ସରକାରୀ ହଷ୍ଟେଲରେ ଲଜ୍ଜାଜନକ ଘଟଣା; ଭାଇରାଲ୍ ହେଉଛି ଗାଧୁଆ ଭିଡିଓ

ମଧ୍ୟପ୍ରଦେଶର ଦାମୋହ ଜିଲ୍ଲାରୁ ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ସରକାରୀ ହଷ୍ଟେଲରେ ନାବାଳିକାମାନେ ସ୍ନାନ କରୁଥିବାର ଏକ ଭିଡିଓ ସୋସିଆଲ ମିଡିଆରେ ବ୍ୟାପକ ଭାବେ ଭାଇରାଲ୍ ହେବାରେ ଲାଗିଛି। ଏହାକୁ ନେଇ ସାଧାରଣରେ ଉତ୍ତେଜନା ବ୍ୟାପୁଛି।

ଏହି ଲଜ୍ଜାଜନକ ଭିଡିଓରେ ଝିଅମାନେ ଖୋଲା ସ୍ଥାନରେ ସ୍ନାନ କରୁଥିବା ଦେଖାଯାଇଛି। ଖବର ଅନୁଯାୟୀ, ସରକାରୀ ହଷ୍ଟେଲର ୱାର୍ଡେନ ଏବଂ ତାଙ୍କ ସ୍ୱାମୀ ବିନା ଅନୁମତିରେ ଏହି ଭିଡିଓ ତିଆରି କରି ଇଣ୍ଟରନେଟ୍‌ରେ ପ୍ରସାରଣ କରିଥିବା ଅଭିଯୋଗ ହୋଇଛି।

ଏହି ଘଟଣା ଜିଲ୍ଲାର ପଥରିଆ ସହରର ବୋଲି ଜଣାଯାଇଛି। ଦଶମ, ଏକାଦଶ, ଦ୍ୱାଦଶ ଶ୍ରେଣୀର ଛାତ୍ରୀମାନେ ଏହି ସରକାରୀ ହଷ୍ଟେଲରେ ରୁହନ୍ତି। ଭାଇରାଲ ଭିଡିଓକୁ ନେଇ ସମାଜର ପ୍ରତ୍ୟେକ ବିଭାଗରେ ନିନ୍ଦା କରାଯାଉଛି।

ମାମଲାର ତଦନ୍ତ ପାଇଁ ଦାମୋହ ଜିଲ୍ଲା ପ୍ରଶାସନ ଏକ କମିଟି ଗଠନ କରିଛି। ପୀଡ଼ିତାଙ୍କ ପରିବାର ସଦସ୍ୟ ମଧ୍ୟ ଜିଲ୍ଲାର ପୋଲିସ ମୁଖ୍ୟଙ୍କ ନିକଟକୁ ଯାଇ ଅଲଗା ଅଭିଯୋଗ କରିଛନ୍ତି।

ସ୍ଥାନୀୟ ଏସ୍‌ପି ରାକେଶ କୁମାର ସିଂହ ଏହି ଘଟଣାରେ ଏଫ୍‌ଆଇଆର ପଞ୍ଜିକରଣ କରିବାକୁ ନିର୍ଦ୍ଦେଶ ଦେଇଛନ୍ତି। ଏନେଇ ପଥରିଆ ପୋଲିସ ଏକ ଅଭିଯୋଗ ପଞ୍ଜିକରଣ କରିଛି। ଅଧିକାରୀ କହିଛନ୍ତି ଯେ ପ୍ରାଥମିକ ତଦନ୍ତରୁ ଏହି ଅଭିଯୋଗକୁ ସତ୍ୟ ବୋଲି ଜଣାପଡ଼ିଛି। ସେ କହିଛନ୍ତି ପୋଲିସ ଖୁବ ଶୀଘ୍ର ଏ ବାବଦରେ ମାମଲା ରୁଜୁ କରିବ।