ଘରକୁ ପୁରୁଣା ସାଇକେଲ ଆଣିଲେ ବାପା : ମର୍ସିଡିଜ ବେଞ୍ଜ୍‌ ଗାଡ଼ି କିଣିବା ପରି ଖୁସିରେ ଗଦଗଦ୍‌ କୁନି ପୁଅ

ଘରକୁ ଖୁସି ଆଣିଛି ପୁରୁଣା କଳଙ୍କିଲଗା ସାଇକେଲ । ଆଉ ଚାଲି ଚାଲି ଯିବେନି ପରିବାର ଲୋକ । ଗରିବ ମୁହଁରେ ହସ ଫୁଟାଇବାକୁ ଲୋଡ଼ା ନାହିଁ କୋଠାବାଡ଼ି, ବଡ଼ଗାଡ଼ି ଓ ଧନଦଉଲତ । ପଖାଳ ମୁଠାଏ ଆଉ ଶାଗ ଚେନାଏରେ ବି ପୂରିଯାଏ ମଳିମୁଣ୍ଡିଆଙ୍କ ମନ । ସମୟ ବଦଳିବା ସଙ୍ଗେ ସଙ୍ଗେ ବ ଲୋକେ ଟଙ୍କା ପଛରେ ଧାଉଁଥିବା ବେଳେ ଆଜି ବି କିଛି ଏପରି ଲୋକ ଅଛନ୍ତି, ଯେଉଁମାନେ ଅଳ୍ପରେ ସନ୍ତୁଷ୍ଟ ରହିବାକୁ ଚେଷ୍ଟା କରନ୍ତି । ନିକଟରେ ଏପରି ଏକ ଭିଡିଓ ଭାଇରାଲ ହେଉଛି । ପୁରୁଣା ସାଇକେଲ ଖଣ୍ଡେ କିଣିବା ପରେ ବାପପୁଅଙ୍କ ଖୁସି କହିଲେ ନସରେ । ସେମାନଙ୍କ ମୁହଁରେ ଫୁଟି ଉଠୁଥିବା ହସ ତାଙ୍କ ଖୁସି ବୟାନ୍‌ କରୁଛି ।

ବହୁ ଦିନର ଅପେକ୍ଷା ପରେ ଘରକୁ ଆସିଛି ସାଇକେଲ ଟିଏ । ବାପା ବହୁ କଷ୍ଟ କରି ଟଙ୍କା ସଞ୍ଚୟ କରିବା ପରେ ଆଜି ସ୍ୱପ୍ନ ପୂରଣ ହୋଇଛି । ସାଇକେଲରେ କଳଙ୍କି ଲାଗି ଯାଇଛି ସିନା, କୁନି ପୁଅର ମୁହଁ କିନ୍ତୁ ଖୁସିରେ ଚିକ୍ ଚିକ୍ କରୁଛି । ବାପାଙ୍କ କାନ୍ଧରେ ଆଉ ସେ ବୋଝ ହେବନି । ପୁରୁଣା ହେଲେ ମଧ୍ୟ ସାଇକେଲରେ ବସି ବାପାଙ୍କ ସାଥିରେ ଯାତ୍ରା ଦେଖିଯାଇ ପାରିବ ।

ଭିଡିଓରେ ଦେଖିବାକୁ ମିଳୁଛି ଜଣେ ବ୍ୟକ୍ତି ଘର ବାହାରେ ଏକ ସାଇକେଲ ଧରି ଛିଡ଼ା ହୋଇଛନ୍ତି । ଆଉ ସାଇକେଲରେ ଏକ ବଡ଼ ଫୁଲମାଳ ପକାଇ ପୂଜା ମଧ୍ୟ କରୁଛନ୍ତି । ସାଇକେଲଟି ଅନେକ ଦିନର ପୁରୁଣା ପରି ଲାଗୁଛି । ତେବେ ପୂଜା କରିବା ପରେ ସେ ହାତ ଯୋଡ଼ି ଭଗବାନଙ୍କ ଉଦ୍ଦେଶ୍ୟରେ ଜୁହାର ହେଉଥିବା ମଧ୍ୟ ଦେଖିବାକୁ ମିଳୁଛି । କାହାପାଇଁ ଏହା ବହୁତ ଛୋଟ କଥା ହୋଇପାରେ ହେଲେ, ବାପା ପୁଅଙ୍କ ପାଇଁ ବହୁତ ବଡ଼ କଥା ।

ତେବେ ସେମାନଙ୍କ ଖୁସି ଦେଖିଲେ ଲାଗୁଛି, ଘରକୁ ମର୍ସିଡିଜ୍‌ କି ବିଏମଡବ୍ଲ୍ୟୁ କାର ଆଣୁଥିବା ଲୋକେ ମଧ୍ୟ ଏତେ ଖୁସି ହେବେନି । ଏମିତି ନିରୀହ, ନିଷ୍ପାପ ମଣିଷ ହିଁ ଜୀବନରେ ଖୁସିରେ ରହିପାରନ୍ତି ।

ସୋସିଆଲ ମିଡିଆରେ ଏଭଳି ଏକ ଭିଡିଓ ଭାଇରାଲ ହେବାରେ ଲାଗିଛି । ଏହି ଭିଡିଓକୁ ଜଣେ ଆଇଏଏସ୍‌ ଅଧିକାରୀ ଟ୍ୱିଟରରେ ସେୟାର କରିଛନ୍ତି । ଭିଡିଓ ସହିତ ସେ କ୍ୟାପସନରେ ଲେଖିଛନ୍ତି – ପୁରୁଣା ସାଇକେଲକୁ ନଦେଖି , ବାପପୁଅଙ୍କ ହସ ହସ ଚେହେରାକୁ ଦେଖନ୍ତୁ । ସେମାନଙ୍କ ଭାବଭଙ୍ଗୀରୁ ଜଣାପଡ଼ୁଛି ଏହା ତାଙ୍କ ପାଇଁ କୌଣସି ମର୍ସିଡିଜ୍ ବେଞ୍ଜ୍ ଗାଡ଼ି ଠାରୁ କମ୍‌ ନୁହେଁ । ଏହି ଭିଡିଓ ଲୋକଙ୍କ ହୃଦୟ ଜିଣିଛି । ଭିଡିଓଟିକୁ ବର୍ତ୍ତମାନ ପର୍ଯ୍ୟନ୍ତ ୩ ଲକ୍ଷରୁ ଅଧିକ ଥର ଦେଖାଯାଇଛି । ଲୋକମାନେ ଭିଡିଓ ଉପରେ ବିଭିନ୍ନ ପ୍ରକାର କମେଣ୍ଟ୍‌ କରୁଛନ୍ତି ।