ପରୀକ୍ଷା ହଲ୍‌ରେ ମା’, କୁନି ପୁଅର ଯତ୍ନ ନେଇ ସମସ୍ତଙ୍କ ହୃଦୟ ଜିତିଲେ କନେଷ୍ଟବଳ ମାଡାମ୍‌

ମା’ର ମମତାର ଅନେକ ରୂପ । ଶରୀର ଅଲଗା ଅଲଗା ହୋଇପାରେ କିନ୍ତୁ ସ୍ନେହ ସମାନ । ତାର ଛାତିରେ ଛାତିଏ ପ୍ରେମ । ମମତାର ମୂଲ ସବୁ ମା’ ପାଇଁ ମହାନ । ଗୁଜୁରାଟର ଜଣେ ମହିଳା କନଷ୍ଟେବଳ ଏବେ ତାଙ୍କର ନିଆରା ମାତୃତ୍ୱ ପାଇଁ ଚର୍ଚ୍ଚାର ପରିସର ଭିତରକୁ ଆସିଛନ୍ତି । ସୋସିଆଲ ମିଡିଆରେ ୟୁଜର ତାଙ୍କୁ ଭୁରି ଭୁରି ପ୍ରଶଂସା କରୁଛନ୍ତି । ଅହମ୍ମଦାବାଦ ପୋଲିସର ଅଫିସିଆଲ୍ ଟ୍ୱିଟର ଆକାଉଣ୍ଟରେ କନେଷ୍ଟେବଳ ଜଣକ ଶିଶୁକୁ ସମ୍ଭାଳୁଥିବାର କିଛି ଫଟୋ ସେୟାର୍‌ କରାଯାଇଛି । କୁନି ପିଲାଟିର ମା’ ପରୀକ୍ଷା କେନ୍ଦ୍ରରେ ପରୀକ୍ଷା ଦେଉଥିବା ବେଳେ କନେଷ୍ଟବଳ ମାହାମ୍‌ ଜଣକ ପୂରା ପରୀକ୍ଷା ସମୟ ଶିଶୁଟିକୁ କାଖେଇ ଧରି ଡ୍ୟୁଟି କରିଥିଲେ।

ଗତ ରବିବାର ଗୁଜରାଟ ହାଇକୋର୍ଟରେ ପିଅନ ପଦବୀ ପୂରଣ ପାଇଁ ପରୀକ୍ଷା ଅନୁଷ୍ଠିତ ହୋଇଥିଲା । ଏହି ପରୀକ୍ଷା ପାଇଁ ଅହମଦାବାଦର ଓଧବର ଏକ କେନ୍ଦ୍ରରେ କନେଷ୍ଟବଳ ଦୟାବେନ୍‌ଙ୍କର ଡ୍ୟୁଟି ପଡ଼ିଥିଲା । ସେ ସେଠାରେ ସୁରକ୍ଷା ଦାୟିତ୍ୱରେ ଥିଲେ । ହେଲେ ପରୀକ୍ଷା ଦେବାକୁ ଆସିଥିବା ଜଣେ ମହିଳାଙ୍କ ସହ ଥିଲା ତାଙ୍କ କୁନି ପୁଅ । ପୁଅକୁ କାଖରେ ଧରି ପରୀକ୍ଷା ଦେବା ସମ୍ଭବ ନଥିଲା । ଆଉ ମହିଳା କନେଷ୍ଟବଳ ଜଣକ କୁନି ପୁଅକୁ କୋଳେଇ ନେଇ ଡ୍ୟୁଟି କରିଥିଲେ । ପିଲାର ମା’ ପରୀକ୍ଷା କେନ୍ଦ୍ରରୁ ନବାହାରିବା ପର୍ଯ୍ୟନ୍ତ ସେ ତାକୁ ବୁଲେଇ ଖେଳେଇ ପାଖରେ ରଖିଥିଲେ ।

ଅହମଦାବାଦ ପୋଲିସ୍ କରିଥିବା ଟ୍ୱିଟରେ ଲେଖାଅଛି, ପରୀକ୍ଷା କେନ୍ଦ୍ରକୁ ଜଣେ ମହିଳା ତାଙ୍କ ୬ ମାସର ପୁଅକୁ ନେଇ ପରୀକ୍ଷା ଦେବାକୁ ଆସିଥିଲେ । ହେଲେ ପରୀକ୍ଷା ଆରମ୍ଭ ହେବାର ଅଳ୍ପ ସମୟ ପୂର୍ବରୁ ଛୁଆଟି କାନ୍ଦିଥିଲା । ଯେତେ ବୁଝାଇଲେ ମଧ୍ୟ ବୁଝୁ ନଥିଲା । ପରୀକ୍ଷା ସମୟ ପାଖେଇ ଆସୁଥିବା ବେଳେ ପୁଅର କାନ୍ଦ ବନ୍ଦ ହେଉ ନଥିବା ଦେଖି ମହିଳା ଜଣଙ୍କ ବ୍ୟସ୍ତ ହୋଇପଡ଼ିଥିଲେ । ଏହି ସମୟରେ ତାଙ୍କୁ ସହାୟତାର ହାତ ବଢ଼ାଇଥିଲେ କନଷ୍ଟେବଲ ଦୟାବେନ୍ । ସେ ଛୁଆଟିକୁ ନିଜ ପାଖରେ ରଖିଥିଲେ । ଆଉ ତା’ ମା’ ପରୀକ୍ଷା ଦେବାକୁ ଯାଇଥିଲେ।

ଏବେ ସେହି ସମୟର ଫଟୋ ଗୁଡ଼ିକ ସୋସିଆଲ ମିଡିଆରେ ଭାଇରାଲ ହେଉଛି । ‌ଭାଇରାଲ୍‌ ଫଟୋକୁ ଦେଖି କନଷ୍ଟେବଳଙ୍କୁ ବିଭିନ୍ନ ମହଲରୁ ପ୍ରଶଂସା କରାଯାଉଛି । ଜଣେ ୟୁଜର ଲେଖିଛନ୍ତି, ଆମେ ଆପଣଙ୍କ ପାଇଁ ଗର୍ବିତ ମାଡାମ୍‌ । ଆଉ ଜଣେ ଲେଖିଛନ୍ତି, ଏହା ବାସ୍ତବ ପୋଲିସଙ୍କ ପରିଚୟ । ଏପରି କାର୍ଯ୍ୟ ଉଚ୍ଚ ପ୍ରଶଂସନୀୟ ଏବଂ ମାନବିକତାର ଉଦାହରଣ ।