ରେସ ବିଧାୟକ ଜୁବେର୍ ଖାନ୍ ଓ ଡିଡବାନା ସିଟ୍‌ରୁ ନିର୍ବାଚିତ ହୋଇଥିବା ସ୍ୱାଧୀନ ବିଧାୟକ ୟୁନୁସ ଖାନ୍ ଚର୍ଚ୍ଚାରେ ଅଛନ୍ତି । ଏହାର କାରଣ ବିଧାନସଭାରେ ସେମାନଙ୍କ ଶପଥ ଗ୍ରହଣ । ଏହି ଶପଥ ଗ୍ରହଣ ଉତ୍ସବରେ ଏମିତି କଣ କଲେ ? ଯାହାଫଳରେ ତାଙ୍କୁ ନେଇ ଚର୍ଚ୍ଚା ଆରମ୍ଭ ହୋଇଛି । ଏନେଇ ଆପଣଙ୍କ ମନରେ ପ୍ରଶ୍ନ ଆସୁଥିବ ।

ତେବେ ପୁରା କାହାଣୀଟି ହେଲା, ବିଧାନସଭାରେ ଶପଥ ଗ୍ରହଣ ଉତ୍ସବରେ ଉଭୟ ମୁସଲମାନ ବିଧାୟକ ସଂସ୍କୃତରେ ନେଇଛନ୍ତି ଶପଥ । ଆଉ ତା ବି ପୁରା ସ୍ପଷ୍ଟ ଭାବେ ଉଚ୍ଚାରଣ କରି । ଏନେଇ ଉଭୟ ବିଧାୟକଙ୍କ କହିବା କଥା, ସଂସ୍କୃତ କୌଣସି ଧର୍ମର ଭାଷା ନୁହେଁ। ସଂସ୍କୃତ ଉପରେ ସମସ୍ତଙ୍କର ଅଧିକାର ରହିଛି। ଏହି ଭାଷା ଭାରତର ସବୁଠୁ ପ୍ରାଚୀନ ଭାଷା। ତେଣୁ ଭାରତୀୟ ଭାବେ ଏନେଇ ଆମେ ଗର୍ବିତ।