Murder: ଦୋକାନ ଆଗରେ ହେଲା ଯୁକ୍ତିତର୍କ, କାର୍ ଚଢ଼ାଇ ମାଆ ସାମନାରେ ମାରିଦେଲା ଯୁବକଙ୍କୁ

ଚିକେନ ଦୋକାନ ସାମନାରେ ଦୁଇ ଗ୍ରାହକଙ୍କ ମଧ୍ୟରେ ଯୁକ୍ତିତର୍କ ହେଲା । କେହି କାହାକୁ ଛାଡିବା ଅବସ୍ଥାରେ ନଥିଲେ । ଦୁଇଜଣ ଯାକ ଚିକେନ କିଣିଲେ । ଦୋକାନରୁ ବାହାରି ଘରକୁ ଗଲେ । ଚିକେନ ଦୋକାନ ଠାରୁ ଅଳ୍ପ ଦୂରରେ ଜଣେ ଜଣକୁ କାର୍ ଚଢ଼ାଇ ମାରିଦେଲା । ମାଆ ସାମନାରେ ପୁଅକୁ ମାରିଦେଲା ଦୁର୍ବୃତ୍ତ । ପୁଅକୁ ବଞ୍ଚାଅ ବଞ୍ଚାଅ କହି ମାଆ କେବଳ ଚିତ୍କାର କରୁଥିଲା । ସେତେବେଳକୁ ରାସ୍ତା ରକ୍ତରେ ଲାଲ୍ ହୋଇଯାଇଥିଲା ।

ମଧ୍ୟପ୍ରଦେଶର ଦାମୋହ ଜିଲ୍ଲାରେ ଚିକେନ କିଣିବାକୁ ନେଇ ହୋଇଥିବା ବିବାଦ ଏକ ଦୁଃଖଦ ଘଟଣାରେ ପରିଣତ ହୋଇଛି । ଜଣେ ୩୨ ବର୍ଷୀୟ ଯୁବକଙ୍କୁ କାର ଚଢ଼ାଇ ହତ୍ୟା କରାଯାଇଛି। ଗତକାଲି ସନ୍ଧ୍ୟାରେ ଦାମୋହ ଜିଲ୍ଲାର ଅଜମେରୀ ଗାର୍ଡେନ ନିକଟରେ ଘଟିଛି।

ମତ୍ୟୁବରଣ କରିଥିବା ରାକେଶ ରାୟକୱାର ଏକ ଚିକେନ ଦୋକାନ ନିକଟରେ ଦୁଇଜଣଙ୍କର ବଚସା ହୋଇଥିଲା । ତା ପରେ ରାକେଶ ମାଆଙ୍କ ସହ ଚାଲି ଚାଲି ଘରକୁ ଯାଉଥିଲେ । ମାଆପୁଅ ଚାଲି ଚାଲି ଯିବା ବେଳେ ଅଭିଯୁକ୍ତ ଆକିଲ୍ ଏକ କାରରେ ଆସି ପ୍ରଥମେ ରାକେଶଙ୍କୁ ଧକ୍କା ଦେଇଥିଲା । ରାକେଶ ତଳେ ପଡିଯିବା ପରେ ପ୍ରଥମେ ଆଗ ଚକ ଓ ପରେ ପଛ ଚକ ଚଢ଼ାଇ ଦେଇଥିଲା ।

ରାକେଶଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଏହି ଘଟଣା ରାକେଶଙ୍କ ମାଆଙ୍କ ସାମ୍ନାରେ ହିଁ ଘଟିଥିଲା । ଦାମୋହ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଆକିଲଙ୍କୁ ଗିରଫ କରିଥିଲା।

ଘଟଣାରେ ବ୍ୟବହୃତ କାରକୁ ମଧ୍ୟ ଜବତ କରାଯାଇଛି। ପୋଲିସ ଏହି ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଡାକ୍ତରଖାନାରେ ଶବ ବ୍ୟବଚ୍ଛେଦ କରାଯାଇଛି । ଏହି ଘଟଣା ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ହୋଇଛି । କାରଣ ଏକ ଛୋଟ ବିବାଦ ଏପରି ଦୁଃଖଦ ପରିଣାମରେ ଶେଷ ହେବ ବୋଲି କେହି ଆଶା କରି ନଥିଲେ।

ଅଧିକ ପଢ଼ନ୍ତୁ: ଛାତ୍ରୀଙ୍କୁ ହଷ୍ଟେଲରେ ନିଶା ଦେଇ ଦୁଷ୍କର୍ମ, ଧମକ ଦେଇଥିଲା ଅଭିଯୁକ୍ତ ‘କହିଲେ ମାରିଦେବି’