ଆମ ଓଡ଼ିଶା, ନବୀନ ଓଡ଼ିଶା ସ୍କିମ୍ ନାଁରେ ଗ୍ରାମାଂଚଳ ଭୋଟ୍ ହାତେଇବାକୁ ବିଜେଡିର ପ୍ରୟାସ । ଦଳୀୟ ନେତାମାନେ ଗାଁ ଗାଁ ବୁଲି, ପ୍ରକଳ୍ପ ବାଛିବା ଆଳରେ କରୁଛନ୍ତି ସଭା ସମିତି । ନୂଆ ସ୍କିମରେ ପଂଚାୟତ ପିଛା ୫୦ ଲକ୍ଷ ପର୍ଯ୍ୟନ୍ତ ସହାୟତା ଦିଆଯିବା ବ୍ୟବସ୍ଥା ଥିବାରୁ ଏଥିରୁ ଭରପୁର ଫାଇଦା ଉଠାଇବା ଚକ୍କରରେ ରହିଛି ଶାସକ ଦଳ । ଯାହାକୁ ନେଇ ତେଜିଛି ରାଜନୀତି । ବିରୋଧୀ କହିଛନ୍ତି, ବିଜେଡି ଦଳୀୟ ଭିତ୍ତିରେ ଟଙ୍କା ବାଣ୍ଟି ରାଜନୈତିକ ମାହୋଲ ଖରାପ କରୁଛି। ବିଜେଡିର ଜବାବ, ଗାଁର ବିକାଶ ପାଇଁ ଏହି ଯୋଜନା କରାଯାଇଛି ।
ଭୋଟରଙ୍କୁ ହାତରେ ରଖିବା ପାଇଁ ବିଜେଡିର ବଡ଼ ପ୍ଲାନ୍ । ନବୀନ ଓଡ଼ିଶା ସ୍କିମ୍ ମାଧ୍ୟମରେ ଗାଁ ଲୋକଙ୍କୁ ପ୍ରଭାବିତ କରିବାକୁ ଉଦ୍ୟମ ପ୍ରଶାସନ ବଦଳରେ ବିଜେଡି ନେତା ଆଣୁଛନ୍ତି ପ୍ରସ୍ତାବ! ପ୍ରକଳ୍ପ ଚୟନ ନାଁରେ ହେଉଛି ଦଳୀୟ ସଭା ସମିତି, ପ୍ରସ୍ତୁତ ହେଉଛି ଗାଁ ଭୋଟ୍ ପ୍ଲାନ । ରାଜ୍ୟ ସରକାରଙ୍କ ନୂଆ ଯୋଜନା- ଆମ ଓଡ଼ିଶା,ନବୀନ ଓଡିଶା ପାଇଁ ଚାଲିଛି ସଭା ସମିତି । ବିଜେଡିର ବିଧାୟକ, ସାଂସଦ ଓ ଦଳୀୟ ନେତା ବାଛୁଛନ୍ତି ଗାଁ ପାଇଁ ପ୍ରକଳ୍ପ । ସ୍କିମ୍ ଲାଗୁ ହେବା ପରେ ବିଜେଡିର ନେତାମାନଙ୍କୁ ଗାଁ ଗଣ୍ଡାରୁ ପ୍ରକଳ୍ପ ପ୍ରସ୍ତାବ ଆଣିବା ଲାଗି ଦିଆଯାଇଛି ଟାସ୍କ । ଏଥିପାଇଁ ୨୧, ୨୫, ୨୭ ଜୁଲାଇ ଭିତରେ ଲୋକଙ୍କ ଫିଡବ୍ୟାକ୍ ନେଇ ପ୍ରକଳ୍ପର ଚିଠା ପ୍ରସ୍ତାବ ଦେବାକୁ କୁହାଯାଇଛି । ତେଣୁ ଗାଁ ଗାଁରେ ମାତିଛନ୍ତି ଦଳର ନେତା, କର୍ମୀ ।
ଚିଲିକା ନିର୍ବାଚନ ମଣ୍ଡଳୀର ୧୫ ନମ୍ବର ଜିଲ୍ଲା ପରିଷଦ ଜୋନ୍ରେ ଖୋର୍ଦ୍ଧା ଜିଲ୍ଲାର ପୁରା ବିଜେଡି ଟିମ୍ ପହଁଚି ପ୍ରତି ପଂଚାୟତରୁ ଆସିଥିବା ପ୍ରସ୍ତାବକୁ ନେଇ ଆଲୋଚନା କରୁଛନ୍ତି । ଠିକ୍ ସେଭଳି ଗଞ୍ଜାମ ଜିଲ୍ଲା ଖଲ୍ଲିକୋଟ ନିର୍ବାଚନ ମଣ୍ଡଳୀରେ ବିଜେଡି ବିଧାୟିକା ସୂର୍ଯ୍ୟମଣି ବୈଦ୍ୟ ବିଭିନ୍ନ ପଂଚାୟତରେ ବୈଠକ କରି ପ୍ରକଳ୍ପ ବାଛିବା କାମରେ ଲାଗିଛନ୍ତି ।
Also Read
ଅନ୍ୟପଟେ ଜୟପୁର ନିର୍ବାଚନ ମଣ୍ଡଳୀରେ ବିଜେଡି ନେତା ରବି ନାରାୟଣ ନନ୍ଦ ସଭା କରି କେଉଁ ଗାଁକୁ କେତେ ଟଙ୍କା ଦିଆଯିବ, କେଉଁ ପ୍ରକଳ୍ପ ହାତକୁ ନିଆଯିବ ସେନେଇ ଆଲୋଚନା କରିଛନ୍ତି। ସାରା ରାଜ୍ୟରେ ଏହି ପ୍ରକ୍ରିୟା ଜାରି ରହିଛି ।
ସେପଟେ ଏହି ସ୍କିମ୍ ପାଇଁ ପ୍ରକଳ୍ପ ବାଛିବା ବାହାନାରେ ଆଗାମୀ ନିର୍ବାଚନ ପାଇଁ ମାହୋଲ୍ ବନାଉଛି ବିଜେଡି । ଗ୍ରାମାଂଚଳ ଭୋଟରଙ୍କୁ ପ୍ରଭାବିତ କରିବାକୁ ହେଉଛି ଉଦ୍ୟମ । ନୂଆ ଯୋଜନାରେ ପଂଚାୟତ ପିଛା ୫୦ ଲକ୍ଷ ମିଳିବାକୁ ଥିବା ବେଳେ, ଗାଁ ପିଛା ହାରାହାରି ୫ ଲକ୍ଷ ଟଙ୍କା ପଡ଼ିବ। ପ୍ରଶ୍ନ ଉଠୁଛି, କାହିଁକି ଏଭଳି ସ୍କିମ୍ ? ଏହା ଜରିଆରେ ପ୍ରକୃତରେ ସରକାର ଗାଁର ବିକାଶ କରିବାକୁ ଚାହୁଁଛନ୍ତି, ନାଁ ଭୋଟ୍ ହାତେଇବାର ଏହା ଏକ ଫନ୍ଦି ? ସରକାର ବିରୋଧୀ ମାହୋଲ ବନୁଥିବାରୁ ତାକୁ କାଉଣ୍ଟର କରିବାକୁ ଏହି ସ୍କିମ୍ ଅଣାଯାଇଛି କି ? ଯାହାକୁ ନେଇ ତେଜିଛି ରାଜନୀତି ।
ଚର୍ଚ୍ଚା ହେଉଛି, ବିଜେଡି ସଫ୍ଟ ହିନ୍ଦୁତ୍ୱ କାର୍ଡ ଖେଳୁଥିବାରୁ ଏହି ସ୍କିମ୍ ମାଧ୍ୟମରେ ଜଗନ୍ନାଥ ସଂସ୍କୃତିର ସୁରକ୍ଷା, ପ୍ରଚାର ପ୍ରସାର ଓ ପୂଜାସ୍ଥଳୀର ଉନ୍ନତିକୁ ପ୍ରାଧାନ୍ୟ ଦିଆଯଉଛି । ପଂଚାୟତକୁ ଦିଆଯାଉଥିବା ୫୦ ଲକ୍ଷ ମଧ୍ୟରୁ ୧୦ ଲକ୍ଷ ଟଙ୍କା କେବଳ ଏହି ଦିଗରେ ଖର୍ଚ୍ଚ ହେବ। ତେବେ ବିଜେଡିର ଏହି ଚାଲ୍ କେତେ ସଫଳ ହେବ ତାହା ଆଗାମୀ ଦିନରେ ସ୍ପଷ୍ଟ ହେବ ।