ମହିଳାଙ୍କୁ ମାଗଣାରେ ମିଳିବ ଫୋନ୍‌, ୩ ବର୍ଷ ଯାଏ ଫ୍ରି ଇଣ୍ଟରନେଟ୍‌...ଏହି ସରକାର କଲେ ଘୋଷଣା

ମହିଳାଙ୍କୁ ସ୍ମାର୍ଟଫୋନ୍‌ ବାଣ୍ଟିବା ସହ ୩ ବର୍ଷ ଯାଏ ମାଗଣାରେ ଇଣ୍ଟରନେଟ୍‌ ଦେବେ ସରକାର। ଆଗାମୀ ନିର୍ବାଚନକୁ ଦୃଷ୍ଟିରେ ରଖି ରାଜସ୍ଥାନ ସରକାର ଏଭଳି କିଛି ନିଷ୍ପତ୍ତି ନେଇଛନ୍ତି। ମୁଖ୍ୟମନ୍ତ୍ରୀ ଡିଜିଟାଲ ସେବା ଯୋଜନା ଅଧୀନରେ ୧.୩ କୋଟି ମହିଳାଙ୍କୁ ଗୁରୁବାରଠୁ ଏହା ପ୍ରଦାନ କରାଯିବ। 

ପ୍ରଥମ ପର୍ଯ୍ୟାୟରେ, ପ୍ରତି ଫୋନ୍‌କୁ ୬ ହଜାର ୮ ଶହ ଟଙ୍କା ହିସାବରେ ୪୦ ଲକ୍ଷ ସ୍ମାର୍ଟଫୋନ୍‌ ହିତାଧିକାରୀଙ୍କୁ ପ୍ରଦାନ କରାଯିବ। ସେମାନଙ୍କ ମଧ୍ୟରେ ଜୟପୁରରେ ୧.୯ ଲକ୍ଷ ମହିଳା ଅଛନ୍ତି। ଏମାନଙ୍କୁ ରାଜ୍ୟରେ ସ୍ୱତନ୍ତ୍ର କ୍ୟାମ୍ପ ମାଧ୍ୟମରେ ମୋବାଇଲ୍ ପ୍ରଦାନ କରାଯିବ। 

ମିଳିଥିବା ସୂଚନା ଅନୁସାରେ, ସରକାରଙ୍କ ଏହି ଯୋଜନାରେ ୨ଟି ମୋବାଇଲ୍‌ ଫୋନ୍‌- ରିଅଲ୍‌ମି, ରେଡ୍‌ମି ଉପଲବ୍ଧ ରହିଛି। ତେବେ ପରେ ସାମସଙ୍ଗ୍‌ ଓ ନୋକିଆ ଫୋନ୍‌ ଉପଲ୍ଲବ୍ଧ କରାଯିବ। ଫୋନ୍‌ ପାଇଁ ୬,୧୨୫ ଟଙ୍କା ଓ ମାଗଣା ଇଣ୍ଟରନେଟ୍‌ ପାଇଁ ୬୭୫ ଟଙ୍କା ପ୍ରଦାନ କରାଯିବ। ଏହାସହ ପ୍ରତିବର୍ଷକୁ ଇଣ୍ଟରନେଟ୍‌ ଚାର୍ଜ ପାଇଁ ମଧ୍ୟ ସରକାର ୯୦୦ ଟଙ୍କା ଦେବେ । 

ଏହି ସେବାର ଫାଇଦା ଉଠାଇବା ପାଇଁ ହିତାଧିକାରୀ ଜନ ଆଧାର କାର୍ଡ, ପାନ୍‌ କାର୍ଡ ଓ ଏନ୍‌ରୋଲ୍‌ମେଣ୍ଟ କାର୍ଡ ଦେଖାଇବେ। ସେହିପରି ବିଧବା ମହିଳା ସେମାନଙ୍କର ପିପିଇ କାର୍ଡ ମଧ୍ୟ ଦେଖାଇପାରିବେ।