MKCG ର ବିକଳ ଚିତ୍ର; ସକାଳେ ଲାଇନ୍ ଦେଲେ ସନ୍ଧ୍ୟାରେ ମେଡିସିନ୍

ରୋଗୀଙ୍କ ସମସ୍ୟା ସମାଧାନ ଅପେକ୍ଷା ନିଜେ ସମସ୍ୟା ଭିତରେ ବୁଡ଼ି ରହିଛି ବ୍ରହ୍ମପୁରର MKCG ମେଡିକାଲ କଲେଜ୍ ଓ ହସ୍ପିଟାଲ । ଦକ୍ଷିଣ ଓଡ଼ିଶାର ସବୁଠୁ ବଡ଼ ଆଉ ନିର୍ଭରଯୋଗ୍ୟ ସ୍ୱାସ୍ଥ୍ୟ ପ୍ରତିଷ୍ଠାନରେ ଏବେ ୧୭୦ରୁ ଅଧିକ ଡାକ୍ତର ପଦବି ଖାଲି । ଟେଷ୍ଟ ପାଇଁ ନମୁନା ଦେଲେ ରିପୋର୍ଟ ପାଇବାକୁ ୧୦ ଦିନ ଅପେକ୍ଷା କରୁଛନ୍ତି ରୋଗୀ । ଆଉ ନିରାମୟ କାଉଣ୍ଟରରେ ସକାଳେ ଲାଇନ ଦେଲେ ସନ୍ଧ୍ୟାରେ ମିଳୁଛି ମେଡିସିନ୍ । ସେପଟେ ସମସ୍ୟାର ସମାଧାନ କରାଯାଉଥିବା ଚିରାଚରିତ ଉତ୍ତର ରଖିଛନ୍ତି ମେଡିକାଲ କର୍ତ୍ତୃପକ୍ଷ ।

ଦକ୍ଷିଣ ଓଡ଼ିଶାର ସବୁଠୁ ବଡ଼ ତଥା ନିର୍ଭରଯୋଗ୍ୟ ସରକାରୀ ସ୍ୱାସ୍ଥ୍ୟ ପ୍ରତିଷ୍ଠାନ । ରାଜ୍ୟର ୧୦ରୁ ଅଧିକ ଜିଲ୍ଲା ତଥା ପଡୋଶୀ ଆନ୍ଧ୍ରପ୍ରଦେଶର ସୀମାନ୍ତ ଲୋକଙ୍କ ଲାଇଫ ଲାଇନ୍ । ହେଲେ ନିରନ୍ତର ଏବଂ ତ୍ୱରିତ ସ୍ୱାସ୍ଥ୍ୟସେବା କଥା ଚିନ୍ତା କଲା ବେଳକୁ ଲୋକଙ୍କ ରାଗ ପଞ୍ଚମରେ । ବ୍ରହ୍ମପୁରର ମହାରାଜା କୃଷ୍ଣଚନ୍ଦ୍ର ଗଜପତି MKCG ମେଡିକାଲ କଲେଜ ହସ୍ପିଟାଲର ନିରାମୟ ଔଷଧ ବିତରଣ କେନ୍ଦ୍ର ଆଗରେ ଘଣ୍ଟା ଘଣ୍ଟା ଧରି ଲାଇନ୍ ଦେବା ପରେ ବି ମେଡିସିନ୍ ନମିଳିବାରୁ ଇଏ ସାଧାରଣ ଜନତାଙ୍କ ଆକ୍ରୋଶ ।

ସକାଳୁ ସନ୍ଧ୍ୟା ଯାଏଁ ଭିଡ଼ ଏମିତି ଯେ, ବୃଦ୍ଧ, ମହିଳା କିମ୍ବା ରୋଗୀଟିଏ ଯଦି ଔଷଧ ପାଇଁ ଅପେକ୍ଷା କଲା, ତେବେ କଥା ସରିଲା । ଏ ସ୍ଥିତି ଦିନ ଅଧର ନୁହେଁ, ସବୁ ଦିନିଆ । ତେବେ ସମସ୍ୟା କେବଳ ଏଇଠି ନାହିଁ । ସବୁ ବିଭାଗର ଆଉଟ୍ ଡୋରଠୁ ନିଦାନ କେନ୍ଦ୍ର ପର୍ଯନ୍ତ, ସବୁଠି ଏଇଭଳି ସ୍ଥିତି ।

ମେଡିକାଲ କଲେଜରେ ୪୮ଟି ବିଭାଗରେ ବିଭିନ୍ନ ବର୍ଗର ଡାକ୍ତରଙ୍କୁ ମିଶାଇ ମୋଟ ୪୫୨ ଜଣ ଡାକ୍ତର ରହିବା କଥା । କିନ୍ତୁ ଅଛନ୍ତି ମାତ୍ର ୨୮୩ ଡାକ୍ତର । ତା ଭିତରୁ ଜେନରାଲ ମେଡିସିନ୍, ଜେନରାଲ ସର୍ଜରୀ, ଆନାସ୍ଥେସିଓଲଜି, ଅର୍ଥୋପେଡିକ୍ସ ଭଳି ଗୁରୁତ୍ୱପୂର୍ଣ୍ଣ ବିଭାଗରେ ସଂଖ୍ୟାଧିକ ସିନିୟର ରେସିଡେଣ୍ଟ ପଦବୀ ବର୍ଷ ବର୍ଷ ଧରି ଖାଲି ପଡ଼ିଛି ।

ଏପଟେ ସ୍ପେସିଆଲିଷ୍ଟ ତଥା ଅଭିଜ୍ଞ ଡାକ୍ତର ପଦବି ଖାଲି ପରେ ସେ ସ୍ଥାନ ପୂରଣ ହେଉନି, ଆଉ ଯେଉଁଠି ହେଉଛି, ସେଠି ଡେପୁଟେସନ୍ କିମ୍ବା କଣ୍ଟ୍ରାକଚୁଆଲରେ କାମ ଚଳା ଯାଉଛି । ଏପରି ସ୍ଥିତିରେ ଦୈନିକ ହଜାର ହଜାର ସଂଖ୍ୟାରେ ଆସୁଥିବା ରୋଗୀଙ୍କୁ କେମିତି ଉତ୍ତମ ସେବା ମିଳିବ, ତାକୁ ନେଇ ଉଠିଛି ପ୍ରଶ୍ନ।

ସେପଟେ ଏଭଳି ସ୍ଥିତି ଲାଗି ରହିଲେ ଆଗକୁ ଆନ୍ଦୋଳନ ପାଇଁ ସ୍ଥାନୀୟ ବୁଦ୍ଧିଜୀବୀ ସଂଗଠନ ସମୁହ ଡାକରା ଦେଇଛନ୍ତି । ଏଣେ ଏନେଇ ଉଚ୍ଚ କର୍ତ୍ତୃପକ୍ଷଙ୍କୁ ଚିଠି ଲେଖାଯାଇଥିବା ଏବଂ ସମସ୍ୟାର ସ୍ଥାୟୀ ସମାଧାନ ପାଇଁ ଉଦ୍ୟମ କରାଯାଉଥିବା କହିଛନ୍ତି ମେଡିକାଲ କର୍ତ୍ତୃପକ୍ଷ।