ନେପାଳ ରାଜଧାନୀ କାଠମାଣ୍ଡୁର ଏକ ନାଇଟ କ୍ଲବରେ ରାହୁଲ ଗାନ୍ଧିଙ୍କ ପାର୍ଟି ଭିଡିଓ ଭାଇରାଲ୍ ହେବା ପରେ, ପୁଣି ବିବାଦରେ କଂଗ୍ରେସର ଯୁବରାଜ । କଂଗ୍ରେସ ଡଙ୍ଗା ଉବୁଟୁବୁ ହେଉଥିବା ବେଳେ ରାହୁଲଙ୍କ ଏଭଳି ବିଦେଶୀ ମଉଜକୁ ନେଇ ଶାଣିତ ଭାଷାରେ କଟାକ୍ଷ କରିଛି ବିଜେପି । ଆଉ ପ୍ରଧାନମନ୍ତ୍ରୀ ମୋଦିଙ୍କ ୟୁରୋପ ଗସ୍ତକୁ ନେଇ କଂଗ୍ରେସ କରିଥିବା ସମାଲୋଚନାର ବଦଲା ନେଇଛି ଦଳ । ତେବେ ରାହୁଲ ନେପାଳକୁ ଏକ ବିବାହ ଉତ୍ସବରେ ଅତିଥି ହୋଇଯାଇଥିବା ସଫେଇ ଦେଇଛି କଂଗ୍ରେସ । ଏଭିତରେ ଭାଇରାଲ୍ ଭିଡିଓରେ ରାହୁଲଙ୍କ ସହ ଥିବା ରହସ୍ୟମୟ ଯୁବତୀଙ୍କ ପରିଚୟକୁ ନେଇ ବି ଚର୍ଚ୍ଚା ଜୋର୍ ଧରିଛି ।
ରଙ୍ଗାରଙ୍ଗ୍ ଲାଇଟ୍... ହାଇ ଭଲ୍ୟୁମ୍ ମ୍ୟୁଜିକ୍... ପୂରାପୂରି ପାର୍ଟି ମୁଡ୍... କାଠମାଣ୍ଡୁର ଏକ ନାଇଟ କ୍ଲବରେ କଂଗ୍ରେସର ଯୁବରାଜ ରାହୁଲ ଗାନ୍ଧି ତେବେ କଂଗ୍ରେସ ପାର୍ଟି । ରାହୁଲଙ୍କ ନାଇଟ କ୍ଲବ୍ ମସ୍ତିର ଏକାଧିକ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ବେଳେ, ଏହାକୁ ଟୁଇଟ୍ କରି ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ । ଲେଖିଛନ୍ତି, ମୁମ୍ବାଇ ହମଲା ବେଳେ ରାହୁଲ ଗାନ୍ଧି ନାଇଟ କ୍ଲବରେ ଥିଲେ, ଆଉ ଏବେ ଦଳରେ ଯେତେବେଳେ ଘମାସାନ ଚାଲିଛି, ସେ ପୁଣି ନାଇଟ କ୍ଲବରେ ଅଛନ୍ତି । ରାହୁଲ ଧାରା ବଜାୟ ରଖିଛନ୍ତି ବୋଲି କଟାକ୍ଷ କରିଛନ୍ତି ଅମିତ ମାଲବ୍ୟ ।
କେନ୍ଦ୍ରମନ୍ତ୍ରୀ କିରଣ ରିଜିଜୁ ମଧ୍ୟ ଟୁଇଟ୍ କରିଛନ୍ତି ଯେ, ଜଣେ ସାଧାରଣ ନାଗରିକ ଭାବେ ନିୟମିତ ପାର୍ଟି କରିବା, ବିଦେଶ ବୁଲିବାରେ କିଛି ଅସୁବିଧା ନାହିଁ । କିନ୍ତୁ ସବୁବେଳେ ଅନ୍ୟକୁ ଉପଦେଶ ଦେଉଥିବା ଜଣେ ସାଂସଦ ତଥା ଏକ ଜାତୀୟ ରାଜନୈତିକ ଦଳର ପର୍ମାନେଣ୍ଟ୍ ବସ୍ ଏଭଳି କରିବା ଉଚିତ କି? କେନ୍ଦ୍ରମନ୍ତ୍ରୀ ମୁଖ୍ତାର ଆବ୍ବାସ ନକଭି ବି କଟାକ୍ଷ କରିଛନ୍ତି, ରାହୁଲ ଫୁଲ୍ ଟାଇମ୍ ପର୍ଯ୍ୟଟନ ଓ ପାର୍ଟ ଟାଇମ୍ ଡ୍ରାମା କରନ୍ତି ।
ଦୈନିକ ଖବର କାଗଜ କାଠମାଣ୍ଡୁ ପୋଷ୍ଟ୍ର ରିପୋର୍ଟ ଅନୁସାରେ, ପୂର୍ବତନ ନେପାଳୀ ରାଷ୍ଟ୍ରଦୂତ ଭୀମ ଉଦାସଙ୍କ ଝିଅ ତଥା ଜଣେ ପୂର୍ବତନ ସିଏନ୍ଏନ୍ ସାମ୍ବାଦିକା ସୁମ୍ନିମାଙ୍କ ବିବାହ ଉତ୍ସବରେ ଯୋଗ ଦେବା ପାଇଁ ସୋମବାର କାଠମାଣ୍ଡୁ ଯାଇଛନ୍ତି ରାହୁଲ । ମୋଦିଙ୍କ ସରକାରୀ ୟୁରୋପ ଗସ୍ତକୁ ନେଇ କଂଗ୍ରେସ ଗତକାଲି କଟାକ୍ଷ କରିଥିଲା ଯେ, ଦେଶ୍ ସଂକଟ୍ ମେ ଛାୟା ହୈ, ମଗର୍ ସାହେବକୋ ବିଦେଶ ଭାୟା ହୈ । ଆଉ ଆଜି ରାହୁଲଙ୍କ ଏହି ଭିଡିଓ ଛାଡ଼ି ଦଳକୁ ଶକ୍ତ ଚାପୁଡ଼ା ଦେଇଛି ବିଜେପି । ତେବେ କଂଗ୍ରେସ ମୁଖପାତ୍ର ରଣଦୀପ ସୂରଜେୱାଲା ସଫେଇ ଦେବାକୁ ଯାଇ କହିଛନ୍ତି ଯେ, ରାହୁଲ ଏକ ବନ୍ଧୁ ରାଷ୍ଟ୍ରକୁ ନିମନ୍ତ୍ରିତ ଅତିଥି ହୋଇ ବିବାହ ଉତ୍ସବରେ ଯୋଗ ଦେବାକୁ ଯାଇଛନ୍ତି । ସେ ମୋଦିଙ୍କ ଭଳି ଅନିମନ୍ତ୍ରିତ ଅତିଥି ଭାବେ ନଓ୍ୱାଜ ଶରିଫଙ୍କ ଜନ୍ମଦିନ ପାଳିବାକୁ ପାକିସ୍ତାନ ତ ଯାଇନାହାନ୍ତି ।
ତେବେ କେବଳ ରାହୁଲଙ୍କ ପବ୍ ପାର୍ଟି ନୁହେଁ, ତାଙ୍କ ସହିତ ଥିବା ଯୁବତୀଙ୍କୁ ନେଇ ବି ଚର୍ଚ୍ଚା ଜୋର୍ ଧରିଛି । ଯୁବତୀ ଜଣକ କିଏ ବୋଲି ଜାଣିବାକୁ ଅନେକେ ଉତ୍ସୁକ ଥିବା ବେଳେ ସେ ନେପାଳରେ ଅବସ୍ଥାପିତ ଚୀନ୍ ରାଷ୍ଟ୍ରଦୂତ ହୋଉ ୟାଙ୍କି ବୋଲି ସୋସିଆଲ୍ ମିଡିଆରେ ଚର୍ଚ୍ଚା ହେଉଛି । ଭାରତ-ନେପାଳ ମ୍ୟାପ୍ ବିବାଦ ପଛରେ ଏହି ଚୀନି ସୁନ୍ଦରୀ ହୋଉ ୟାଙ୍କିଙ୍କ ପ୍ରମୁଖ ଭୂମିକା ଥିବା ଏବଂ ନେପାଳର ତତ୍କାଳୀନ ପ୍ରଧାନମନ୍ତ୍ରୀ କେ.ପି. ଶର୍ମା ଓଲି ହନିଟ୍ରାପରେ ଫସି ତାଙ୍କ ଦ୍ୱାରା ନିୟନ୍ତ୍ରିତ ହେଉଥିବା ମଧ୍ୟ ଜାତୀୟ ଗଣମାଧ୍ୟମରେ ଚର୍ଚ୍ଚା ହୁଏ ।