Officer Beaten: ଜଣେ ଅଫିସର ଆଉ ଜଣେ ଅଫିସରଙ୍କୁ ଜୋତାରେ ପିଟିଲେ, ରହିଛି କି ରାଜନୈତିକ ଶତ୍ରୁତା ?

କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା ଓ ଉପମୁଖ୍ୟମନ୍ତ୍ରୀ ଡି କେ ଶିବକୁମାରଙ୍କ ମଧ୍ୟରେ ଚାଲିଥିବା ଶୀତଳଯୁଦ୍ଧ ଆଉ ଅଛପା ହୋଇ ରହିନାହିଁ । ଏହି ଛକାପଞ୍ଝା ଭିତରେ ଦୁଇଜଣଙ୍କ ସ୍ୱତନ୍ତ୍ର ଅଧିକାରୀଙ୍କ ମଧ୍ୟରେ ବି ବିବାଦ ସୃଷ୍ଟି ହୋଇଛି । ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ଅଧିକାରୀ ତଥା ଆସିଷ୍ଟାଣ୍ଟ ରେସିଡେଣ୍ଟ କମିଶନର ସି ମୋହନ କୁମାର ଉପ-ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ଅଧିକାରୀ ଏଚ୍ ଅଞ୍ଜନେୟଙ୍କୁ ଜୋତାରେ ପିଟିଥିବାର ଅଭିଯୋଗ ହୋଇଛି । ଖୋଦ୍ ଅଞ୍ଜନେୟ ଏ ସଂପର୍କରେ ରେସିଡେଣ୍ଟ କମିଶନର ଇମକୋଙ୍ଗଲା ଜମୀରଙ୍କୁ ଲିଖିତ ଭାବେ ଜଣାଇଛନ୍ତି । ନୂଆଦିଲ୍ଲୀରେ କର୍ଣ୍ଣାଟକ ଭବନରେ ଏହି ଘଟଣା ଘଟିଛି ।

କର୍ଣ୍ଣାଟକ ଭବନରେ ବଚସାରୁ ଏହି ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି । ଉପ-ମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କ ସ୍ୱତନ୍ତ୍ର ଅଫିସର ଏଚ୍. ଅଞ୍ଜନେୟ ଅଭିଯୋଗ କରିଛନ୍ତି ଯେ ମୁଖ୍ୟମନ୍ତ୍ରୀ ସିଦ୍ଧରାମୈୟାଙ୍କ ସ୍ୱତନ୍ତ୍ର ଅଫିସର ତଥା ସହକାରୀ ରେସିଡେଣ୍ଟ କମିଶନର ସି. ମୋହନ କୁମାର ତାଙ୍କୁ ଜୋତାରେ ଆକ୍ରମଣ କରିଛନ୍ତି।

ସି. ମୋହନ କୁମାରଙ୍କ ବିରୁଦ୍ଧରେ ଅପରାଧିକ କାର୍ଯ୍ୟାନୁଷ୍ଠାନ ସେ ଦାବି କରିଛନ୍ତି। ଅଞ୍ଜନେୟ ତାଙ୍କ ଅଭିଯୋଗରେ କହିଛନ୍ତି, “ମୋତେ ଜୋତାରେ ମାଡ଼ ମରାଯାଇଛି, ଯାହା ମୋର ମାନ-ସମ୍ମାନକୁ ଆଘାତ ଦେଇଛି । ମୋତେ ନ୍ୟାୟ ଦିଆଯାଉ।”

ରେସିଡେଣ୍ଟ କମିଶନର ଇମକୋଙ୍ଗଲା ଜମୀର ଏହି ଅଭିଯୋଗ ଗ୍ରହଣ କରିଥିବାର ସ୍ୱୀକାର କରିଛନ୍ତି। ସେ କହିଛନ୍ତି, “ଆମେ ଜୁଲାଇ ୨୨ ତାରିଖର ଅଭିଯୋଗ ପାଇଛୁ। ଆଇନ ଅନୁଯାୟୀ ପଦକ୍ଷେପ ନିଆଯିବ ।”

ଅଞ୍ଜନେୟ ହେଉଛନ୍ତି ଜଣେ ଗ୍ରୁପ-ବି ଅଧିକାରୀ ।ତାଙ୍କ ଅଭିଯୋଗ ପତ୍ରରେ ସେ ଦର୍ଶାଇଛନ୍ତି ଯେ ମୋହନ ତାଙ୍କ କାର୍ଯ୍ୟରେ ନିୟମିତ ଭାବେ ବାଧା ସୃଷ୍ଟି କରୁଛନ୍ତି। ସେ ଲେଖିଛନ୍ତି, “ସେ ସମସ୍ତଙ୍କ ସାମ୍ନାରେ ଅଫିସର ଚାମ୍ବରରେ ମୋତେ ଜୋତାରେ ମାଡ଼ ମାରିବାକୁ ଧମକ ଦେଇଥିଲେ।”ଅଞ୍ଜନେୟ ଆହୁରି କହିଛନ୍ତି ଯେ ଉପ-ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ଅଫିସର ଭାବେ କାର୍ଯ୍ୟ କରୁଥିବା ସମୟରେ ସେ ନିଜର ନିରାପତ୍ତା ନେଇ ଚିନ୍ତିତ। ଯଦି ତାଙ୍କର କୌଣସି ଦୁର୍ଘଟଣା ଘଟେ, ତେବେ ମୋହନ ସେଥିପାଇଁ ଦାୟୀ ରହିବେ।”

ଅଭିଯୋଗରେ ମୋହନଙ୍କ ଅତୀତର ଆଚରଣକୁ ମଧ୍ୟ ଉଲ୍ଲେଖ କରାଯାଇଛି। ଅଞ୍ଜନେୟ ଦାବି କରିଛନ୍ତି, “ଅତୀତରେ ତାଙ୍କ ସେବା ରେକର୍ଡ ଦେଖିଲେ, ସେ ଏମ.ଏମ. ଯୋଶୀଙ୍କୁ ମାଡ଼ ମାରିଛନ୍ତି ଏବଂ ବରିଷ୍ଠ ଅଧିକାରୀମାନଙ୍କୁ ସମ୍ମାନ ନ ଦେଇ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ଅଫିସର ଭାବେ ଅହଂକାରୀ ଆଚରଣ କରିଛନ୍ତି।” ଅଞ୍ଜନେୟ ଆହୁରି କହିଛନ୍ତି ଯେ ସେ ପୂର୍ବରୁ କର୍ଣ୍ଣାଟକ ଭବନରୁ ବଦଳି ପାଇଁ ସେ ଆବେଦନ କରିଛନ୍ତି । ତାଙ୍କ ଜୀବନ ପ୍ରତି ବିପଦ ଥିବାର ସେ କହିଛନ୍ତି ।

ଅଧିକ ପଢ଼ନ୍ତୁ: ଆମ୍ୱୁଲାନ୍ସ ଭିତରେ ମହିଳା ରୋଗୀଙ୍କୁ ଗଣଦୁଷ୍କର୍ମ, ଡ୍ରାଇଭର ସମେତ ଦୁଇ ଗିରଫ