ବାଦାମ ବିକାଳିରୁ ସୋସିଆଲ୍ ମିଡିଆ ସେନ୍‌ସେସନ୍ ଭୁବନ

‘ବାଦାମ୍ ବାଦାମ୍ ଦାଦା କାଚ୍ଚା ବାଦାମ୍’, ଫେସ୍‌ବୁକ, ଇନ୍‌ଷ୍ଟାଗ୍ରାମ୍, ୟୁଟ୍ୟୁବ୍ ସବୁଠି ଚହଳ ପକେଇଥିବା ଏହି ଗୀତରେ ଡ୍ୟାନ୍ସ ଭିଡିଓ ଛାଡ଼ୁଛନ୍ତି ସେଲିବ୍ରିଟିଠୁ ଆରମ୍ଭ କରି ସାଧାରଣ ୟୁଜର୍ । ସୋସିଆଲ୍ ମିଡିଆରେ ଆପଣ ବି ହୁଏତ ଶୁଣିଥିବେ, ଆଉ ମନେ ମନେ ଗୁଣୁ ଗୁଣାଇଥିବେ ଏହି ବାଦାମ୍ ବାଦାମ୍, କାଚ୍ଚା ବାଦାମ୍ ଗୀତ । ତେବେ ଏହି ଗୀତ ପଛର ମଣିଷ କିଏ ଏବଂ ତାଙ୍କ ଲୋକପ୍ରିୟତା କେମିତି ଦେଶରୁ ଡେଇଁ ବିଦେଶରେ ବି ପହଞ୍ଚିଲାଣି, ଜାଣନ୍ତୁ..

ବୁଲିବୁଲି ବାଦାମ ବିକୁଥିବା ଜଣେ ବେପାରୀ ଖାଲି ନିଜେ ନାଚୁନାହାନ୍ତି, ସାରା ଦୁନିଆକୁ ନିଜ ଗୀତରେ ନଚାଉଛନ୍ତି । ଭୁବନ ବାଦ୍ୟକାର ଫେସ୍‌ବୁକ୍ ସର୍ଟ୍, ଇନଷ୍ଟାଗ୍ରାମ ରିଲ୍‌ରେ ସେନସେସନ୍ ପାଲଟି ଯାଇଛନ୍ତି । ବଙ୍ଗାଳୀ ଭାଷାରେ ତାଙ୍କର କାଚ୍ଚା ବାଦାମ୍ ଗୀତ ସୋସିଆଲ୍ ମିଡିଆରେ ଚହଳ ପକାଇବା ପରେ, କିଏ ଏହାକୁ ନେଇ ରିମିକ୍ସ ତିଆରି କରୁଛି, କିଏ ଡ୍ୟାନ୍ସ ଭିଡିଓ ଛାଡ଼ୁଛି, ତ ଆଉ କିଏ ଖୋଦ୍ ଭୁବନଙ୍କୁ ଷ୍ଟୁଡିଓ ଫ୍ଲୋର୍‌କୁ ଡାକୁଛନ୍ତି । ହରିୟାଣା ଗାୟକ ଅମିତ ଢୁଲ୍ ଓ ସୋସିଆଲ୍ ମିଡିଆ ଷ୍ଟାର୍ ନିଶା ଭଟ୍ଟ୍ କାଚ୍ଚା ବାଦାମ ଗାୟକ ଭୁବନ ବାଦ୍ୟକାରଙ୍କୁ ସାଥିରେ ନେଇ ଏହି ଗୀତକୁ ହରିୟାଣୱି ଟୁଇଷ୍ଟ୍ ଦେଇଛନ୍ତି ।

ମୁଣ୍ଡର ଚୁଟି, ହାତର ବଳା, ବେକର ଚେନ୍, ଭଙ୍ଗା ମୋବାଇଲ୍ ଆଦି ପୁରୁଣା ଜିନିଷ ବଦଳରେ କଞ୍ଚା ବାଦାମ୍ ବିକୁଥିବା ଭୁବନଙ୍କ ନିଜ ତିଆରି ଏହି ଗୀତର ଅର୍ଥ କେହି ବୁଝନ୍ତୁ କି ନବୁଝନ୍ତୁ, ଅଣ୍ଟା ହଲାଇବାକୁ କିନ୍ତୁ ଭୁଲୁନାହାନ୍ତି । ଖାଲି ଦେଶ ନୁହେଁ, ଦେଶ ବାହାରେ ବି ଆରମ୍ଭ ହୋଇଛି କାଚ୍ଚା ବାଦାମ୍ ଟ୍ରେଣ୍ଡ୍ ।

ପଶ୍ଚିମବଙ୍ଗ ବୀରଭୂମ୍ କୁରାଲୟୁଡ଼ି ଗାଁର ଭୁବନ ବାଦ୍ୟକାର, ପୂର୍ବରୁ ବାଉଲ୍ ସଂଗୀତ୍ ଦଳ ସହ ଗାଁ ଗାଁ ବୁଲୁଥିବାରୁ, ପରେ ବାଦାମ ବିକିବା ପାଇଁ ମଧ୍ୟ ଗୀତର ସାହାରା ନେଇଥିଲେ । ହେଲେ ସ୍ୱପ୍ନରେ ବି ଭାବିନଥିଲେ, ତାଙ୍କର ଏହି ଗୀତ ଦିନେ ଲକ୍ଷ ଲକ୍ଷ କୋଟି କୋଟି ଲୋକଙ୍କୁ ପସନ୍ଦ ଆସିବ । ହେଲେ ଏହି ଲୋକପ୍ରିୟତା ତାଙ୍କ ଜୀବନଜୀବୀକାରେ କେତେ ସୁଧାର ଆଣିବ, ତାକୁ ନେଇ ସେ ନିଜେ ବି ସନ୍ଦିହାନ । କାଚା ବାଦାମ୍ ଗୀତ ସୋସିଆଲ୍ ମିଡିଆରେ ନିଆଁ ଲଗାଇବା ପରେ, ଭୁବନଙ୍କୁ ନିଜ ପ୍ରଚାର ଅଭିଯାନରେ ସାମିଲ କରିଛି ଟିଏମ୍‌ସି । ପଶ୍ଚିମବଙ୍ଗ ଆସାନସୋଲ୍‌ର ମଞ୍ଚ ଉପରେ ନିଜର ଭାଇରାଲ୍ ଗୀତ ଗାଇବା ସହ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ବି ପ୍ରଚାର କରିଛନ୍ତି ଭୁବନ ।

ପୂର୍ବରୁ ରାନୁ ମଣ୍ଡଳ ଓ ସହଦେବ ଦିର୍ଦୋଙ୍କ ଭଳି ବହୁ ସାଧାରଣ ମଣିଷଙ୍କୁ ବି ରାତାରାତି ଅସାଧାରଣ ଲୋକପ୍ରିୟତା ଆଣି ଦେଇଥିଲା ସୋସିଆଲ୍ ମିଡିଆ, ଠିକ୍ ଏଇ କାଚା ବାଦାମ୍ ଗାୟକ ଭୁବନ ବାଦ୍ୟକାରଙ୍କ ଭଳି ।