ମହିଳାଙ୍କ ସହ ବର୍ବରତା .. ମଣିଷ ସତରେ ଏମିତି ହିଂସ୍ର ପଶୁ ଠାରୁ ବି ହୀନ ହୋଇଯାଇପାରେ... ହିଂସାଗ୍ରସ୍ତ ମଣିପୁରରେ ଦୁଇ ଜଣ ମହିଳାଙ୍କୁ ଉଲଗ୍ନ କରି ଚଲାଇ ଚଲାଇ ନେଲେ ଲୋକେ । ସୋସିଆଲ ମିଡିଆରେ ଏପରି ଏକ ଭିଡିଓ ଭାଇରାଲ ହେବାରେ ଲାଗିଛି । ଯେଉଁଥିରେ ଦୁଇ ଜଣ ମହିଳାଙ୍କୁ କେତେକ ଲୋକ ଉଲଗ୍ନ ଅବସ୍ଥାରେ ରାସ୍ତାରେ ଚଲାଇ ଚଲାଇ ନେବା ସହ ଅଭଦ୍ର ଆଚରଣ କରୁଥିବା ଦେଖିବାକୁ ମିଳୁଛି ।
ତେବେ ଏହି ଘଟଣାରେ କାର୍ଯ୍ୟାନୁଷ୍ଠାନ ପାଇଁ ଦାବି ଜୋର ଧରିଛି । ସୋସିଆଲ ମିଡିଆରେ ଏହାର ଭିଡିଓ ଭାଇରାଲ ହେବା ପରେ ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ମଣିପୁର ପୋଲିସ ଘଟଣାକୁ ଗୁରୁତର ସହ ନେଇଛି । ମୁଖ୍ୟମନ୍ତ୍ରୀ ଏନ. ବୀରେନ ସିଂ ମାମଲାର ପ୍ରାଥମିକତା ଭିତ୍ତିରେ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ।
Also Read
ଗତ ମେ ମାସ ୪ ତାରିଖରେ ମଣିପୁର କାଙ୍ଗପୋକପି ଜିଲ୍ଲାରେ ଦୁଇଜଣ ମହିଳାଙ୍କୁ ଉଲଗ୍ନ କରି ରାସ୍ତାରେ ଚଲାଇ ଚଲାଇ ନେଇଥିଲେ । ଏପରିକି ଦୁଇ ମହିଳାଙ୍କୁ ପରେ ଗଣଦୁଷ୍କର୍ମ କରାଯାଇଥିବା ମଧ୍ୟ ଅଭିଯୋଗ ହୋଇଛି । ସେପଟେ ମଣିପୁର ଭିଡିଓ ଭାଇରାଲକୁ ନେଇ କେନ୍ଦ୍ର ସରକାରଙ୍କ ପକ୍ଷରୁ ଟ୍ୱିଟର ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇପାରେ । ଏହି ଭିଡିଓ ଭାଇରାଲ ହେବା ଦ୍ୱାରା ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବାର ଆଶଙ୍କା ରହିଥିଲା ।
ITLF ପକ୍ଷରୁ ଜାରି ହେଲା ବିବୃତ୍ତି
ଆଦିବାସୀ ସଂଗଠନ ଇଣ୍ଡିଜିନସ୍ ଟ୍ରାଇବାଲ ଲିଡର ଫୋରମ୍ (ଆଇଟିଏଲଏଫ୍) ର ଏକ ବିବୃତ୍ତି ଅନୁଯାୟୀ, ଏହି ଘଟଣା ମେ ’୪ ରେ ରାଜ୍ୟ ରାଜଧାନୀ ଇମ୍ଫାଲଠାରୁ ପ୍ରାୟ ୩୪ କିଲୋମିଟର ଦୂରରେ ଥିବା କାଙ୍ଗପୋକପି ଜିଲ୍ଲାରେ ଘଟିଥିଲା । ଏହି ଘଟଣାର ଗୋଟିଏ ଦିନ ପୂର୍ବରୁ ଦୁଇ ସମ୍ପ୍ରଦାୟ ମଧ୍ୟରେ ହିଂସାତ୍ମକ ସଂଘର୍ଷ ହୋଇଥିଲା । ପୀଡ଼ିତ ମହିଳା ଦୁଇ ଜଣ କୁକି ଜନଜାତିର ହୋଇଥିବା ବେଳେ ସେମାନଙ୍କୁ ଦୁର୍ବ୍ୟବହାର ପ୍ରଦର୍ଶନ କରୁଥିବା ବ୍ୟକ୍ତି ମେଇତି ସଂପ୍ରଦାୟର ବୋଲି ଜଣାଯାଇଛି ।
ତେବେ ପୀଡ଼ିତ ମହିଳାମାନେ ଛାଡ଼ିଦେବା ପାଇଁ କାନ୍ଦି କାନ୍ଦି ଗୁହାରି କରୁଥିଲେ । ହେଲେ ସମସ୍ତେ ଯେପରି ଦୃଶ୍ୟକୁ ଉପଭୋଗ କରୁଥିଲେ । ଦୁଇ ମହିଳାଙ୍କୁ କେହି ସାହାଯ୍ୟ କରିବାକୁ ଆଗେଇ ଆସୁ ନଥିଲେ। କିଛି ଲୋକ କ୍ରମାଗତ ଭାବରେ ଏହି ମହିଳାମାନଙ୍କୁ ଅସଦାଚରଣ କରୁଥିବା ଦେଖାଯାଉଛି ।
ମଣିପୁରରେ ସଂରକ୍ଷଣକୁ ନେଇ ଦୁଇ ସମ୍ପ୍ରଦାୟ କୁକି ଓ ମେଇତି ମଧ୍ୟରେ ବିବାଦ ଉଗ୍ରରୂପ ନେଇଥିଲା । ଏଥିଯୋଗୁଁ ବ୍ୟାପକ ହିଂସା ହୋଇ ଶତାଧିକ ଲୋକଙ୍କ ମୃତ୍ୟୁ ହୋଇଥିଲା । ..