ଉତ୍କଳୀୟ ସଂସ୍କୃତିର ପ୍ରସାର ପାଇଁ ଆମେରିକାରେ ଆଞ୍ଚଳିକ ନାଟ୍ୟ ମହୋତ୍ସବ

ଆମେରିକାର ଆଟ୍ଲାଣ୍ଟା ସହରରେ ବାସ କରୁଥିବା ଓଡ଼ିଆ ଭାଇ ଭଉଣୀ ମାନେ ଏକତ୍ରିତ ହୋଇ ମହା ଆଡମ୍ବରରେ ପାଳନ କରିଥିଲେ 'ଆଞ୍ଚଳିକ ନାଟ୍ୟ ମହୋତ୍ସବ – ୨୦୨୩’। ଏପରି ଏକ ପ୍ରୟାସ ପ୍ରଥମ ଥର ପାଇଁ ଓସା -ଜର୍ଜିଆ ଅନୁଷ୍ଠାନର ଅନୁକୁଲ୍ୟରେ ଆୟୋଜିତ ହୋଇଛି ।

ଏହି ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ଡ. ନାଜିଆ ଆଲାମ ମହୋତ୍ସବର ଉଦ୍‌ଘାଟନ କରିବା ସହ ବିଭିର୍ନ ରାଜ୍ୟରୁ ଆସିଥିବା ଦର୍ଶକ ତଥା କଳାକାରମାନଙ୍କୁ ନିଜର ସୁମଧୁର ସଂଗୀତ ମାଧ୍ୟମରେ ଉତ୍କଳ ଜନନୀର ସ୍ମୃତିକୁ ମନେ ପକାଇ ଦେଇଥିଲେ ।

ଗତ ୨୬ ତାରିଖରେ ଦୀର୍ଘ ୪ ଘଣ୍ଟା ଧରି ଚାଲିଥିବା ଏହି କାର୍ଯ୍ୟକ୍ରମରେ ଜର୍ଜିଆ ତଥା ପଡୋଶୀ ରାଜ୍ୟ ଟେନେସି, ଉତ୍ତର କାରୋଲିନା, ଦକ୍ଷିଣ କାରୋଲିନାର କଳାକାର ମାନଙ୍କ ଦ୍ୱାରା ବିଭିନ୍ନ କଳା ପ୍ରଦର୍ଶିତ ହୋଇଥିଲା। ଏହି କଳା ପ୍ରଦର୍ଶନ ବିଶେଷ କରି ଓଡ଼ିଶାର ସଂସ୍କୃତି ଓ ପରଂପରା ଉପରେ ଆଧାରିତ ଥିଲା।

‘ଗର୍ବରେ କୁହ ମୁଁ ଓଡ଼ିଆ’। ଏଭଳି ଭାବନାକୁ ଓଡ଼ିଆ ଭାଇ ଭଉଣୀଙ୍କ ମନରେ ଜାଗ୍ରତ କରିବାକୁ ଏହି ମହୋତ୍ସବର ଲକ୍ଷ୍ୟ ବୋଲି ଆୟୋଜକଙ୍କ ପକ୍ଷରୁ କୁହାଯାଇଛି। ଓଷା, ଜର୍ଜିଆର କାର୍ଯ୍ୟକର୍ତ୍ତା ଭବାନୀ ଶଙ୍କର ବକ୍ସି , ବିକ୍ଷିପ୍ତା ପଣ୍ଡା ଓ ଲଳିତ ବାରିକ ମହୋତ୍ସବର ସଫଳତା ପାଇଁ ସମସ୍ତଙ୍କୁ ଧନ୍ୟବାଦ ଦେଇଥିଲେ।