Pakistan's Terror Funding in Kashmir: କାଶ୍ମୀରରେ ଆତଙ୍କୀ ଆକ୍ରମଣର ପୁରୁଣା ଇତିହାସ, ଘାଟିକୁ ଅଶାନ୍ତ କରୁଛି ପାକିସ୍ତାନ

ପୃଥିବୀର ସ୍ୱର୍ଗ ଭାବରେ ପରିଚିତ କାଶ୍ମୀର ଉପତ୍ୟକା ଗତ ତିନି ଦଶନ୍ଧି ଧରି ଆତଙ୍କବାଦର ବିଷଜ୍ୱାଳାରେ ଜର୍ଜରିତ । ଏପ୍ରିଲ ୨୨ରେ ଜମ୍ମୁ ଓ କଶ୍ମୀରର ପହଲଗାମ୍ ଅନ୍ତର୍ଗତ ବୈସରନରେ ଘଟିଥିବା ଆତଙ୍କବାଦୀ ଆକ୍ରମଣ ପୁଣିଥରେ ବିଶ୍ୱକୁ ପାକିସ୍ତାନ ପ୍ରାୟୋଜିତ ଆତଙ୍କବାଦ ବିଷୟରେ ଭାବିବାକୁ ବାଧ୍ୟ କରିଛି। ପହଲଗାମର ନରସଂହାର ପରେ ପାକିସ୍ତାନକୁ ଆଉ କ୍ଷମା ଦିଆଯିବ ନାହିଁ ବୋଲି ପ୍ରାଧନମନ୍ତ୍ରୀ ସିଧାସଳଖ ଚେତାବନୀ ଦେଇସାରିଛନ୍ତି । ଗୋଟିଏପଟେ ପାକିସ୍ତାନୀ ଦାରିଦ୍ର୍ୟ ସହ ଲଢ଼େଇ କରୁଥିବା ବେଳେ ସରକାର କିନ୍ତୁ ଭାରତ ବିରୋଧୀ ଷଡ଼ଯନ୍ତ୍ରରେ ବ୍ୟସ୍ତ । ଭାରତକୁ ବାରମ୍ବାର ରକ୍ତ ରଞ୍ଜିତ କରୁଥିବା ପଡ଼ୋଶୀ ଦେଶର ରାଜକୋଷ ଖାଲି । କେତେବେଳେ ବିଶ୍ୱବ୍ୟାଙ୍କ ନହେଲେ ଆଇଏମଏଫ ଫଣ୍ଡ ନେଇ ଚଳୁଛି ଦେଶ । ଏତେ ସରିହେବା ପରେ ବି ପାକ୍ ସରକାରଙ୍କ ମୁଣ୍ଡକୁ ବୁଦ୍ଧି ଜୁଟୁନି ।

ଅଖଣ୍ଡ ଭାରତର ବିଭାଜନ ପରେ ପାକିସ୍ତାନର ଆବିର୍ଭାବ ହୋଇଥିଲା । ହେଲେ କାଶ୍ମୀର ଉପରେ କବଜା କରିବାକୁ ସେବେଠାରୁ ଆତଙ୍କବାଦ ଚଳାଇଛି ପାକିସ୍ତାନ । ୧୯୪୭ ମସିହାରେ ଜମ୍ମୁ-କାଶ୍ମୀର ଉପରେ ପାକିସ୍ତାନୀ ଆକ୍ରମଣକାରୀ ଏବଂ ବିଦ୍ରୋହୀମାନେ ଆକ୍ରମଣ କରିଥିଲେ। ଆଇଡିଏସଏ ଜର୍ଣ୍ଣାଲ ଅନୁଯାୟୀ, ଜମ୍ମୁ-କାଶ୍ମୀର, ଭାରତରେ ମିଶିବା ପରେ ପାକିସ୍ତାନ ଗତ ୭୮ ବର୍ଷ ଧରି ଭାରତ ବିରୋଧରେ ଷଡ଼ଯନ୍ତ୍ର କରିଆସୁଛି। ପଡ଼ୋଶୀ ଦେଶ ଆତଙ୍କବାଦ ସାହାଯ୍ୟରେ ବଳପୂର୍ବକ ଜମ୍ମୁ-କାଶ୍ମୀରକୁ ହାତେଇବାକୁ ଚେଷ୍ଟା କରୁଛି।

ଭାରତ ବିରୋଧରେ ଛଦ୍ମ ଯୁଦ୍ଧର ଆରମ୍ଭ

୧୯୮୭ ମସିହାରେ ପରମାଣୁ ଅସ୍ତ୍ର ହାସଲ କରିବା ପରେ ପାକିସ୍ତାନର ପାଦ ଆଉ ଭୂଇଁରେ ଲାଗୁନଥିଲା । ଭାରତ ବିରୋଧରେ ଛଦ୍ମ ଯୁଦ୍ଧ ଆରମ୍ଭ କରି ଜମ୍ମୁ ଏବଂ କାଶ୍ମୀରକୁ କବଜା କରିବା ପାଇଁ ଏକ ନୂତନ ଷଡ଼ଯନ୍ତ୍ର ରଚିଥିଲା । ପବିତ୍ର ମାଟିକୁ ଖଣ୍ଡ ବିଖଣ୍ଡିତ କରିବା ପାଇଁ ନୂଆ ନୂଆ ରଣନୀତି ଆପଣାଇଥିଲା ।

ଅପରେସନ୍ TOPAC

୧୯୮୨ ମସିହାରେ ପାକିସ୍ତାନ TOPAC ନାମରେ ଅପରେସନ ଚଳାଇ ଏକ ଗୁପ୍ତ ଷଡ଼ଯନ୍ତ୍ର ରଚିଥିଲା । ଏହାକୁ ୧୯୮୮ ମସିହାରେ ଜମ୍ମୁ ଏବଂ କାଶ୍ମୀରରେ କାର୍ଯ୍ୟକାରୀ କରାଯାଇଥିଲା, ଯାହା ବ୍ୟାପକ ବିପର୍ଯ୍ୟୟ ସୃଷ୍ଟି କରିଥିଲା। ପାକିସ୍ତାନୀ ଇଣ୍ଟର-ସର୍ଭିସେସ୍ ଇଣ୍ଟେଲିଜେନ୍ସ (ISI) ଦ୍ୱାରା ପରିଚାଳିତ ଏବଂ ଜେନେରାଲ୍ ମହମ୍ମଦ ଜିଆ-ଉଲ୍-ହକଙ୍କ ନେତୃତ୍ୱରେ ଚାଲିଥିବା ଏହି ଯୋଜନାର ମୁଖ୍ୟ ଲକ୍ଷ୍ୟ ଥିଲା ଆତଙ୍କବାଦକୁ ପ୍ରୋତ୍ସାହନ, ଛଦ୍ମ ଯୁଦ୍ଧ ଚଳାଇବା ଏବଂ ଭାରତଠାରୁ କାଶ୍ମୀରକୁ ଛଡ଼ାଇ ନେବା ।

ଅପରେସନ୍ TOPAC କିପରି କାର୍ଯ୍ୟକାରୀ ହୋଇଥିଲା

ଏହି ଯୋଜନାକୁ ସଫଳ କରିବା ପାଇଁ ପାକିସ୍ତାନର ଇଣ୍ଟର-ସର୍ଭିସେସ୍ ଇଣ୍ଟେଲିଜେନ୍ସ (ISI) ନିର୍ଦ୍ଦେଶାଳୟକୁ ଦାୟିତ୍ୱ ଦିଆଯାଇଥିଲା। ଆଫଗାନିସ୍ତାନରେ ଗରିଲା ଯୁଦ୍ଧ ସଂଗଠିତ କରିବାରେ ISIର ଅଧିକ ଅଭିଜ୍ଞତା ଥିଲା। ଏଥିରେ, ଅନ୍ତର୍ଘାତ ଏବଂ ଆତଙ୍କବାଦକୁ ଅସ୍ତ୍ର ଭାବରେ ବ୍ୟବହାର କରାଯାଇଥିଲା, ସେତେବେଳେ ଆମେରିକାର କେନ୍ଦ୍ରୀୟ ଗୁପ୍ତଚର ସଂସ୍ଥା (CIA) ସହିତ ଘନିଷ୍ଠ ଭାବରେ କାର୍ଯ୍ୟ କରୁଥିଲା ଏ ସଂସ୍ଥା। ଏହାର ସୁଯୋଗ ନେଇ ସିଆଇ ପକ୍ଷରୁ ଦିଆଯାଇଥିବା ଛୋଟ ଅସ୍ତ୍ରଶସ୍ତ୍ର, ହାଲୁକା ଅସ୍ତ୍ରଶସ୍ତ୍ର, ଗୁଳିଗୋଳା ଏବଂ ବିସ୍ଫୋରକର ପ୍ରାୟ ୬୦ ପ୍ରତିଶତ ଆଫଗାନ ମୁଜାହିଦ୍ଦିନଙ୍କୁ ପଠାଇବା ପାଇଁ ଗୁପ୍ତ ଭାବରେ ବାହାର କରିନେଇଥିଲା ISI । ରିପୋର୍ଟ ଅନୁଯାୟୀ ଆମେରିକା ଏବଂ ଏହାର ସହଯୋଗୀ ଦଳ ଆଫଗାନିସ୍ତାନକୁ ୫ ବିଲିୟନ ଆମେରିକୀୟ ଡଲାର ମୂଲ୍ୟର ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ପଠାଇଥିଲେ। ଏହା ବ୍ୟତୀତ, ତତ୍କାଳୀନ ସୋଭିଏତ୍ ୟୁନିଅନ୍ ୫.୭ ବିଲିୟନ ଆମେରିକୀୟ ଡଲାର ମୂଲ୍ୟର ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଯୋଗାଇଥିଲା। ।

୧୯୮୯ ମସିହାରେ ଯେତେବେଳେ ସୋଭିଏତ୍ ସେନା ଆଫଗାନିସ୍ତାନରୁ ଫେରିଯାଇଥିଲେ, ସେତେବେଳେ ଆତଙ୍କବାଦୀମାନଙ୍କୁ ଅସ୍ତ୍ରଶସ୍ତ୍ର ଯୋଗାଇବା ପାଇଁ ଆଇଏସଆଇ ପାଖରେ ରହିଯାଇଥିଲା ବହୁ ସଂଖ୍ୟକ ଅସ୍ତ୍ରଶସ୍ତ୍ର । ଆଫଗାନିସ୍ତାନରେ ମୁକ୍ତ ଭାବରେ ମିଳୁଥିବା ନିଶାଦ୍ରବ୍ୟର ଗୁପ୍ତ ବିକ୍ରୟରୁ ମିଳୁଥିବା ଲାଭ, ଅନ୍ୟ ଦେଶର ମୁସଲିମ ମୌଳବାଦୀଙ୍କ ଦାନ ଏବଂ ଭାରତୀୟ ସୀମା ପାର ବଡ଼ ଧରଣର ଚୋରା ଚାଲାଣରୁ ଜମ୍ମୁ ଏବଂ କାଶ୍ମୀରରେ ବିଦ୍ରୋହୀଙ୍କୁ ଆର୍ଥିକ ସହାୟତା ମିଳୁଥିଲା ।୧୯୮୭ ମାର୍ଚ୍ଚରେ ଜମ୍ମୁ ଏବଂ କାଶ୍ମୀର ବିଧାନସଭା ନିର୍ବାଚନରେ ହୋଇଥିବା ବ୍ୟାପକ ହେରଫେର ଏବଂ ଫାରୁକ ଅବଦୁଲ୍ଲାଙ୍କ ଦୁର୍ବଳ ପ୍ରଶାସନ ପ୍ରତି କାଶ୍ମୀରୀ ଲୋକଙ୍କ ଭ୍ରମ ଯୋଗୁଁ ସ୍ୱାଧୀନତା ପାଇଁ ପାଇଁ ବାରମ୍ବାର ଦାବି ହେଉଥିଲା । ଏପରି ସ୍ଥିତିରେ ପୂର୍ବରୁ ପ୍ରସ୍ତୁତ ଏବଂ ଉଚିତ ସମୟକୁ ଅପେକ୍ଷା କରିଥିବା ISI କୁ ନିଆଁରେ ଘିଅ ଢାଳିବାକୁ ସୁଯୋଗ ମିଳିଥିଲା ।

ପାକିସ୍ତାନ କିପରି ଆତଙ୍କବାଦୀମାନଙ୍କୁ ତାଲିମ ଦେଇଥିଲା

୧୯୮୮ ମସିହାରେ ଅପରେସନର ପ୍ରଥମ ପର୍ଯ୍ୟାୟ ଆରମ୍ଭ ହୋଇଥିଲା । ସେତେବେଳେ ସ୍ୱାଧୀନତା ଆଶାରେ ଅନୁପ୍ରାଣିତ ହୋଇ ବହୁ ସଂଖ୍ୟକ ଯୁବକ କାଶ୍ମୀର ନିୟନ୍ତ୍ରଣ ରେଖା ପାର ହୋଇ ପାକ୍ ଅଧିକୃତ କାଶ୍ମୀରରେ ପ୍ରବେଶ କରିଥିଲେ। ଆତଙ୍କବାଦରେ ଯୋଗଦେବା ପାଇଁ ଲୋକମାନେ ଦିନ ଦିନ ଧରି କଷ୍ଟକର ଭୂମି, ଜଙ୍ଗଲ ଏବଂ ଉଚ୍ଚ ସ୍ଥାନ ଦେଇ ଯାତ୍ରା କରୁଥିଲେ। ଭାରତ ବିରୋଧରେ ନିୟନ୍ତ୍ରଣ ରେଖାରେ ଆତଙ୍କବାଦୀ ତାଲିମ ଶିବିର ଗଢ଼ି ଉଠିଥିଲା। ଆତଙ୍କବାଦୀ ଭାବରେ ନିଯୁକ୍ତ ଲୋକମାନଙ୍କୁ କାର୍ଯ୍ୟକ୍ରମ ମାଧ୍ୟମରେ ନିୟୋଜିତ କରାଯାଉଥିଲା। ସେମାନଙ୍କୁ କଠୋର ଏବଂ କ୍ରୁର ତାଲିମ ଦିଆଯାଉଥିଲା। ଭାରତ ବିରୋଧରେ ଆତଙ୍କବାଦ ପାଇଁ ଏହି ତାଲିମ ଛଅ ମାସରୁ ଗୋଟିଏ ବର୍ଷ ପର୍ଯ୍ୟନ୍ତ ଚାଲୁଥିଲା। ଏହି ତାଲିମ ଶିବିର ଆଫଗାନ ମୁଜାହିଦ୍ଦିନ ଏବଂ ପାକିସ୍ତାନୀ ସେନାର ସହଯୋଗରେ ପରିଚାଳିତ ହେଉଥିଲା।

ପାକିସ୍ତାନ ସମର୍ଥିତ ଆତଙ୍କବାଦୀ ଗୋଷ୍ଠୀସମୂହ

ଅପରେସନର ପ୍ରାରମ୍ଭିକ ପର୍ଯ୍ୟାୟରେ ଆଇଏସଆଇକୁ ଜମ୍ମୁ ଏବଂ କାଶ୍ମୀର ଲିବରେସନ ଫ୍ରଣ୍ଟ (ଜେକେଏଲଏଫ) ଭଳି ଗୋଷ୍ଠୀଗୁଡ଼ିକର ସମର୍ଥନ ମିଳିଥିଲା। ହେଲେ ୧୯୯୦ ଦଶକର ପ୍ରାରମ୍ଭ ସୁଦ୍ଧା ଜେକେଏଲଏଫ ଏବଂ ଏହାର ସ୍ପଷ୍ଟ ସ୍ୱାଧୀନତା ସମର୍ଥକ ସ୍ୱଭାବ ଦେଖି ସତର୍କ ହୋଇଯାଇଥିଲା ପାକିସ୍ତାନ । ପାକିସ୍ତାନର ସମର୍ଥନ ହରାଇବା ପରେ ଜେକେଏଲଏଫ ଧୀରେ ଧୀରେ ଦୁର୍ବଳ ହୋଇଯାଇଥିଲା । ଏହା ପରେ ପାକିସ୍ତାନ ଆଉ ଏକ ଆତଙ୍କବାଦୀ ସଂଗଠନ, ହିଜବୁଲ ମୁଜାହିଦ୍ଦିନ୍ ଆଡ଼କୁ ଧ୍ୟାନ ଦେଇଥିଲା, ଯାହାର ପାକିସ୍ତାନ ପରି ଭାରତ ବିରୋଧରେ ନିଜସ୍ୱ ଚିନ୍ତାଧାରା ଥିଲା।

ହିଜବୁଲ ମୁଜାହିଦ୍ଦିନ୍ ଆତଙ୍କବାଦୀ ସଂଗଠନର ପ୍ରଥମ ଟାର୍ଗେଟ ଥିଲା ଭାରତ-ଶାସିତ ଜମ୍ମୁ-କାଶ୍ମୀରକୁ ପାକିସ୍ତାନ ସହିତ ମିଶ୍ରଣ କରିବା ଏବଂ ଦ୍ୱିତୀୟ ଟାର୍ଗେଟ ଥିଲା ଜିହାଦର ଆରମ୍ଭ ସହିତ ଏକ ଇସଲାମିକ୍ ବ୍ୟବସ୍ଥା ପ୍ରତିଷ୍ଠା କରିବା। ଜମ୍ମୁ-କାଶ୍ମୀରରେ ଆତଙ୍କବାଦୀ ସଂଗଠନର ଜନ୍ମ ହେବାକୁ ଅଧିକ ସମୟ ଲାଗିଲା ନାହିଁ, ଯେଉଁମାନେ ସେମାନଙ୍କ ସଂଘର୍ଷର ଉଦ୍ଦେଶ୍ୟକୁ କାଶ୍ମୀରର 'ଇସଲାମୀକରଣ' ବୋଲି ଘୋଷଣା କରିଥିଲେ। ଧୀରେ ଧୀରେ ହିଜବ-ଏ-ଇସଲାମି, ହରକତ-ଉଲ-ଅନସାର, ଲସ୍କର-ଏ-ତୋଇବା, ଜୈଶ-ଏ-ମହମ୍ମଦ ଏବଂ ହରକତ-ଉଲ-ମୁଜାହିଦ୍ଦିନ ଭଳି ଆତଙ୍କବାଦୀ ସଂଗଠନ - ଯେଉଁମାନେ ମୌଳବାଦୀ ଚିନ୍ତାଧାରା ଦ୍ୱାରା ପ୍ରଶିକ୍ଷିତ ଏବଂ ପରିଚାଳିତ - କାଶ୍ମୀର ଉପତ୍ୟକାରେ ପ୍ରବେଶ କରିବା ଆରମ୍ଭ କଲେ।

APHC ସୃଷ୍ଟି କରିଥିଲା ଆଇଏସଆଇ

୧୯୯୩ ମସିହାରେ ପାକିସ୍ତାନର ପ୍ରମୁଖ ଗୁପ୍ତଚର ସଂସ୍ଥା, ଇଣ୍ଟର-ସର୍ଭିସେସ୍ ଇଣ୍ଟେଲିଜେନ୍ସ (ISI) ଦ୍ୱାରା ସୃଷ୍ଟି କରାଯାଇଥିଲା All Parties Hurriyat Conference (APHC) । ଏସମ୍ପର୍କରେ ଲେଫ୍ଟନାଣ୍ଟ ଜେନେରାଲ ମହମ୍ମଦ ଅସଦ ଦୁରାନି ତାଙ୍କ ପୁସ୍ତକ, ଦି ସ୍ପାଏ କ୍ରୋନିକଲ୍ସରେ ସମସ୍ତ ଘଟଣା ବ୍ୟାଖ୍ୟା କରିଛନ୍ତି। ସେ ଇଣ୍ଟର-ସର୍ଭିସେସ୍ ଇଣ୍ଟେଲିଜେନ୍ସ (ISI) ର ମହାନିର୍ଦ୍ଦେଶକ ଏବଂ ପାକିସ୍ତାନ ସେନାର ସାମରିକ ଗୁପ୍ତଚର ମହାନିର୍ଦ୍ଦେଶକ ଭାବରେ କାର୍ଯ୍ୟ କରିଥିଲେ। ତାଙ୍କ ପୁସ୍ତକଟି ୨୦୧୮ ରେ ପ୍ରକାଶିତ ହୋଇଥିଲା।

ପାକିସ୍ତାନ ପ୍ରଶିକ୍ଷିତ ଆତଙ୍କବାଦୀ

୧୯୯୦ ଦଶକର ପ୍ରାରମ୍ଭରେ ସ୍ଥାନୀୟ ନିଯୁକ୍ତିପ୍ରାପ୍ତ ଲୋକଙ୍କୁ ଉତ୍ସାହିତ କରିବା କଷ୍ଟକର ନଥିଲା । ସେତେବେଳେ ISI, ସୁରକ୍ଷା ବାହିନୀର କନଭୟ ଏବଂ ପାଟ୍ରୋଲିଂ ଉପରେ (ଏକେ-୪୭ ଏବଂ ମେସିନ୍ ଗନ୍ ବ୍ୟବହାର କରି) ଆକ୍ରମଣ କରିବା ପାଇଁ ପାକିସ୍ତାନ-ପ୍ରଶିକ୍ଷିତ ଆତଙ୍କବାଦୀ ((PTM) ଉପରେ ନିର୍ଭର କରୁଥିଲା। ସହରାଞ୍ଚଳ ଭିତରେ ଥିବା କେନ୍ଦ୍ରୀୟ ପୋଲିସ ସଂଗଠନ (ସିପିଓ) ବଙ୍କର ଏବଂ ପୋଷ୍ଟଗୁଡ଼ିକ ଉପରେ ହିଟ୍-ଏଣ୍ଡ-ରନ୍ ଚଢାଉ କରିବା ପାଇଁ ମଧ୍ୟ ପିଟିଏମ୍ ବ୍ୟବହାର କରାଯାଉଥିଲା (ଯାହା ପାଇଁ ହ୍ୟାଣ୍ଡ ଗ୍ରେନେଡ୍ ଏବଂ ରକେଟ୍ ପ୍ରୋପେଲ୍ଡ ଗ୍ରେନେଡ୍ ବ୍ୟବହାର କରାଯାଉଥିଲା)।

ଅନ୍ୟପକ୍ଷରେ ଆଣ୍ଟି ପର୍ସନାଲ ଲ୍ୟାଣ୍ଡ ମାଇନ ଓ ଇମ୍ପ୍ରୋଭାଇଜଡ ଡିଭାଇସ ଲଗାଇବା ଭଳି କମ ବିପଦପୂର୍ଣ୍ଣ କାମ ଓ ଅସ୍ତ୍ରଶସ୍ତ୍ର, ଗୁଳିଗୋଳା ଏବଂ ବାର୍ତ୍ତା ପଠାଇବା ପାଇଁ, ସ୍ଥାନୀୟ ଭାବରେ ତାଲିମପ୍ରାପ୍ତ ଆତଙ୍କବାଦୀ ମାନଙ୍କୁ ସାଧାରଣତଃ ନିଯୁକ୍ତି ଦିଆଯାଉଥିଲା। ଭୟଙ୍କର ପାକିସ୍ତାନୀ ଅପରାଧୀମାନେ ମଧ୍ୟ କାଶ୍ମୀରରେ ପ୍ରବେଶ କରିଥିଲେ । ଏହା ବ୍ୟତୀତ ପାକିସ୍ତାନୀ ଜେଲରେ ଦୀର୍ଘକାଳୀନ ସଜା ଭୋଗୁଥିବା ଅପରାଧୀମାନଙ୍କୁ ମଧ୍ୟ ତଥାକଥିତ ଜିହାଦରେ ଅଂଶଗ୍ରହଣ କରିବାକୁ ପ୍ରଲୋଭିତ କରାଯାଇଥିଲା। ଜମ୍ମୁ ଏବଂ କାଶ୍ମୀରରେ ଆଇଏସଆଇ ଦ୍ୱାରା ନିର୍ଦ୍ଧାରିତ ସମୟ ଅବଧି ମଧ୍ୟରେ ଡ୍ୟୁଟିକୁ ସଫଳତାର ସହିତ ସମାପ୍ତ କଲେ, ସେମାନଙ୍କର ସଜା କ୍ଷମା କରାଯିବ ବୋଲି କୁହାଯାଉଥିଲା ।

ପାକିସ୍ତାନରେ ଆତଙ୍କର ସ୍କୁଲ

ଅବଜରଭର ରିସର୍ଚ୍ଚ ଫାଉଣ୍ଡେସନ ଅନୁଯାୟୀ, ପାକିସ୍ତାନର ଅନେକ ସ୍ଥାନରେ ଆତଙ୍କବାଦୀ ତାଲିମ ସ୍କୁଲଗୁଡ଼ିକ ସକ୍ରିୟ ଅଛି, ଯେଉଁଠାରେ ଶହ ଶହ ଯୁବକଙ୍କୁ ଆତ୍ମଘାତୀ ମିଶନର ତାଲିମ ଦିଆଯାଏ। ସେମାନଙ୍କୁ AK-47, Mi-5 ଏବଂ SAM ଭଳି ଅତ୍ୟାଧୁନିକ ଅସ୍ତ୍ରଶସ୍ତ୍ର ବ୍ୟବହାର କରିବାକୁ ଶିକ୍ଷା ଦିଆଯାଏ। ପଞ୍ଜାବ, ଉତ୍ତର ପଶ୍ଚିମ ସୀମାନ୍ତ ପ୍ରଦେଶ (NWFP), ୱଜିରିସ୍ତାନ ଏବଂ ପାକ୍ ଅଧିକୃତ କାଶ୍ମୀରରେ ଏହି ସ୍କୁଲ ଚାଲେ । ଲସ୍କର-ଏ-ତୋଇବା (LeT)ସମେତ ବିଭିନ୍ନ ଆତଙ୍କବାଦୀ ଗୋଷ୍ଠୀ ପ୍ରାୟତଃ ପୂର୍ବତନ ସାମରିକ କର୍ମଚାରୀଙ୍କ ସହାୟତାରେ ଏହି ଆତଙ୍କବାଦ ସ୍କୁଲ କିମ୍ବା ଶିବିରଗୁଡ଼ିକ ପରିଚାଳନା କରନ୍ତି।

ଆତଙ୍କୀ ଶିବିର

୨୦୧୬ରେ ଆତଙ୍କୀ ଶିବିର ତାଲିକାରେ ଅବଦୁଲ୍ଲା ବିନ୍ ମାସୁଦ, ଶୱାଇ ନାଲ୍ଲା, ଗଢ଼ି ଦୁପଟ୍ଟା, ପୀର ଚିନାସି, ପିଓକେର ଦୁଧନିଆଲ ଏବଂ ମୁଜାଫରାବାଦର ଶାମସ-ଉଲ-ହକ୍ ଭଳି ଅଞ୍ଚଳ ଆଦି ସାମିଲ ଥିବା ସୂଚନା ମିଳିଥିଲା । ପ୍ରତ୍ୟେକ ଆତଙ୍କୀ ଶିବିରରେ ପ୍ରାୟ ୪୫ ରୁ ୫୦ ଜଣ ଆତଙ୍କବାଦୀଙ୍କୁ ତାଲିମ ଦିଆଯାଏ । ଆତଙ୍କବାଦୀମାନଙ୍କୁ ନିୟନ୍ତ୍ରଣ ରେଖାରେ ଥିବା ସେମାନଙ୍କର ଲଞ୍ଚ ପ୍ୟାଡକୁ ପଠାଯିବା ପୂର୍ବରୁ ୩୦ ରୁ ୩୫ ଦିନ ପର୍ଯ୍ୟନ୍ତ ତାଲିମ ଦିଆଯାଏ ବୋଲି ଗୁଇନ୍ଦା ରିପୋର୍ଟରେ ପ୍ରକାଶ । ହିଜବୁଲ ମୁଜାହିଦ୍ଦିନ, ଲସ୍କର-ଏ-ତୋଇବା, ଜୈଶ-ଏ-ମହମ୍ମଦ, ହୁଜି, ଅଲ-ବଦର ଭଳି ଆତଙ୍କବାଦୀ ସଂଗଠନର ଆତଙ୍କବାଦୀମାନଙ୍କୁ ଏଠାରେ ତାଲିମ ଦିଆଯାଏ । ଛୋଟ ମିଶ୍ରିତ ଗୋଷ୍ଠୀର ଆତଙ୍କବାଦୀମାନଙ୍କୁ ମଧ୍ୟ କିଛି ଶିବିରରେ ତାଲିମ ଦିଆଯାଏ ।

ପାକିସ୍ତାନ କିପରି କାଶ୍ମୀରରେ ଆତଙ୍କବାଦୀମାନଙ୍କୁ ଅନୁପ୍ରବେଶ କରାଉଥିଲା

ପାକିସ୍ତାନ ପକ୍ଷରୁ ସ୍ଥାନୀୟ ଯୁବକଙ୍କୁ ରୋଜଗାରର ଲୋଭ ଦେଖାଇ ଆତଙ୍କବାଦକୁ ପ୍ରୋତ୍ସାହିତ କରାଯାଇପାରିବ । ଏଥିପାଇଁ ପ୍ରଥମେ ସେମାନଙ୍କୁ ନିଯୁକ୍ତି ଦିଆଯାଇ ତାଲିମ ଦିଆଯାଉଥିଲା ଏବଂ ତାପରେ ନିୟନ୍ତ୍ରଣ ରେଖା ପାର କରି ଅନୁପ୍ରବେଶ କରାଯାଉଥିଲା।

କାଶ୍ମୀରରେ ଆତଙ୍କବାଦକୁ ଆର୍ଥିକ ସହାୟତା କେଉଁଠାରୁ ମିଳୁଥିଲା ?

• ପାକିସ୍ତାନରେ ମୁଦ୍ରିତ ନକଲି ମୁଦ୍ରା
• କିଛି ମଧ୍ୟପ୍ରାଚ୍ୟ ଏବଂ ୟୁରୋପୀୟ ଦେଶ ଏବଂ ଆମେରିକାରେ 'ଜିହାଦ ପାଣ୍ଠି' ନାମରେ ଦାନ ସଂଗ୍ରହ
• ଡ୍ରଗ୍ସ ଚୋରାଚାଲାଣ
• ଜମ୍ମୁ କାଶ୍ମୀରରେ ବ୍ୟବସାୟୀ, ଠିକାଦାର ଏବଂ ଧନୀ ଲୋକଙ୍କ ଠାରୁ ଚାନ୍ଦା ଆଦାୟ
• ପାକିସ୍ତାନରୁ ଜମ୍ମୁ କାଶ୍ମୀରରେ କାର୍ଯ୍ୟ କରୁଥିବା ଆତଙ୍କବାଦୀ ଏବଂ ବିଚ୍ଛିନ୍ନତାବାଦୀ ଗୋଷ୍ଠୀଗୁଡ଼ିକୁ ପଠାଯାଇଥିବା ପାଣ୍ଠି

• ଡ୍ରଗ୍ସ ଡିଲରମାନଙ୍କ ମାଧ୍ୟମରେ ପ୍ରାପ୍ତ ପାଣ୍ଠି
• ଦୁବାଇରେ କାର୍ପେଟ ଏବଂ ହସ୍ତଶିଳ୍ପ ବ୍ୟବସାୟ କରୁଥିବା କିଛି କାଶ୍ମୀର ବ୍ୟବସାୟୀଙ୍କ ଦ୍ୱାରା ପଠାଯାଇଥିବା ପାଣ୍ଠି
• ମୁମ୍ବାଇ ଏବଂ ଦିଲ୍ଲୀରେ ହୱାଲା ଡିଲର
• ଜକାତ (ଏକ ଇସଲାମିକ ଟିକସ) ଏବଂ ଦାନ
• ହଜ୍ ଯାତ୍ରୀ
• MBBS ସିଟ୍ ରାକେଟ

କାଶ୍ମୀର ଉପତ୍ୟକାରେ ବିଦ୍ରୋହ/ଆତଙ୍କବାଦକୁ ପ୍ରୋତ୍ସାହନ ଦେବାପାଇଁ ପ୍ରତିବର୍ଷ ୨୫୦ ରୁ ୩୦୦ ମିଲିୟନ ଆମେରିକୀୟ ଡଲାର ଖର୍ଚ୍ଚ କରେ ପାକିସ୍ତାନ । ନିର୍ଭରଯୋଗ୍ୟ ଗୁଇନ୍ଦା-ଆଧାରିତ ସୂଚନା ଅନୁସାରେ, ଆତଙ୍କୀଙ୍କ ପାଇଁ ମୋଟ ବାର୍ଷିକ ଖର୍ଚ୍ଚ ହୁଏ ୧.୫-୨ ବିଲିୟନ ଟଙ୍କା । ଏହି ପରିମାଣରୁ JeM, HM ଏବଂ LeT ଭଳି ସଂଗଠନଗୁଡ଼ିକୁ ପାକିସ୍ତାନରୁ ଅସ୍ତ୍ରଶସ୍ତ୍ର ଚୋରା ଚାଲାଣ ଏବଂ ଆତଙ୍କବାଦୀଙ୍କ ଅନୁପ୍ରବେଶ ବ୍ୟବସ୍ଥା କରିବା ପାଇଁ ୫୦୦ ନିୟୁତ ଟଙ୍କା ପାଣ୍ଠି ମିଳିଥାଏ। ବାକି, ଅର୍ଥାତ୍ ୧ ରୁ ୧.୫ ବିଲିୟନ ଟଙ୍କା ଲଜିଷ୍ଟିକ୍ସ ଏବଂ ଅନ୍ୟାନ୍ୟ ସଂଗଠନିକ ଏବଂ ପରିଚାଳନାଗତ ଖର୍ଚ୍ଚ ପାଇଁ ବ୍ୟବହୃତ ହୁଏ।

ବିଦେଶୀ ଆତଙ୍କବାଦୀଙ୍କ ମାସିକ ପାରିଶ୍ରମିକ (FT) ୧୦,୦୦୦ ରୁ ୧୫,୦୦୦ ଟଙ୍କା ଏବଂ ସ୍ଥାନୀୟ ଆତଙ୍କବାଦୀଙ୍କ (LT) ୩,୦୦୦ ରୁ ୧୦,୦୦୦ ଟଙ୍କା। ଅଜମଲ କସାବଙ୍କୁ ପଚରାଉଚରା କରିବାରୁ ଜଣାପଡ଼ିଥିଲା, ତାଙ୍କୁ ତାଲିମ ପରେ ୧,୫୦,୦୦୦ ଟଙ୍କା ଏବଂ ଏକ ସ୍ୱତନ୍ତ୍ର ଛୁଟି ପ୍ୟାକେଜ୍ ଦିଆଯାଉଥିଲା। ପଥର ଫିଙ୍ଗାଳିମାନଙ୍କୁ ପ୍ରତି ଘଟଣାରେ ୩୦୦ ରୁ ୫୦୦ ଟଙ୍କା ଏବଂ ଏହାକୁ ପରିଚାଳନା କରୁଥିବା ଲୋକମାନଙ୍କୁ ୧୦,୦୦୦ ରୁ ୧୨,୦୦୦ ଟଙ୍କା ଦିଆଯାଇଥାଏ। ଡକ୍ଟର ଅଭିନବ ପାଣ୍ଡ୍ୟାଙ୍କ ପୁସ୍ତକ Terror Financing in Kashmir ଅନୁଯାୟୀ ଆଞ୍ଚଳିକ ସର୍ଭେ ଏବଂ ସାକ୍ଷାତକାର ଉପରେ ଆଧାରିତ ଏକ ଆନୁମାନିକ ଆକଳନରୁ ଜଣାପଡିଛି , ପାକିସ୍ତାନ ଜଣେ ଆତଙ୍କବାଦୀଙ୍କୁ ତାଲିମ ଦେବା ପାଇଁ ହାରାହାରି ୨.୫ ରୁ ୩ ଲକ୍ଷ ଟଙ୍କା ଖର୍ଚ୍ଚ କରେ।