ପରୀକ୍ଷାରେ ଝିଅ ରଖିଲା ଶତ ପ୍ରତିଶତ ନମ୍ବର, ଖୁସି ହେବା ପରିବର୍ତ୍ତେ ଚିନ୍ତାରେ ମା’

ପରୀକ୍ଷାରେ ମେଧାବୀ ଝିଅ ରଖିଛି ଶତ ପ୍ରତିଶତ ନମ୍ବର । ହେଲେ ଖୁସି ହେବା ପରିବର୍ତ୍ତେ ଚିନ୍ତାରେ ମା’ । ହରିୟାଣାର ଅଞ୍ଜଲି ଯାଦବ କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସ୍ଇ) ଦଶମ ପରୀକ୍ଷାରେ ୧୦୦ ପ୍ରତିଶତ ନମ୍ବର ରଖିଛନ୍ତି । କୌଣସି ବିଷୟରେ ତାଙ୍କର ଗୋଟିଏ ବି ନମ୍ବର କଟିନାହିଁ । ହେଲେ ଦେଶରେ ଶୀର୍ଷ ସ୍ଥାନ ହାସଲ କରିଥିବା ଅଞ୍ଜଳିଙ୍କ ମା ଏବେ ଅସହାୟ ଅନୁଭବ କରୁଛନ୍ତି । ଝିଅ ଭଲ ପାଠ ପଢ଼ୁଥିବା ବେଳେ ତା’ର ଆଗାମୀ ପାଠପଢ଼ାକୁ ନେଇ ସେ ଚିନ୍ତାରେ ଅଛନ୍ତି । ଅଞ୍ଜଳିଙ୍କ ପରିବାର ବଞ୍ଚିବା ପାଇଁ ସଂଘର୍ଷ କରୁଛନ୍ତି । ଏଭଳି ସ୍ଥିତିରେ ଝିଅର ଉଚ୍ଚଶିକ୍ଷା ପାଇଁ ଅଧିକରୁ ଅଧିକ ଟଙ୍କା ଆବଶ୍ୟକ ।

ଅଞ୍ଜଳିଙ୍କ ଘରେ ଏକମାତ୍ର ରୋଜଗାରିଆ ମଣିଷ ହେଲେ ତାଙ୍କ ମା’ । ତାଙ୍କ ବାପା ପାରାମିଲିଟାରୀ ଫୋର୍ସରେ ନିୟୋଜିତ ଥିଲେ । ହେଲେ ୨୦୧୦ରେ ସେ ଏକ ଗୁରୁତର ଦୁର୍ଘଟଣାର ସମ୍ମୁଖୀନ ହୋଇଥିଲେ । ଫଳରେ ୨୦୧୭ ମସିହାରେ ତାଙ୍କୁ ସେବା ଆଧାରରେ ଚାକିରିରୁ ଛୁଟି ଦିଆଯାଇଥିଲା । ତେବେ ଜେନେରାଲ ପ୍ରୋଭିଡେଣ୍ଟ ପାଣ୍ଠିରୁ ତାଙ୍କୁ ପ୍ରାୟ ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲେ ମଧ୍ୟ ପିଲାଙ୍କ ଭବିଷ୍ୟତ ଗଢ଼ିବା ପାଇଁ ଏତିକି ଯଥେଷ୍ଟ ନୁହେଁ । ଦୁର୍ଘଟଣା ପରେ ଅଞ୍ଜଳିଙ୍କ ବାପା କାମ କରି ରୋଜଗାର କରିବା ପାଇଁ ଅକ୍ଷମ । ଏଥିପାଇଁ ଘରର ବୋଝ ତାଙ୍କ ମା’ଙ୍କ ଉପରେ ।

ଅଞ୍ଜଳି ପାଠପଢ଼ି ଜଣେ ଡାକ୍ତର ହେବାକୁ ଚାହାନ୍ତି । ସେ ଦେଶର ପ୍ରିମିୟର୍ ମେଡିକାଲ୍ ଇନଷ୍ଟିଚ୍ୟୁଟ୍ ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (AIIMS) ରେ ପଢ଼ିବାକୁ ଚାହୁଁଛନ୍ତି । ହେଲେ ତାଙ୍କ ପାଠପଢ଼ାରେ ଅର୍ଥ ସାଜିଛି ବାଧକ ।

ଅଞ୍ଜଳି ଡୋଙ୍ଗ୍ରା, ମହେନ୍ଦ୍ରଗଡର ଇଣ୍ଡସ୍ ଭ୍ୟାଲି ପବ୍ଲିକ୍ ସ୍କୁଲରେ ଦଶମ ଯାଏ ପାଠ ପଢ଼ିଛନ୍ତି । ପୂରା ପରିବାର ସିଲାରପୁରରେ ରୁହନ୍ତି । ଉର୍ମିଲାଙ୍କ ଅନୁସାରେ ଝିଅ ପାଠ ପଢ଼ା ପାଇଁ ବେଶ୍‌ ସଚେତନ । ଭାରି ପରିଶ୍ରମୀ । ହେଲେ ଏବେ ତାକୁ କିପରି ପାଠ ପଢ଼ାଇବି ।

ତେବେ ରବିବାର ଦିନ ଅଞ୍ଜଳି ଯାଦବଙ୍କୁ ଅଭିନନ୍ଦନ ଜଣାଇବାକୁ ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ଫୋନ୍‌ କରିଥିଲେ । ଆଉ ତାଙ୍କୁ ଅଞ୍ଜଳି ନିଜର ଆର୍ଥିକ ଅସୁବିଧା ସମ୍ପର୍କରେ ଜଣାଇଛନ୍ତି । ମୁଖ୍ୟମନ୍ତ୍ରୀ ଏସମ୍ପର୍କରେ ଜାଣିବା ପରେ ତାଙ୍କୁ ମାସିକ ୨୦,୦୦୦ ଟଙ୍କା ଛାତ୍ରବୃତ୍ତି ପ୍ରଦାନ କରିବାକୁ ବିଭାଗକୁ ନିର୍ଦ୍ଦେଶ ଦେଇଛନ୍ତି ।