ବ୍ୟାୟାମ ସ୍ୱାସ୍ଥ୍ୟ ପାଇଁ ଅତ୍ୟନ୍ତ ଲାଭଦାୟକ ହୋଇଥାଏ। ଉନ୍ନତ ଫିଟ୍ନେସ୍ ଏବଂ ଏକ ଆକର୍ଷଣୀୟ ଶରୀର ପାଇବା ପାଇଁ ଅନେକ ଲୋକ ଜିମ୍ରେ ଯୋଗ ଦିଅନ୍ତି। ଫଳ ପାଇବା ପାଇଁ ସେମାନେ ପ୍ରତିଦିନ ଘଣ୍ଟା ଘଣ୍ଟା ଝାଳ ବୁହାନ୍ତି। ତଥାପି, ଅନେକ ଲୋକ ଜିମ୍ରେ ବ୍ୟାୟାମ କରିବା ସମୟରେ ଛୋଟ ଛୋଟ ଭୁଲ କରନ୍ତି, ଯେଉଁ କାରଣରୁ ସେମାନଙ୍କର ଶରୀର କ୍ଷତିଗ୍ରସ୍ତ ହେବାକୁ ଲାଗେ।
ଅଧିକାଂଶ ଲୋକ ଏଭଳି ଭୁଲ୍ କରୁଥିବା ଦେଖାଯାଏ। ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁଯାୟୀ ଜିମ୍ରେ କେତେକ ତ୍ରୁଟିକୁ ଜାଣିବା ଏବଂ ଏଡ଼ାଇବା ଅତ୍ୟନ୍ତ ଜରୁରୀ। ବେଳେବେଳେ ଏହି ଭୁଲଗୁଡ଼ିକ ଗମ୍ଭୀର ସମସ୍ୟାର କାରଣ ମଧ୍ୟ ହୋଇପାରେ।
Also Read
ୱାର୍ମ ଅପ୍ ନ କରିବା:
ଫିଟ୍ନେସ୍ ଟ୍ରେନର୍ଙ୍କ ମତରେ ବ୍ୟାୟାମ ଆରମ୍ଭ କରିବା ପୂର୍ବରୁ ଜିମ୍ରେ ସମସ୍ତେ ୱାର୍ମ ଅପ୍ କରିବା ଉଚିତ। ଏହା ମାଂସପେଶୀରେ ରକ୍ତ ପ୍ରବାହକୁ ବଢାଇଥାଏ ଏବଂ ବ୍ୟାୟାମ ପାଇଁ ପ୍ରସ୍ତୁତ କରିଥାଏ। ଯଦି ୱାର୍ମ ଅପ୍ ନ କରନ୍ତି, ମାଂସପେଶୀରେ ଚାପ କିମ୍ବା ଆଘାତ ହେବାର ଆଶଙ୍କା ବଢିଯାଏ।
ଯଦି ଆପଣ ହଠାତ୍ ତୀବ୍ର ବ୍ୟାୟାମ କରିବା ଆରମ୍ଭ କରନ୍ତି, ତେବ୍ ଏହା ଶରୀର ପାଇଁ କ୍ଷତି ପହଞ୍ଚାଇପାରେ। ଏଭଳି ପରିସ୍ଥିତିରେ ସମସ୍ତେ ପ୍ରଥମେ ନିଜ ଶରୀରକୁ ବ୍ୟାୟାମ ପାଇଁ ପ୍ରସ୍ତୁତ କରିବା ଉଚିତ। ଏହା କରିବା ପାଇଁ ସର୍ବୋତ୍ତମ ଉପାୟ ହେଉଛି ୱାର୍ମ ଅପ୍ କରିବା।
ଭୁଲ୍ କୌଶଳ:
ବିଶେଷଜ୍ଞଙ୍କ ଅନୁଯାୟୀ, ଭୁଲ କୌଶଳ ସହିତ ବ୍ୟାୟାମ କରିବା ମଧ୍ୟ ଗୁରୁତର ଆଘାତ ଦେଇପାରେ। ଯଦି ଆପଣ ଓଜନ ଉଠାଇବା ସମୟରେ ପିଠିକୁ ବଙ୍କା କରନ୍ତି କିମ୍ବା ସଠିକ୍ ପୋଜିସନ୍ରେ ନ ରୁହନ୍ତି, ତେବେ ଏହା ମେରୁଦଣ୍ଡର କ୍ଷତି ଘଟାଇପାରେ।
ସଠିକ କୌଶଳ ଅନୁସରଣ କରିବା ଦ୍ୱାରା କେବଳ ମାଂସପେଶୀକୁ ମଜବୁତ କରେ ନାହିଁ, ବରଂ ଆଘାତକୁ ମଧ୍ୟ ରୋକିଥାଏ। ଏହା ବ୍ୟତୀତ, ଅନେକ ଲୋକ ଭାବନ୍ତି ଯେ ଅଧିକ ଓଜନ ଉଠାଇବା ଦ୍ୱାରା ଶୀଘ୍ର ଶକ୍ତି ବୃଦ୍ଧି ହୁଏ, କିନ୍ତୁ ଏହା କରିବା ଉଚିତ ନୁହେଁ। ନିଜ ଶରୀର ଅନୁଯାୟୀ ଓଜନ ବାଛିବା ଏବଂ ଧୀରେ ଧୀରେ ଓଜନ ବଢାଇବା ଉଚିତ।
ବିଶ୍ରାମ ନ ନେବା:
ଫିଟନେସ୍ ପ୍ରଶିକ୍ଷକଙ୍କ ଅନୁଯାୟୀ, ବ୍ୟାୟାମ କରିବାକୁ ଜିମ୍ ଯିବା ଯେତିକି ଗୁରୁତ୍ୱପୂର୍ଣ୍ଣ, ବ୍ୟାୟାମ ପରେ ବିଶ୍ରାମ ନେବା ମଧ୍ୟ ସେମିତି ଗୁରୁତ୍ୱପୂର୍ଣ୍ଣ। ବ୍ୟାୟାମ ପରେ ମାଂସପେଶୀ ରିକଭରୀ ହେବା ପାଇଁ ସମୟ ଆବଶ୍ୟକ କରେ। ଏହି କାରଣରୁ, ଲୋକମାନେ ସପ୍ତାହରେ ୪ରୁ ୫ ଦିନ ବ୍ୟାୟାମ୍ କରିବା ଏବଂ ଅବଶିଷ୍ଟ ଦିନରେ ବିଶ୍ରାମ ନେବା ଉଚିତ।
ନିରନ୍ତର ବ୍ୟାୟାମ କରିବା ଦ୍ୱାରା ମାଂସପେଶୀ ପର୍ଯ୍ୟାପ୍ତ ବିଶ୍ରାମ ପାଏ ନାହିଁ। ଏହା ଫଳରେ ଦୀର୍ଘ ଦିନ ଧରି ଥକ୍କାପଣ, ମାଂସପେଶୀଜନିତ ଚାପ ଏବଂ ମାଂସପେଶୀ ହ୍ରାସ କରିପାରେ। ଏହା ବୁଝିବା ଆବଶ୍ୟକ ଯେ ବିଶ୍ରାମ ହେଉଛି ଫିଟନେସ୍ ରୁଟିନ୍ର ଏକ ଅଂଶ।
ପର୍ଯ୍ୟାପ୍ତ ପାଣି ନ ପିଇବା:
ବ୍ୟାୟାମ ସମୟରେ ପର୍ଯ୍ୟାପ୍ତ ପରିମାଣର ପାଣି ପିଇବା ମଧ୍ୟ ଜରୁରୀ। ବ୍ୟାୟାମ କରିବା ସମୟରେ ଅନେକ ଲୋକ ହାଇଡ୍ରେସନ୍କୁ ଅଣଦେଖା କରନ୍ତି, ଯାହା ଶରୀରରେ ଜଳ ଅଭାବର କାରଣ ହୋଇପାରେ। ଏହା ଥକ୍କାପଣ, ମୁଣ୍ଡ ବୁଲାଇବା ଏବଂ ମାଂସପେଶୀ ଯନ୍ତ୍ରଣା ଦେଇପାରେ।ତେଣୁ, ବ୍ୟାୟାମ ପୂର୍ବରୁ, ମଝିରେ ଏବଂ ପରେ ପର୍ଯ୍ୟାପ୍ତ ପରିମାଣର ପାଣି ପିଅନ୍ତୁ।
ବିନା ପ୍ଲାନ୍ରେ ବ୍ୟାୟାମ:
ଏହା ବ୍ୟତୀତ, ଅନେକ ଲୋକ ବିନା ପ୍ଲାନ୍ରେ ବ୍ୟାୟାମ କରିବା ଆରମ୍ଭ କରନ୍ତି, ଯାହା ଦୀର୍ଘ ଦିନିଆ ଅନେକ ସମସ୍ୟା ସୃଷ୍ଟି କରିପାରେ। ଏନେଇ ଫିଟ୍ନେସ୍ ଲକ୍ଷ୍ୟ ସ୍ଥିର କରନ୍ତୁ ଏବଂ ସେହି ଅନୁଯାୟୀ ବ୍ୟାୟାମ ରୁଟିନ୍ ପ୍ରସ୍ତୁତ କରନ୍ତୁ।